ເນື່ອງຈາກວ່າຮ່ອງຄວາມກົດດັນອາກາດຕ່ຳຍັງສືບຕໍ່ພາດຜ່ານພາກກາງ ແລະ ພາກໃຕ້ ຂອງປະເທດລາວ ແລະ ປ່ອງເຂົ້າໃສ່ລົມພາຍຸດີເປຼຊັນ ເຊິ່ງໃນເວລາ 8:30 ໂມງ ຂອງວັນທີ 3 ມິຖຸນາ 2018 ມີຈຸດສູນກາງຢູ່ເສັ້ນຂະໜາດທີ 13.7 ອົງສາເໜືອ ແລະ ເສັ້ນແວງທີ 111.3 ອົງສາຕາເວັນອອກ ກຳລັງເຄື່ອນທີ່ລຽບຕາມຊາຍແດນດ້ານຕາເວັນອອກຂອງປະເທດຫວຽດນາມຢ່າງຊ້າໆດ້ວຍຄວາມໄວ 15 ກິໂລແມັດ/ຊົ່ວໂມງ.

ພາຍຸຫົວນີ້ ຈະເຄື່ອນທີ່ລຽບຕາມຊາຍແດນປະເທດຫວຽດນາມ ໃນໄລຍະວັນທີ 3 ຫາ 4 ວັນຕໍ່ໜ້ານີ້ ເຊິ່ງຈະເຮັດໃຫ້ມີຝົນຕົກໃນລະດັບປານກາງເປັນບໍລິເວນກວ້າງໃນເຂດພາກກາງ ແລະ ພາກໃຕ້ຂອງປະເທດລາວ ແລະ ຕົກໜັກພ້ອມມີລົມພັດແຮງຢູ່ບາງທ້ອງຖິ່ນໃນໄລຍະວັນທີ 4 ຫາ 8 ມິຖຸນາ 2018.

ດັ່ງນັ້ນ, ຈຶ່ງຂໍແຈ້ງເຕືອນໃຫ້ພໍ່ແມ່ປະຊາຊົນ ທີ່ຢູ່ພາກກາງຫາພາກໃຕ້ຈົ່ງມີສະຕິລະມັດລະວັງຕໍ່ ຝົນຕົກຫນັກ ລົມແຮງ ເຊິ່ງອາດຈະເຮັດໃຫ້ຕົ້ນໄມ້ໃຫຍ່ຫັກລົ້ມ ຫລັງຄາເຮືອນເປີດ ນໍ້າຖ້ວມຊຸ ແລະອື່ນໆ