ສຳນັກຂ່າວຕ່າງປະເທດລາຍງານຈາກນະຄອນຫຼວງໂຊລ ປະເທດເກົາຫຼີໃຕ້ ເມື່ອວັນທີ 25 ພຶດສະພາ 2018 ວ່າ ສຳນັກຂ່າວກາງເກົາຫຼີ ເຜີຍແຜ່ຖະແຫລງການຂອງລັດຖະມົນຕີກະຊວງການຕ່າງປະເທດຄົນທີ 1 ວ່າ ການຕັດສິນໃຈຂອງປະທານາທິບໍດີ ໂດນັລ ທຮັມ ຜູ້ນຳສະຫະລັດ ໃນການເປັນຝ່າຍຍົກເລີກການພົບປະຫາລືກັບ ທ່ານ ຄິມຈອງອຶນ ຜູ້ນຳເກົາຫຼີເໜືອ ເຊິ່ງມີກຳນົດໄວ້ໃນວັນທີ 12 ມິຖຸນາທີ່ຈະຮອດນີ້ “ເໜືອຄວາມຄາດໝາຍ” ແລະ “ໜ້າເສົ້າໃຈເປັນຢ່າງຍິ່ງ” ແຕ່ລັດຖະບານປຽງຢາງພ້ອມສະເໝີ ໃນການເຈລະຈາກັບລັດຖະບານວໍຊິງຕັນຕາມຂະບວນການທາງການທູດ
ຂະນະທີ່ທຳນຽບປະທານາທິບໍດີເກົາຫຼີໃຕ້ ຫຼື ຊອງວາແດອອກຖະແຫຼງການລະບຸວ່າ ປະທານາທິບໍດີ ມຸນ ແຈອິນ “ເສຍໃຈທີ່ສຸດ” ເມື່ອໄດ້ຮູ້ວ່າການປະຊຸມສຸດຍອດຜູ້ນຳສະຫະລັດກັບຜູ້ນຳເກົາຫຼີເໜືອບໍ່ອາດເກີດຂຶ້ນໄດ້ ແລະ ໄດ້ຮຽກປະຊຸມສຸກເສີນໜ່ວຍງານດ້ານຄວາມໝັ້ນຄົງອີກດ້ວຍ