ສຳນັກຂ່າງຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນທີ 22 ພຶດສະພາ ວ່າ ກຸ່ມຜູ້ສື່ຂ່າວຕ່າງຊາດປະມານ 20 ຄົນ ເຊິ່ງມີທັງຜູ້ສື່ຂ່າວຈາກສະຫະລັດ, ຈີນ ແລະ ຣັດເຊຍ ຮວມຕົວກັນທີ່ສະໜາມບິນນານາຊາດນະຄອນຫຼວງປັກກິ່ງ ເພື່ອໂດຍສານທ້ຽວບິນໄປທີ່ນະຄອນຫຼວງປຽງຢາງ ເພື່ອຮ່ວມສັງເກດການການຮື້ຖອນ ແລະ ທຳລາຍສິ່ງປຸກສ້າງໃນນິຄົມນິວເຄຣຍປຸງກະເຍ -ຣີ ໃນພາກຕະເວັນອອກສຽງເໜືອຂອງເກົາຫຼີເໜືອ ທີ່ຕາມກຳນົດຈະມີຂຶ້ນໃນລະຫວ່າງວັນທີ 23-25 ພຶດສະພານີ້. ໂດຍສຳນັກຂ່າວຕ່າງປະເທດທີ່ໄດ້ຮັບອະນຖຍາດຈາກລັດຖະບານປຽງຢາງໄດ້ແກ່ ຊີເອັນເອັນ, ບີບີເອສ, ເອພີ, ຣັດເຊຍ, ທູເດ ແລະ ສຳນັກຂ່າວອີກຫຼາຍແຫ່ງໃນສັງກັດຂອງລັດຖະບານປັກກິ່ງ

ຂະນະທີ່ກະຊວງຮວມຊາດໃນນະຄອນຫຼວງໂຊລອອກຖະແຫຼງການສະແດງ “ຄວາມຜິດຫວັງ ແລະ ເສຍໃຈເປັນທີ່ສຸດ” ຕໍ່ການທີ່ເກົາຫຼີເໜືອບໍ່ອະນຸຍາດໃຫ້ນັກຂ່າວຂອງເກົາຫຼີໃຕ້ຮ່ວມສັງເກດການໃນຊ່ວງເວລາທີ່ສຳຄັນ ໂດຍມີນັກຂ່າວຈາກເກົາຫຼີໃຕ້ 8 ຄົນ ເຊິ່ງລັດຖະບານໂຊລ ໄດ້ສົ່ງລາຍຊື່ໄກ່ອນໜ້ານີ້ ລົງທຶນເດີນທາງໄປລໍຖ້າທີ່ນະຄອນຫຼວງປັກກິ່ງ ເພື່ອຫວັງຈະໄດ້ຮັບການອະນຸມັດໃນນາທີສຸດທ້າຍ ແຕ່ບໍ່ເປັນຜົນ ແຕ່ເຖິງຢ່າງໃດກໍ່ຕາມ ລັດຖະບານໂຊລ ມີຄວາມຍິນດີ ແລະ ຊື່ນຊົມທີ່ລັດຖະບານປຽງຢາງຮັກສາສັນຍາໃນການປົດອາວຸດນິວເຄຣຍ ເພື່ອປູທາງສູ່ການເຈລະຈາລະຫວ່າງສະຫະລັດກັບເກົາຫຼີເໜືອ ເຊິ່ງທາງເກົາຫຼີໃຕ້ມີຄວາມເຊື່ອໝັ້ນວ່າຈະເກີດຂຶ້ນຕາມກຳນົດຄືໃນວັນທີ 12 ມິຖຸນາ 2018ນີ້ ທີ່ສິງກະໂປ