ສຳນັກຂ່າວ AP ລາຍງານຈາກເມືອງຫລວງແຄນເບລາ, ປະເທດອົດສະຕາລີ ເມື່ອວັນທີ 15 ພຶດສະພາ ວ່າລັດຖະບານອົດສະຕາລີ ຈະໃຊ້ຈ່າຍເງີນຈຳນວນ 294 ລ້ານໂດລາອົດສະຕາລີ ຫລື ປະມານ 1,763 ຕື້ກີບ ໃນການປັບປຸງອຸປະກອນດ້ານຄວາມຫມັ້ນຄົງ ແລະ ເພີ່ມຈຳນວນເຈົ້າຫນ້າທີ່ ໃນສະຫນາມບິນຫລັກທຸກແຫ່ງ ຮວມທັງສະຫນາມບິນພາຍໃນທັງ 13 ແຫ່ງທົ່ວປະເທດ.
ການເຄື່ອນໄຫວແມ່ນມີຂື້ນຫລັງຈາກມີການພະຍາຍາມທີ່ຈະນຳກະເປົາບັນຈຸລະເບີດລະດັບກອງທັບ ຜ່ານການກວດກາເຄື່ອງໃນກະເປົາທີ່ເຄົາເຕີ້ສະຫນາມບິນຊິດນີ້ ໄປຍັງບ່ອນເກັບມ້ຽນກະເປົາກ້ອງຍົນໂດຍສານແອບັສ A380 ຂອງສາຍການບິນເອຕິຮັດ ແອເວ ຂອງສະຫະລັດອາຣັບເອມິເລດ (UAE) ທີ່ກຳລັງຈະອອກເດີນທາງມຸ່ງຫນ້າສູ່ຕາເວັນອອກກາງເມື່ອເດືອນ ກໍລະກົດ ປີທີ່ແລ້ວ ແຕ່ພະນັກງານປະຈຳເຄົາເຕີ້ປະຕິເສດຕໍ່ເຈົ້າຂອງກະເປົາດັ່ງກ່າວເນື່ອງຈາກມີນໍ້າຫນັກທີ່ເກີນ.
ເຈົ້າຫນ້າທີ່ເຜີຍວ່າແຜນການດັ່ງກ່າວແມ່ນດຳເນີນງານໂດຍກຸ່ມ ISIS ແລະ ຄົນທ້ອງຖີ່ນເມືອງຊິດນີ້ 2 ຄົນ ຖືກຕຳຫລວດຈັບກຸມ ແລະ ຕັ້ງຂໍ້ຫາວາງແຜນກໍ່ການຮ້າຍ. ພາຍໃຕ້ແຜນການຍົກລະດັບການຮັກສາຄວາມປອດໄພຈະມີການຕິດຕັ້ງເຄື່ອງສະແກນຮ່າງກາຍ ແລະ ອຸປະກອນ X-Ray ອັນລໍ້າຫນ້າໃນສະຫນາມບິນທຸກແຫ່ງ, ຖ້ຽວບິນບັນທຸກສິນຄ້າຂາເຂົ້າ ແລະ ຖ້ຽວບິນສົ່ງສິນຄ້າໄປສະນີລະຫວ່າງປະເທດ ຈະຖືກກວດກາໂດຍລະອຽດຫລາຍກວ່າເກົ່າ. ນອກຈາກນັ້ນ, ຈະເພີ່ມຈຳນວນຕຳຫລວດອີກ 140 ສະຫາຍ ເພື່ອດຳເນີນການກວດຈັບລະເບີດສະແຫວງເຄື່ອງຕາມສະຫນາມບິນຕ່າງໆ ໂດຍຈະໄດ້ຮັບການສະຫນັບສະຫນູນຈາກທີມງານຜູ້ຊ່ຽວຊານດ້ານຂ່າວກອງຈາກສຳນັກງານຕຳຫລວດ.
ລັດຖະມົນຕີກະຊວງພາຍໃນຂອງອົດສະຕາລີ, ທ່ານ ປີເຕີ ດັດຕັນ ກ່າວວ່າ ຕຳຫລວດຈະໄດ້ຮັບອຳນາດໃຫມ່ໃນການສຸ່ມກວດບຸກຄົນທີ່ສະຫນາມບິນ ແລະ ນຳຕົວບຸກຄົນຕ້ອງສົງໄສອອກຈາກສະຫນາມບິນ. ຫາກແຜນການກໍ່ວິນາດສະກຳເດືອນກໍລະກົດ ປີທີ່ແລ້ວປະສົບຜົນສຳເລັດ ການລະເບີດຈະສົ່ງຜົນກະທົບຕໍ່ການທ່ອງທ່ຽວຂອງອົດສະຕາລີ ອາດເສຍຫາຍເຖິງຫລາຍພັນລ້ານໂດລາ ຮວມທັງຕໍ່ນັກສຶກສາຕ່າງຊາດທີ່ກຳລັງຮຽນຢູ່ໃນມະຫາວິທະຍາໄລຕ່າງໆ ໃນອົດສະຕາລີ ທີ່ເປັນຫນື່ງໃນອຸດສາຫະກຳການຄ້າທີ່ເຮັດລາຍໄດ້ເຂົ້າປະເທດຫລາຍທີ່ສຸດ.
ແຫລ່ງຂ່າວຕ່າງປະເທດ: TDN