ຕໍ່ກັບສະພາບເຫດສັດລ້ຽງງົວຂອງປະຊາຊົນ ຕາຍເຖິງ 2 ຄັ້ງ ລວມທັງໝົດ 33 ໂຕ, ໃນເຂດເສດຖະກິດກວມລວມໄຊເສດຖາ ນະຄອນຫຼວງວຽງຈັນ, ໂດຍທີ່ໜ່ວຍງານ ທີ່ກ່ຽວຂ້ອງກໍຍັງບໍ່ທັນສາມາດສະຫຼຸບໄດ້ເຖິງສາເຫດຂອງການຕາຍໄດ້ເທື່ອ ແລະຕໍ່ກັບກໍລະນີດັ່ງກ່າວນີ້, ວັນທີ 25 ເມສາ 2018 ຂະແໜງລ້ຽງສັດ ແລະການປະມົງພະແນກກະສິກຳ ແລະປ່າໄມ້ ນະຄອນຫຼວງວຽງຈັນກໍໄດ້ຊີ້ແຈງເຖິງ ສາເຫດດັ່ງກ່າວ.
ທ່ານນາງ ພັດສະລີ ພິດສະໄໝ ຫົວໜ້າຂະແໜງລ້ຽງສັດ ແລະການປະມົງ ກ່າວວ່າ: ໃນວັນທີ 22 ເມສາ 2018 ພາຍຫຼັງທີ່ຂະແໜງລ້ຽງສັດ ແລະການປະມົງໄດ້ຮັບລາຍງານຈາກໜ່ວຍງານລ້ຽງສັດ ແລະການປະມົງ ເມືອງໄຊເສດຖາວ່າມີງົວຕາຍຢູ່ເຂດເສດຖະກິດກວມລວມໄຊເສດຖາ, ດັ່ງນັ້ນໜ່ວຍງານຂອງພວກເຮົາກໍໄດ້ແຕ່ງຕັ້ງພະນັກງານວິຊາການລົງສົມທົບກັບຫ້ອງການກະສິກຳ ແລະປ່າໄມ້ເມືອງຕົ້ນຕໍແມ່ນໜ່ວຍງານທີ່ກ່ຽວຂ້ອງໂດຍກົງ ແລະສົມທົບກັບອຳນາດ ການປົກຄອງບ້ານໂຊກນ້ອຍ, ບ້ານນາບຽນ ແລະບ້ານໂພນທອງລົງກວດກາຕົວຈິງຕາມການລາຍງານຂອງປະຊາຊົນໃນວັນທີ 20 ເມສາຜ່ານມາ ແລະຕາມການລົງຕົວຈິງພົບວ່າສະພາບສັດ ທີ່ຕາຍນັ້ນແມ່ນເນົ່າເປືອຍ ແລະມີກິ່ນເໝັນແລ້ວ ຊຶ່ງລວມທັງໝົດມີ 12 ໂຕ.
ໃນນັ້ນພົບຢູ່ເຂດບ້ານໂຊກນ້ອຍ 2 ໂຕ, ບ້ານນາບຽນ 4 ໂຕ ແລະບ້ານໂພນທອງ 5 ໂຕ ໂດຍທີ່ບໍ່ຮູ້ສາເຫດຂອງການຕາຍ ແລະບໍ່ຮູ້ເຈົ້າຂອງ, ສະນັ້ນຈຶ່ງເຮັດໃຫ້ໜ່ວຍງານທີ່ກ່ຽວຂ້ອງບໍ່ສາມາເກັບກັບສີ້ນສ່ວນເພື່ອນຳມາພິສູດເຖິງສາເຫດໄດ້, ສ່ວນທີ່ເຮັດໄດ້ກໍມີພຽງການທຳລາຍສີ້ນສ່ວນສັດທີ່ທີ່ຕາຍໄປນັ້ນຖີ້ມ (ດ້ວຍການເຜົາ), ທັງນີ້ ກໍເພື່ອເປັນການສະກັດກັ້ນການແຜ່ລະບາດໃນວົງກວ້າງ.
ເພື່ອເປັນການສະກັດກັ້ນ ແລະເຝົ້າລະວັງໃນຕໍ່ໜ້າແມ່ນຈະສືບຕໍ່ ຕິດຕາມເຝົ້າລະວັງວະພາບການຕາຍ ຂອງງົວໃນເຂດດັ່ງກ່າວຢ່າງໃກສິດ, ພ້ອມທັງລົງແນະນຳອຳນາດການປົກ ຄອງບ້ານ, ສະຕະວະແພດບ້ານໃນການເຝົ້າລະວັງພະຍາດສັດ, ການປິ່ນປົວສັດ, ການດຸແລຮັກສາສຸຂະພາບສັດ, ການທຳ ລາຍຊາກສັດທີ່ຕາຍເພື່ອໃຫ້ການຕາຍ ຂອງສັດນັ້ນຢຸດຕິລົງສາມາດຄວບຄຸມ ສະພາບການລະບາດຂອງພະຍາດສັດໄດ້, ນອກນັ້ນຍັງຈະລົງສົມທົບກັບຫ້ອງ ການກະສິກຳ ແລະປ່າໄມ້ເມືອງໄຊເສດຖາເພື່ອວາງແຜນຄວບຄຸມຕື່ມ, ເນື່ອງ ຈາກໃນວັນທີ 17-26 ມີນາ 2018 ຜ່ານມາ, ກໍໄດ້ມີສາເຫດແບບນີ້ເກີດຂຶ້ນ ແລ້ວຄັ້ງໜຶ່ງ ແລະໄດ້ທຳລາຍຊີວິດສັດ ໄປແລ້ວຈຳນວນ 21 ໂຕ, ໂດຍຈຸດເກີດ ເຫດແມ່ນຢູ່ບ້ານໂຊກນ້ອຍ ແລະບ້ານໂພນທອງ.
ແຫລ່ງຂ່າວ: Sengaloun Sayalath