ເມື່ອວັນທີ 19 ເມສາ 2018 ທີ່ຜ່ານມາ ສະຫະພັນບານເຕະສາກົນ ຫຼື FIFA ອອກຖະແຫຼງການວ່າ ໄດ້ລົງໂທດປັບໃໝສະຫະພັນບານເຕະແຫ່ງຊາດລາວເປັນເງິນ 700.000 ໂດລາ ຈາກການລະເມີດຂໍ້ກຳນົດຕ່າງໆທີ່ກ່ຽວກັບການເຄື່ອນຍ້າຍນັກເຕະລະຫວ່າງປະເທດ ແລະ ການລົງທະບຽນໃນຄັ້ງທຳອິດຂອງນັກເຕະລຸ້ນເຍົາວະຊົນ, ເຊິ່ງຜິດກົດຂອງ FIFA ຕາມມາດຕາ 19 ວ່າດ້ວຍສະຖານະ ແລະ ການເຄື່ອນຍ້າຍນັກເຕະລະຫວ່າງປະເທດທີ່ເປັນຄວາມຜິດຫຼັກ ແລະ ຍັງຜິດຂໍ້ກຳນົດເອົານັກເຕະລຸ້ນເຍົາວະຊົນ ແລະ ລຸ້ນໃຫຍ່ປະສົມລົງໃນການແຂ່ງຂັນ
ເຊິ່ງການຕັດສິນດັ່ງກ່າວຂອງ FIFA ອາດສືບເນື່ອງມາຈາກສະໂມສອນບານເຕະລາວ ຈັດຫານັກເຕະເຍົາວະຊົນອາຟຣິກາ ຈຳນວນ 23 ຄົນມາເຊັນສັນຍາເປັນນັກເຕະໃນສະໂມສອນຂອງຕົນແບບບໍ່ຖືກຕ້ອງເມື່ອປີ 2015 ທີ່່ຜ່ານມາ
ຫຼ້າສຸດທາງສະຫະພັນບານເຕະແຫ່ງຊາດລາວ ໄດ້ອອກມາຊີ້ແຈງຜ່ານເຟສບຸກທີ່ມີຊື່ວ່າ: ສະຫະພັນບານເຕະແຫ່ງຊາດລາວ Lao Football Federation ໂດຍມີເນື້ອໃນກ່າວໄວ້ວ່າ
“ແຈ້ງການ ຄໍາຕັດສິນຂອງຄະນະກໍາມະການລະບຽບວິໄນຟີຟ່າ
ສະຫະພັນບານເຕະແຫ່ງຊາດລາວ (ສຕລ) ຂໍແຈ້ງມາຍັງປວງຊົນລາວ, ບັນດາສື່ມວນຊົນລາວ ແລະ ຜູ້ຕິດຕາມກິລາບານເຕະທັງພາຍໃນ ແລະ ຕ່າງປະເທດ ໃຫ້ຊາບວ່າ ສຕລ ໄດ້ຮັບຄໍາຕັດສິນຈາກສະຫະພັນບານເຕະນານາຊາດ (ຟີຟ່າ) ໃນວັນທີ 19 ເມສາ 2018 ທີ່ຜ່ານມາ. ສຕລ ກໍໄດ້ໃຫ້ຄວາມຮ່ວມມືຢ່າງເຕັມທີ່ຕໍ່ກັບຄະນະກຳມະການລະບຽບວິໄນຂອງ ຟີຟ່າ ໃນການດຳເນີນການສຶບສວນ ຄະດີດັ່ງກ່າວ ຢ່າງເປີດເຜີຍ ແລະ ຈິງໃຈ ຕະຫລອດມາ. ເມື່ອໄດ້ເຫັນຄຳຕັດສິນດັ່ງກ່າວຂອງ ຟີຟ່າ ແລ້ວ ສຕລ ກໍໄດ້ຮ້ອນໃຈຄັດເລືອກ ແລະ ແຕ່ງຕັ້ງທະນາຍຄວາມຂອງຕົນ ເພື່ອອຸຖອນຄະດີດັ່ງກ່າວ ຕໍ່ຄະນະກຳມະການອຸທອນຂອງ ຟີຟ່າ ເພື່ອປົກປ້ອງກຽດ ແລະ ຊື່ສຽງຂອງ ສຕລ ກໍຄືປະເທດຊາດ .“
ແຫລ່ງຂ່າວຈາກ: ອິດສະຫຼະ ແລະ ສະຫະພັນບານເຕະແຫ່ງຊາດລາວ