ສຳນັກຂ່າວຕ່າງປະເທດລາຍງານຈາກລອນດອນ ປະເທດ ອັງກິດ ເມື່ອວັນທີ 2 ເມສາ 2018 ວ່າ ສະຖານທູດຣັດເຊຍປະຈຳນະຄອນຫຼວງລອນດອນອອກຖະແຫຼງການເມື່ອອາທິດທີ່ຜ່ານມາ ຂໍໃຫ້ພົນລະເມືອງຣັດເຊຍ “ເພີ່ມຄວາມລະວັງ” ໃນການເດີນທາງໄປອັງກິດ ຫຼື ແມ່ນແຕ່ການສົ່ງຄົນໄປຮຽນທີ່ອັງກິດ ເນື່ອງຈາກມີຄວາມສ່ຽງໃນການຖືກຂົ່ມຂູ່ ແລະ ຄຸກຄາມທາງເຊື້ອຊາດ ຈາກກໍລະນີຄວາມຂັດແຍ້ງລະຫວ່າງສອງປະເທດ

ຂະນະທີ່ນັກການທູດຣັດເຊຍ 60 ຄົນ ພ້ອມສະມາຊິກກວ່າ 111 ຄົນ ໄດ້ເດີນທາງອອກຈາກສະຫະລັດຕາມຄຳສັ່ງເນລະເທດຂອງລັດຖະບານວໍຊິງຕັນ ເມື່ອອາທິດທີ່ຜ່ານມາ ເພື່ອສະແດງຄວາມເປັນນ້ຳໜຶ່ງໃຈດຽວກັນ ລະຫວ່າງສະຫະລັດກັບອັງກິດ ແລະ ພັນທະມິດອີກຫຼາຍປະເທດໃນຢຸໂຣບ

ຣັດເຊຍກໍ່ຕອບໂຕ້ດ້ວຍການເນລະເທດເຈົ້າໜ້າທີ່ທາງການທູດຂອງສະຫະລັດໃນຈຳນວນເທົ່າກັນ ແລະ ສັ່ງປິດສະຖານກົງສຸນໃຫຍ່ສະຫະລັດທີ່ນະຄອນເຊັນປີເຕີຣສ໌ເບຣິກ ເນື່ອງຈາກສະຫະລັດສັ່ງປິດສະຖານກົງສຸນໃຫຍ່ຣັດເຊຍປະຈຳເມືອງຊີແອດເທລີ