ເມື່ອອາທິດທີ່ຜ່ານມາ ຕຳຫຼວດລາວ ແລະ ຫວຽດນາມ ໄດ້ຮ່ວມມືກັນຈັບກຸມໂຕຜູ້ຄ້າຢາ ໄດ້ຫຼັກຖານເປັນຢາອີ (Ecstasy) ກວ່າ 50,000 ເມັດ ແລະ ຢາໄອສ໌ກວ່າ 1 ກິໂລກຣາມ.
ກຳລັງເຈົ້າໜ້າທີ່ຕາມແລວຊາຍແດນລາວ-ຫວຽດນາມໄດ້ຢຸດຕິການເຄື່ອນໄຫວຄ້າຢາເສບຕິດຄັ້ງໃຫຍ່ ເມື່ອວັນທີ 18 ມີນາ 2018 ທີ່ຜ່ານມາ ໂດຍສາມາດຈັບກຸມຜູ້ຖືກຫາຈຳນວນ 5 ຄົນພ້ອມກັບຢາອີ 50,000 ເມັດ ແລະ ຢາໄອສ໌ ຈຳນວນ 1 ກິໂລກຣາມບໍລິເວນຊາຍແດນລາວ-ຫວຽດ ແຂວງສາລະວັນຕໍ່ໃສ່ແຂວງກວາງຈີ. ພ້ອມນັ້ນ ຍັງຢຶດໄດ້ອາວຸດປືນ ເຄ59, ກະສຸນ 8 ລູກ ແລະ ລົດ 2 ຄັນ.
ຜົນການສອບສວນພົບວ່າ ຜູ້ຖືກຫາທັງ 5 ຄົນເປັນສ່ວນໜຶ່ງຂອງຂະບວນການຄ້າຢາຂ້າມຊາດໃນ ໄທ, ລາວ ແລະ ຫວຽດນາມ. ຫຼັງຈາກນັ້ນ ຈຶ່ງໄດ້ມີການສົ່ງໂຕຜູ້ຖືກຫາທັງໝົດໃຫ້ແກ່ທາງການລາວ ເພື່ອດຳເນີນຄະດີຕາມກົດໝາຍ.
ສື່ຫວຽດນາມລະບຸວ່າ ຫວຽດນາມເປັນແຫຼ່ງຄ້າຢາເສບຕິດອັນດັບຕົ້ນໆໃນບໍລິເວນອ້ອມຮອບເຂດສາມຫຼ່ຽມຄຳ ເຊິ່ງປະກອບມີ ໄທ, ລາວ ແລະ ມຽນມາ. ພ້ອມກັນນັ້ນ ຫວຽດນາມຍັງເປັນປະເທດໜຶ່ງທີ່ມີການວາງໂທດໃສ່ຄະດີຢາເສບຕິດທີ່ຮຸນແຮງທີ່ສຸດແຫ່ງໜຶ່ງຂອງໂລກ ເຊິ່ງຖ້າຜູ້ໃດມີໃນຄອບຄອງ ຫຼື ຄ້າເຮໂຣອີນ ຫຼາຍກວ່າ 700 ກຣາມ ຫຼື ຢາບ້າຫຼາຍກວ່າ 2.5 ກິໂລກຣາມຈະຖືກໂທດປະຫານຊີວິດ. ນອກນັ້ນ, ການຜະລິດ ຫຼື ຂາຍເຮໂຣອີນ 100 ກຣາມ ຫຼື ຢາເສບຕິດຊະນິດອື່ນ 100 ກຣາມ ກໍຈະຖືກໂທດປະຫານຊີວິດເຊັ່ນກັນ.
ແຫລ່ງຂ່າວ : vnexpress ແລະ ມ່ວນສະນຸກ.