ຜົນວິໄຈຫຼ້າສຸດລະບຸວ່າ ການປູກຕົ້ນໄມ້ບໍ່ສາມາດຊ່ວຍໃຫ້ກ໊າສຄາບອນຫຼຸດລົງຫຼາຍພໍທີ່ຈະບັນເທົາພາວະໂລກຮ້ອນ ຈຶ່ງຕ້ອງຫຼຸດປະລິມານການປ່ອຍກ໊າສຄາບອນລົງເທົ່ານັ້ນ.
ນັກວິທະຍາສາດສ່ວນໃຫຍ່ເຫັນກົງກັນວ່າທຸກຝ່າຍຕ້ອງຮ່ວມກັນຫາວິທີກຳຈັດກ໊າສຄາບອນອອກຈາກຊັ້ນບັນຍາກາດ ເຊິ່ງໜຶ່ງໃນວິທີທີ່ຄົນຄິດເຖິງກໍຄືການປູກຕົ້ນໄມ້ໃຫ້ດູດເອົາກ໊າສຄາບອນ ແລະ ປ່ອຍກ໊າສອັອກຊີເຈນອອກມາ. ແຕ່ຜົນການວິໄຈທີ່ຕີພິມໃນວາລະສານວິຊາການເອີສຟິວເຈີລະບຸວ່າ ມະນຸດບໍ່ສາມາດປູກຕົ້ນໄມ້ຫຼາຍພໍທີ່ຈະກຳຈັດກ໊າສຄາບອນໄດ້ຕາມເປົ້າໝາຍທີ່ລະບຸໄວ້ໃນຂໍ້ຕົກລົງປາຣີສວ່າດ້ວຍການປ້ອງກັນການປ່ຽນແປງສະພາບພູມອາກາດ ເຊິ່ງມີການປຍບທຍບວ່າ ຈະຕ້ອງປູກຕົ້ນໄມ້ເຕັ້ມພື້ນທີ່ຂອງປະເທດສະຫະລັດອາເມລິກາ ຈຶ່ງຈະສາມາດດູດເອົາກ໊າສຄາບອນ 10% ທີ່ມະນຸດປ່ອຍອອກມາທຸກປີ.
ໃນການສຶກສາຂອງ ລີນາ ບອຍເຊນ ແລະ ທີມນັກວິໄຈຈາກສະຖາບັນພອດສະຕຳ ເພື່ອການວິໄຈຜົນກະທົບພູມອາກາດຂອງເຢຍລະມັນລະບຸວ່າ ຫາກປູກພືດສຳລັບການຜະລິດເຊື້ອໄຟຊີວະພາບ ເຊິ່ງຫວັງວ່າຈະຊ່ວຍຫຼຸດປະລິມານຄາບອນລົງ ແລະ ຢຸດຕິພາວະໂລກຮ້ອນໄດ້ ຈະຕ້ອງປູກພືດເຊື້ອໄຟຊີວະພາບແທນພື້ນທີ່ປ່າຕາມທຳມະຊາດເຖິງ 1 ໃນ 3 ຂອງພປ່າທີ່ມີໃນປັດຈຸບັນ ແລະ ຕ້ອງປູກພືດເຊື້ອໄຟຊີວະພາບ 1 ໃນ 4 ຂອງພື້ນທີ່ກະສິກຳທີ່ມີຢູ່ໃນປັດຈຸບັນ ເຊິ່ງຈະເຮັດໃຫ້ໂລກຕ້ອງປະເຊີນໜ້າກັບວິກິດຄວາມໝັ້ນຄົງທາງອາຫານ.
ຜົນວິໄຈດັ່ງກ່າວຍັງສະຫຼຸບວ່າ ການຫຼຸດກການປ່ອຍກ໊າສຄາບອນຢ່າງສຸດຂີດ ແລະ ພັດທະນາເຕັກນິກການຈັດການຢ່າງມີປະສິດທິພາບຈະເປັນທາງອອກຂອງການຢຸດຕິພາວະໂລກຮ້ອນ ເຊິ່ງຈະຕ້ອງມີເຕັກນິກໃນການຫຼຸດການປ່ອຍກ໊າສຄາບອນໃນຂົງເຂດການກະສິກຳ, ຄົມມະນາຄົມ ແລະ ອຸດສາຫະກຳ ລວມເຖິງປ່ຽນໄປໃຊ້ພະລັງງານທາງເລືອກ ແລະ ພັດທະນາເຕັກໂນໂລຊີຂັ້ນສູງໃນການກັກເກັບກ໊າສຄາບອນເພື່ອບໍ່ໃຫ້ໂລກມີອຸນຫະພູມສູງຂຶ້ນເກີນ 2 ອົງສາຕາມເປົ້າໝາຍໃນປີ 2100.
ແຫລ່ງຂ່າວ : Voice TV