ສຳນັກຂ່າວຊິນຫົວລາຍງານວ່າ ເມື່ອ 2-3 ປີ ທີ່ຜ່ານມາ ທີ່ໂຮງຮຽນປະຖົມບ້ານຊານເໝິນຫຼີ່ ໃນເຂດຊົນນະບົດຂອງເມືອງ ກົງຈູ໋ຫຼິ່ງ ມົນທົນ ຈີ໋ຫຼິນ ເຫຼືອພຽງ “ຫວັງຮ່າວ” ນັກຮຽນຊັ້ນປະຖົມ ປ 5 ໄວອາຍຸ 12 ປີ ເປັນນັກຮຽນພຽງຄົນດຽວຂອງໂຮງຮຽນ ໂດຍມີ ຄູ ເສິນ ຫົງຢ້ຽນ ຄູປະຈຳຫ້ອງໄວອາຍຸ 41 ປີ ແລະ ຄູຫຼິວໄຫ່ເທົາ ຄູພາລະ ໄວອາຍຸ 41 ປີ, ໂຮງຮຽນນີ້ເມື່ອລວມກັນມີພຽງ 3 ຄົນ ຈິ່ງເຮັດໃຫ້ໂຮງຮຽນໄດ້ຮັບສາຍາວ່າເປັນ “ໂຮງຮຽນທີ່ເຫງົາທີ່ສຸດໃນປະເທດຈີນ” ຄູທັງສອງນອກຈາກຈະຊ່ວຍກັນສອນໜັງສືແລ້ວ ຍັງຊ່ວຍກັນເບິ່ງແຍງຄວາມຮຽບຮ້ອຍພາຍໃນໂຮງຮຽນອີກດ້ວຍ
ໝູ່ບ້ານຊານເໝິນຫຼີ່ ມີຄອບຄົວອາໃສຢູ່ 400 ຄອບຄົວ ມີປະຊາກອນ 1.000 ຄົນ ກ່ອນໜ້ານີ້ຫຼາຍປີເຄີຍມີນັກຮຽນ 200 ຄົນ ແລະ ມີຄູ 10 ຄົນ ນັບຕັ້ງແຕ່ປີ 2010ເປັນຕົ້ນມາ ຄູກໍ່ເລີ່ມກິນເບ້ຍບຳນານ ນັກຮຽນກໍເລີ່ມຍ້າຍໄປຮຽນໃນຕົວເມືອງ ຈົນເຫຼືອພຽງນັກຮຽນຄົນດຽວ
ຄູເສິນທີ່ສອນຢູ່ນີ້ດົນກວ່າ 18 ປີ ກ່າວວ່າ ເຖິງຈະມີນັກຮຽນພຽງຄົນດຽວກໍ່ຖືວ່າເປັນນັກຮຽນ ສະນັ້ນຈິ່ງບໍ່ສາມາດປ່ອຍປະໄດ້ ຈິ່ງຕ້ອງຕັ້ງໃຈສອນຢ່າງເຕັມທີ່ ຈິ່ງເຮັດໃຫ້ເຂົາບໍ່ຮູ້ສຶກຜິດກັບຕົນເອງ ແລະ ໜ້າທີ່ ເຖິງແມ່ນວ່າຄົນຮອບຂ້າງ ແລະ ຄອບຄົວຂອງເຂົາຈະບໍ່ເຂົ້າໃຈໃນສິ່ງທີ່ເຂົາເຮັດຢູ່ກໍ່ຕາມ ຄູເສິນຍັງກ່າວອີກວ່າ ຫຼັງຈາກເລີກຮຽນເຂົາຍັງມັກໄປຫຼິ້ນກັບນັກຮຽນເລື່ອຍໆ ເພາະຢ້ານນັກຮຽນຈະຮູ້ສຶກເຫງົາ
ເມື່ອຖືກຖາມວ່າ ໃນປີໜ້າທ້າວ ຫວັງຫ່າວກໍ່ຈະຈົບການສຶກສາຈາກໂຮງຮຽນແຫ່ງນີ້ແລ້ວ ແລະ ອາດເຮັດໃຫ້ໂຮງຮຽນຕ້ອງປິດລົງ ຄູເສິນກ່າວວ່າຕອນນີ້ກໍ່ຍັງຕ້ອງຕັ້ງໃຈສອນໃຫ້ດີທີ່ສຸດກ່ອນ ອານາຄົດຄ່ອຍວ່າກັນໃໝ່