ໃນວັນທີ 5 ກຸມພາ 2018 ສານອຸທອນແຫ່ງຫນຶ່ງຂອງເກົາຫຼີໃຕ້ ໄດ້ຍົກເລີກ ຄຳຕັດສິນລົງໂທດຈຳຄຸກ ຕໍ່ເສດຖີພັນລ້ານ ທີ່ເປັນທາຍາດຂອງບໍລິສັດ ຊຳຊຸງ ອີເລັກໂທຣນິກສ໌ ທ່ານ ອີ ແຈ-ຢອງ ແລະ ໄດ້ສັ່ງໃຫ້ປ່ອຍໂຕຜູ້ກ່ຽວອອກຈາກຄຸກ ໃນທັນທີ.
ສານນະຄອນຫຼວງໂຊລ ໄດ້ຕັດສິນລົງໂທດ ທ່ານ ອີ ແຈ-ຢອງ ອາຍຸ 49 ປີ ໃນເດືອນສິງຫາ 2017 ໃຫ້ຕິດຄຸກ 5 ປີ ຖືກຕັດສິນວ່າ ມີຄວາມຜິໃນຫຼາຍຂໍ້ຫາ ທັງຕິດສິນບົນ, ສໍ້ໂກງ, ຟອກເງິນ ແລະ ໃຫ້ການເທັດຕໍ່ລັດສະພາ ເຊິ່ງກ່ຽວຂ້ອງກັບຄະດີຄໍຣັບຊັ່ນທີ່ເຮັດໃຫ້ນາງ ພັກ ກິນເຮ ຫຼຸດຈາກອອກຕຳແໜ່ງປະທານາທິບໍດີເກົາຫຼີໃຕ້
ສານອຸທອນດັ່ງກ່າວ ໃນວັນຈັນ ໄດ້ຍົກເລີກ ຄຳຕັດສິນຂອງສານຫຼາຍປະການ ແລະ ໄດ້ຫລຸດຜ່ອນໂທດ ໂດຍໃຫ້ຝາກໂທດເປັນເວລາເຫຼືອຢູ່ 2 ປີ ເຄິ່ງເທົ່ານັ້ນ.
ສ່ວນຜູ້ບໍລິຫານຂອງບໍລິສັດ ຊຳຊຸງ ອີກສີ່ຄົນ ທີ່ສານໄດ້ພົບເຫັນວ່າມີຄວາມຜິດ ພ້ອມກັນກັບ ທ່ານ ອີ ແຈ-ຢອງ ກໍ່ໄດ້ຮັບການຫລຸດຜ່ອນໂທດຄືກັນ ໂດຍທີ່ສອງຄົນຜູ້ທີ່ໄດ້ຖືກຕັດສິນລົງໂທດຈຳຄຸກ ທີ່ຄ້າຍຄືກັນນັ້ນ ກໍ່ໄດ້ຮັບການຍົກເລີກໂທດຈຳຄຸກ.
ຄະດີນີ້ ໄດ້ສຸມໃສ່ເລື່ອງການຊຳລະເງິນ ຂອງບໍລິສັດຊຳຊຸງ ທີ່ໄດ້ຈ່າຍໃຫ້ແກ່ນາງຈອຍ ຊູນ ຊີລ ເພື່ອນລັບຂອງນາງ ປາຣກ ເຊິ່ງບັນດາໄອຍະການ ໄດ້ໂຕ້ຖຽງວ່າພວກເຂົາມີຈຸດປະສົງໃຫ້ສິນບົນ ເພື່ອຈະໄດ້ຮັບສິດທິພິເສດ ຈາກລັດຖະບານ.
ທ່ານ ອີີ ແຈ-ຢອງ ໃຫ້ການວ່າ ທ່ານບໍ່ມີຄວາມຜິດ ຕໍ່ຂໍ້ກ່າວຫາຕ່າງໆ ທີ່ວ່າ ທ່ານໃຊ້ທຶນຂອງບໍລິສັດຊຳຊຸງ ເພື່ອໃຫ້ສິນບົນແກ່ທ່ານນາງ ປາຣກ.
ບັນດາໄອຍະການທັງຫຼາຍພວມຊອກຫາຊ່ອງທາງທີ່ຈະຟ້ອງຮ້ອງ ທ່ານ ອີ ໃຫ້ຖືກໂທດຈຳຄຸກໄລຍະ 12 ປີ ຢູ່ທີ່ສານອຸທອນ. ຄຳຕັດສິນຂອງສານອຸທອນ ຄາດກັນວ່າ ຈະຖືກນຳຂຶ້ນໄປຫາສານສູງສຸດຂອງປະເທດ.