ສຳນັກຂ່າວລາວໂພດ ໄດ້ຮັບຂໍ້ຄວາມຈາກຜູ້ໃຊ້ໂທລະສັບທ່ານໜຶ່ງ ທີ່ບໍ່ປະສົງອອກນາມ ໄດ້ລາຍງານວ່າເບີໂທເລກງາມຂອງຕົນຖືກສູນໂທລະສັບ ຢູນິເທວ ຕັດ ເພື່ອເອົາເບີຄືນ ຍ້ອນບໍ່ໃຊ້ເບີດັ່ງກ່າວຕິດຕໍ່ກັນດົນ.
ລູກຄ້າຄົນດັ່ງກ່າວເລົ່າວ່າ ຕົນເອງໄດ້ຊື້ເບີງາມດັ່ງກ່າວ ເມືື່ອ 2 ປີກ່ອນ ດ້ວຍເງິນ 2,000,000 ກີບ ໂດຍໄດ້ມີການລົງທະບຽນຄັກແນ່ ແຕ່ຕໍ່ມາຕົນເອງບໍ່ມີໂອກາດໄດ້ໃຊ້ເບີດັ່ງກ່າວ ແຕ່ວ່າໄດ້ຕື່ມເງິນໄວ້ເປັນໄລຍະໆ ແລະຕໍ່ມາປະມານ 4-6 ເດືອນ ຕົນເອງພັດບໍ່ໄດ້ຕື່ມເງິນໄວ້ອີກ ເມື່ອມາລອງໂທເຂົ້າຈຶ່ງໄດ້ຮູ້ວ່າ ເບີດັ່ງກ່າວນັ້ນບໍ່ໄດ້ມີໃນລະບົບແລ້ວ (ຖືກຕັດແລ້ວ). ເມື່ອເປັນເຊັ່ນນັ້ນ ຈຶ່ງໄດ້ເຂົ້າໄປຫາສູນ ເພື່ອຂໍເປີດນໍາໃຊ້ຄືນ ໂດຍນຳເອົາຫຼັກຖານຄື ບັດປະຈຳຕົວ ແລະ ເບີໂທອອກຫຼ້າສຸດ ເຂົ້າແຈ້ງສູນ ແຕ່ວ່າຖືກເຈົ້າໜ້າທີ່ສູນບອກວ່າ ເບີດັ່ງກ່າວນັ້ນຖືກທາງສູນຕັດສັນຍານແທ້ ເນື່ອງຈາກເຈົ້າຂອງເບີບໍ່ໄດ້ໃຊ້ເປັນເວລາດົນຕິດຕໍ່ກັນ, ຖ້າຢາກໄດ້ອີກກໍສາມາດຊື້ຄືນໄດ້ ເພາະຕອນນີ້ເບີດັ່ງກ່າວຍັງຢູ່ໃນສູນ ບໍ່ທັນໄດ້ຂາຍອອກນອກເທື່ອ (ຍັງບໍ່ມີຄົນອື່ນໃຊ້ເທື່ອ) ແຕ່ວ່າລາຄາຊື້ຄືນ ແມ່ນ 4,000,000 ກີບ (ຕາມລາຄາປັດຈຸບັນ).
ລູກຄ້າຄົນດັ່ງກ່າວຕັ້ງຄຳຖາມວ່າ:
1. ໃນເມື່ອເບີດັ່ງກ່າວນັ້ນຖືກລົງທະບຽນແລະນຳໃຊ້ໂດຍບຸກຄົນໃດໜຶ່ງແລ້ວ ໂດຍມີຊື່ແລະນາມສະກຸນກຳກັບໄວ້ ພ້ອມທັງເຄີຍໃຊ້ມາແລ້ວ ມີຄົນຈື່ເບີນັ້ນວ່າເປັນເບີຂອງໃຜແລ້ວ, ເປັນຫຍັງຍັງຕ້ອງຕັດເອົາຄືນແລະຈະຂາຍຕໍ່ໃຫ້ຄົນອື່ນ ມັນຊິບໍ່ມີຊື່ທັບຊ້ອນກັນບໍ? ເຈົ້າຂອງເບີຄົນໃໝ່ຊິບໍ່ຖືກລົບກວນຈາກສາຍບຸກຄົນທີ່ຕົນບໍ່ຮູ້ຈັກໂທເຂົ້າຫາບໍ?
2. ໃນກໍລະນີທາງສູນໄດ້ອອກລະບຽບໄວ້ແລ້ວວ່າ ຖ້າບໍ່ໃຊ້ເປັນໄລຍະດົນເທົ່າໃດ ທາງສູນຈະຕັດສັນຍານເອົາເບີຄືນ, ເປັນຫຍັງທາງສູນບໍ່ແຈ້ງໃຫ້ລູກຄ້າຮູ້ຕັ້ງແຕ່ຕອນລູກຄ້າລົງທະບຽນຊື້ພຸ້ນ ແລະເປັນຫຍັງບໍ່ຂຽນເຕືອນໄວ້ກັບສິ່ງຫຸ້ມຫໍ່ຊິມເບີດັ່ງກ່າວໃຫ້ລູກຄ້າຮັບຮູ້ລ່ວງໜ້າ?. ໃນກໍລະນີບໍ່ໄດ້ແຈ້ງຫຼືເຕືອນໃຫ້ລູກຄ້າຮູ້ລ່ວງໜ້າ ແລ້ວມາຢຶດເບີຄືນແລະຈະຂາຍຕໍ່ແບບນີ້ຈະບໍ່ເປັນການລະເມີດສິດຂອງລູກຄ້າບໍ?.
3. ຂ້ອຍຄິດວ່າສິ່ງໃດທີ່ລູກຄ້າຊື້ໄປແລ້ວ ຈະໄດ້ໃຊ້ຫລືບໍ່ໄດ້ໃຊ້ສິ່ງນັ້ນກໍຍັງເປັນຂອງລູກຄ້າຄືເກົ່າຫລືບໍ່ແມ່ນ? ຕົວຢ່າງຂ້ອຍຊື້ລົດຄັນຫນຶ່ງມາ ແລ້ວບໍ່ໄດ້ຂີ່ 5 ປີ ລົດຄັນນັ້ນກໍຍັງເປັນລົດຂອງຂ້ອຍແມ່ນບໍ.
ຕໍ່ກໍລະນີດັ່ງກ່າວນັ້ນ, ສຳນັກຂ່າວລາວໂພດໄດ້ໂທຫາສູນບໍລິການເຄືອຂ່າວໂທລະຄົມທຸກເຄືອຂ່າຍເພື່ອສອບຖາມວ່າ: ໃນກໍລະນີລູກຄ້າບໍ່ໃຊ້ເບີດັ່ງກ່າວເປັນເວລາດົນ ແລ້ວທາງສູນຕັດສັນຍານ, ເມື່ອລູກຄ້າຢາກຈູນເບີຄືນຈະເຮັດໄດ້ບໍ? ກໍໄດ້ຄຳຕອບມາດັ່ງນີ້:
1. ເຄືອຂ່າຍ ຢູນິເທວ (ເບີຫຼັກ 9) ໃຫ້ຄຳຕອບວ່າ: ບໍ່ມີສິດຈູນເບີຄືນໄດ້ ມີແຕ່ຕ້ອງຊື້ເບີດັ່ງກ່າວຄືນໃໝ່ ຕາມລາຄາໃນປັດຈຸບັນ.
2. ເຄືອຂ່າຍ ອີທີແອວ (ເບີຫຼັກ 2) ໃຫ້ຄຳຕອບວ່າ: ຖ້າເຈົ້າຂອງເບີໄດ້ລົງທະບຽນໄວ້ແລ້ວ ແລະມີຂໍ້ມູນການລົງທະບຽນ ຖືກຕ້ອງຕາມບັດປະຊາຊົນ ຫຼື ສຳມະໂນຄົວທີ່ລົງທະບຽນໄວ້ ກໍສາມາດຈູນເອົາເບີຄືນໄດ້.
3. ເຄືອຂ່າຍ ເອັມໂຟນ (ເບີຫຼັກ 5) ໃຫ້ຄຳຕອບວ່າ: ບໍ່ມີສິດຈູນເບີຄືນໄດ້ ມີແຕ່ຕ້ອງລໍຖ້າຊື້ເບີດັ່ງກ່າວຄືນ ເມື່ອເພິ່ນຜະລິດຈຳໜ່າຍຮອບໃໝ່.
4. ເຄືອຂ່າຍ ບີລາຍ (ເບີຫຼັກ 7) ໃຫ້ຄຳຕອບວ່າ: ຖ້າເຈົ້າຂອງເບີໄດ້ລົງທະບຽນໄວ້ແລ້ວ ແລະມີຂໍ້ມູນການລົງທະບຽນ ຖືກຕ້ອງຕາມບັດປະຊາຊົນ ຫຼື ສຳມະໂນຄົວທີ່ລົງທະບຽນໄວ້ ກໍສາມາດຈູນເອົາເບີຄືນໄດ້.