ມື້ນີ້ຊາວເນັດລາວສຸດຊຶ້ງໃຈ ເມື່ອຜູ້ໃຊ້ເຟສບຸກ Kabkeo Inspire ເຊິ່ງເປັນນັກເວົ້າ ນັກຂຽນສ້າງແຮງບັນດານໃຈຊື່ດັງຜູ້ຫນຶ່ງຂອງລາວ ລົງປະກາດຫາອ້າຍທີ່ຈາກໄປດົນ ພ້ອມທັງເລົ່າເຖິງສະພາບຄອບຄົວກ່ອນອ້າຍຈະຫາຍໄປ ເຮັດໃຫ້ຜູ້ຕິດຕາມໄດ້ອ່ານແລ້ວຊຶ້ງໃຈ ຈົນຫລາຍຄົນກັ້ນນໍ້າຕາບໍ່ຢູ່.

ເນື້ອໃນປະກາດຂຽນວ່າ: ປະກາດຫາອ້າຍ ຈັນທະລາ ທຳມະວົງ ທີ່ໜີຈາກບ້ານເມື່ອ 15 ປີກ່ອນ

ຂ້າພະເຈົ້າ ກາບແກ້ວ ທຳມະວົງ ພ້ອມດ້ວຍພໍ່ແມ່ອ້າຍເອື້ອຍນ້ອງ ຂໍປະກາດຫາອ້າຍ ຈັນທະລາ ທຳມະວົງ ທີ່ໄດ້ໜີຈາກບ້ານໄປຕັ້ງແຕ່ປີ 2003, ຖ້າທ່ານໃດພົບເຫັນ ແລະ ແຈ້ງຂໍ້ມູນ ຂ້າພະເຈົ້າຈະຂໍຂອບໃຈຢ່າງສູງ. ສ່ວນຮູບຮ່າງໜ້າຕາແມ່ນຄືດັ່ງຮູບ, ມີປະຫວັດຫຍໍ້ດັ່ງນີ້:

 ປີ 1994-1995 ຮຽນກຽມໄປຕ່າງປະເທດ ແລະ ໄດ້ທຶນໄປຮຽນຕໍ່ດ້ານກະເສດທີ່ແຂວງກວາງຊີ ປະເທດຈີນ ແຕ່ຮຽນບໍ່ຈົບ ຈິ່ງຖືກສົ່ງກັບປະເທດລາວໃນປີ 1998.

 ເຂົ້າຮ່ວມແຂ່ງຂັນກີລາປິງປ່ອງ ແລະ ໄດ້ຫຼຽນທອງແດງໃນການແຂ່ງຂັນກີລາແຫ່ງຊາດ ປີ 2000 ທີ່ນະຄອນຫຼວງວຽງຈັນ

 ປີ 2000 ຮຽນຕໍ່ທີ່ໂຮງຮຽນເຕັກນິກລາວ ເຢຍລະມັນ (ຊ່າງຈອດ) ຫຼັງຈາກຈົບແລ້ວ ກໍໄປເຮັດວຽກທີ່ໂຮງງານຊີມັງວັງວຽງ (ຫຼັງທີ 2) ແລະ ໜີຈາກໂຮງງານໄປໃນປີ 2003 (ຈາກໄປແບບບໍ່ຮູ້ສາເຫດ, ທາງໂຮງງານບອກວ່າບໍ່ຮູ້ ແລະ ບໍ່ມີຊື່ນີ້ ຂ້າພະເຈົ້າຈິ່ງໄດ້ຂຶ້ນໄປເອົາເຄື່ອງ, ຮູບ ແລະ ຫຼຽນລາງວັນມາໄວ້ ແລະ ກໍໄປຊອກຫາຫຼາຍບ່ອນ ແຕ່ບໍ່ເຄີຍພົບ).

ສະນັ້ນ, ຖ້າບຸກຄົນໃດທີ່ມີໃຈເມດຕາ ຫາກໄດ້ພົບເຫັນອ້າຍຂອງຂ້າພະເຈົ້າ ຂໍຄວາມກະລຸນາແຈ້ງບອກຂ້າພະເຈົ້າດ້ວຍ ຕາມເບີໂທ 020 77075999 ຈະຂໍຂອບໃຈຢ່າງສູງ.

 ແຕ່ຖ້າຫາກວ່າອ້າຍ ຈັນທະລາ ທຳມະວົງ ໄດ້ອ່ານປະກາດນີ້ ກໍຂໍໃຫ້ກັບບ້ານເກີດເຖີດອ້າຍ, ຈົ່ງໃຫ້ອະໄພພໍ່ແມ່ພວກເຮົາ, ດຽວນີ້ພໍ່ແມ່ກໍບໍ່ໄດ້ຜິດຖຽງກັນຫຼາຍຄືດັ່ງເມື່ອກ່ອນແລ້ວ ແລະ ຊີວິດນ້ອງເອງກໍດີຂຶ້ນກວ່າແຕ່ກ່ອນ, ມີລົດຂີ່ມີເຮືອນຢູ່ເປັນຂອງຕົນເອງ ບໍ່ໄດ້ຢູ່ຫ້ອງເຊົ່າ ແລະ ຂີ່ລົດຖີບອີ່ຮ້າງຄືດັ່ງເມື່ອກ່ອນ, ຍ້ອນຄວາມຈົນມັນຄືຕົ້ນເຫດເຮັດໃຫ້ຄອບຄົວເຮົາມີບັນຫາ ແຕ່ປັດຈຸບັນນີ້ ນ້ອງຂໍຮັບປາກວ່າ ຈະຊ່ວຍເຫຼືອອ້າຍທຸກຢ່າງ ຂໍແຕ່ອ້າຍກັບມາ.

 ແຕ່ຖ້າອ້າຍບໍ່ກັບມາ ທາງຄອບຄົວພວກເຮົາຈະຕັ້ງກອງບຸນແຈກເຖິງອ້າຍໃນມື້ວັນເສົາທີ 3/2/2018 ທີ່ບ້ານເກີດ. ໃນມື້ນັ້ນ ຈະເຮັດອີກກອງບຸນໜຶ່ງເຖິງເອື້ອຍຜູ້ທີສາມຂອງພວກເຮົາ ທີ່ໄດ້ຈາກໂລກນີ້ໄປທີ່ປະເທດໄທຕັ້ງຫຼາຍປີແລ້ວ ພວກເຮົາບໍ່ຢາກເຮັດບຸນສອງກອງແຈກເຖິງເອື້ອຍອ້າຍສອງຄົນ ແຕ່ກໍບໍ່ມີທາງເລືອກ ຖ້າອ້າຍບໍ່ກັບມາ, ຈົ່ງກັບບ້ານເກີດເຖີດອ້າຍ.