ສື່​ເກົາ​ຫລີ​ລາຍ​ງານ​ວ່າ ​ເກີດ​ອຸບັດເຫດ​ທາງ​ລົດ​ໃຫຍ່​​ທີ່​ສາວໆ ວົງ Ladies’ Code ໂດຍ​ສານ​ມາ​ນຳກັນ​ຈົນ​ເຮັດໃຫ້​ສາວ “ອຶນ​ບີ” ເສັຍຊີວິດ​ລົງ​ຢ່າງ​ກະ​ທັນ​ຫັນ ສ່ວນ​ສະມາຊິກ​ອີກ 2 ຄົນ​ຂອງ​ວົງ​ຕ້ອງ​ເຂົ້າ​ຮັບ​ການ​ຜ່າ​ຕັດ ແລະ​ ອາການ​ຍັງ​ໜ້າ​ເປັນ​ຫ່ວງ

Polaris Entertainment ຕົ້ນ​ສັງ​ກັດ​ຂອງ Ladies’ Code ໄດ້​ຖະແຫລງ​ເປີດ​ເຜີຍ​ເຖິງ​ລາຍ​ລະອຽດ​ກ່ຽວກັບ​ອຸບັດເຫດ​ອັນ​ໜ້າ​ເສົ້າ​ທີ່ເກິດຂື້ນ​ກັບ​ສາວໆ ໃນ​ໄລຍະຕອນເຊົ້າ​​ເວລາ​ປະ​ມານ 1:30 ນ. ຂອງ​ວັນທີ່ 3 ກັນຍາທີ່ຜ່ານມາ  ທີ່​ລົດ​ໃຫ່ຍ​ທີ່​ພວກ​ນາງ​ໂດຍ​ສານ​ມາ​ໄດ້​ເກີດ​ເສຍ​ຫລັກ​ຈາກ​ຖະໜົນ​ທີ່​ປຽກ​ໄປ​ດ້ວຍ​ນ້ຳ​ຝົນ ຈົນ​ຕໍາ​​ເຂົ້າ​ກັບ​ຮົ້ວ​ກັ້ນ​ຫົນທາງ ລະຫວ່າງ​ທີ່​ພວກ​ນາງ​ກຳ​ລັງ​ເດີນທາງ​ຢູ່​ເທິງ​ທາງ​ດ່ວນ​ ສາຍ​ຍົງ​ດົງ ເພື່ອ​ເດີນທາງ​ມຸ້ງ​ໜ້າ​ສູ່​ ອິນ​ຊອນ ເຖິງ​ຂັ້ນ​ເຮັດໃຫ້​ມີ​ຜູ້​ເສັຍຊີວິດ​ໃນ​ເຫດການ 2 ຄົນ ຊຶ່ງ​ໜຶ່ງ​ໃນ​ນັ້ນ​ເປັນ​ສະມາຊິກ​ຂອງ Ladies’ Code ຢູ່ນໍາ

ຢ່າງໃດ​ກໍ​ຕາມ​ສາວ ອຶນ​ບີ ອາຍຸ 21 ປີ ໄດ້​ເສັຍຊີວິດ​ລົງ​ໃນ​ທີ່​ເກີດ​ເຫດ​ໄປ​ກ່ອນ​ໜ້າ​ນັ້ນ​ແລ້ວ ສ່ວນ  ໄລ​ ຫລື ຄວອນ​ລິ​ເຊ ແລະ ໂຊ​ຈອງ ຫລື ລີໂຊ​ຈອງ ທີ່​ໄດ້ຮັບ​ບາດ​ເຈັບ​ສາ​ຫັດ​ກໍ​ຖືກ​ນຳ​ໂຕເຂົ້າ​ຮັບ​ການ​ຜ່າ​ຕັດ​ດ່ວນ ແລະ​ ຈະ​ຖືກ​ສົ່ງ​ຕົວ​ໄປ​ທີ່​ໂຮງ​ໝໍ​ໃນ​ນະຄອນເຊອຸນ​​ຕໍ່ໄປ

Ladies’ Code ເປັນ​ກຸ່ມ​ສິລະປິນ​ສາວ​ທີ່​ປະກອບ​ໄປ​ດ້ວຍ​ສະມາຊິກ 5 ຄົນ ທີ່​ຫາກໍ່​ຈະ​ເປີດ​ຕົວ​ຢ່າງ​ເປັນ​ທາງ​ການ​ເມື່ອ​ປີ 2013 ທີ່​ຜ່ານມາ​ນີ້​ເອງ ຊຶ່ງ​ໃນ​ອຸບັດເຫດ​ອັນ​ໜ້າ​ເສົ້າ​ທີ່​ເກີດ​ກັບ​ພວກ​ນາງ​ເທື່ອ​ນີ້ ​ຍັງ​ເຮັດໃຫ້​ຜູ້​ຂັບ​ລົດ​ເສັຍຊີວິດ​ທັນ​ທີ​ໃນ​ເຫດການ​ ສ່ວນ​ຜູ້​ຈັດການ, ສະ​ໄຕ​ລິດ ແລະ ​ສະມາຊິກ​ທີ່​ເຫລືອ​ຂອງ Ladies’ Code ໄດ້ຮັບ​ບາດ​ເຈັບ​ເລັກນ້ອຍ