ເທສະການອາຫານລາວຄັ້ງທີ 12 ຈະຈັດຂຶ້ນທີ່ສວນເຈົ້າອານຸວົງໃນວັນທີ 24-27 ມັງກອນ 2017, ເຊິ່ງເປີດໃຫ້ເຂົ້າທ່ຽວຊົມຕັ້ງແຕ່ເວລາ 9 ໂມງເຊົ້າ ເຖິງ 5 ໂມງແລງທີ່ບໍລິເວນແຄມຂອງ, ຕໍ່ໜ້າວັນຈັນ. ຫົວຂໍ້ໃນການຈັດງານຄັ້ງນີ້ແມ່ນ ”ສຸດຍອດອາຫານລາວຕ້ອນຮັບປີທ່ອງທ່ຽວລາວ 2018“.
ເທສະການອາຫານລາວໄດ້ຖືກຈັດຂຶ້ນທຸກໆປີ ແລະ ໃນຄັ້ງນີ້ກໍໄດ້ມີການຈັດຂຶ້ນຢ່າງຍິ່ງໃຫຍ່ໂດຍການເປັນປະທານຂອງສະມາຄົມນັກທຸລະກິດຍິງລາວ ຮ່ວມກັບ ສະຫະພັນແມ່ຍິງນະຄອນຫຼວງວຽງຈັນ ແລະ ສູນກາງສະຫະພັນແມ່ຍິງລາວ.
ທ່ານນາງ ຈັນທະຈອນ ວົງໄຊ, ປະທານສະມາຄົມນັກທຸລະກິດຍິງລາວ ພ້ອມທັງເປັນປະທານຈັດງານເທສະການອາຫານລາວຄັ້ງນີ້ ໄດ້ກ່າວໃນງານຖະແຫຼງຂ່າວມີເນື້ອໃນໃຈຄວາມວ່າ: ເປົ້າໝາຍໃນການຈັດງານໃນຄັ້ງນີ້ກໍເພື່ອເປັນການສົ່ງເສີມຮີດຄອງປະເພນີ ແລະ ວັດທະນະທໍາອັນດີງາມຂອງຊາດລາວທາງດ້ານການປຸງແຕ່ງອາຫານ ທັງຍັງເປັນການສ້າງໂອກາດໃຫ້ຜູ້ປະກອບການຍິງດ້ານທຸລະກິດອາຫານຢູ່ແຕ່ລະທ້ອງຖິ່ນ ແຕ່ລະແຂວງ ໄດ້ເຂົ້າຮ່ວມວາງສະແດງ ແລະ ຂາຍຜະລິດຕະພັນຂອງຕົນ ສ້າງໂອກາດ ສ້າງລາຍຮັບໃຫ້ແມ່ຍິງໄດ້ສະແດງຄວາມສາມາດ, ແນວຄິດປະດິດສ້າງທາງດ້ານການສ້າງສັນອາຫານ ພ້ອມທັງແລກປ່ຽນບົດຮຽນ, ປະສົບການ, ຮູ້ຈັກປັບປຸງຜະລິດຕະພັນ ເພື່ອໃຫ້ສາມາດສະໜອງໄດ້ຕາມຄວາມຕ້ອງການຂອງຕະຫຼາດ ແລະ ເພື່ອເປັນການກະກຽມຄວາມພ້ອມໃນການເຊື່ອມໂຍງ ຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ຮູ້ຈັກອາຫານພື້ນເມືອງຈາກແຕ່ລະທ້ອງຖິ່ນອີກດ້ວຍ.
ງານເທສະການໃນປີນີ້ແມ່ນມີຮ້ານເຂົ້າຮ່ວມທັງໝົດ 178 ຮ້ານ, ໂດຍມີທັງຮ້ານອາຫານລາວ-ອາຫານຕ່າງປະເທດ, ແລະຍັງມີບັນດາຮ້ານເຄື່ອງດື່ມ, ສິນຄ້າຫັດຖະກຳ, ຄວາມງາມ, ຢາສະໝຸນໄພ ຕະຫຼອດຮອດຮ້ານເຄື່ອງປະດັບເຂົ້າຮ່ວມຢ່າງຟົດຟື້ນ. ນອກຈາກນັ້ນ, ທາງສະມາຄົມທຸລະກິດຍິງລາວຍັງໄດ້ມີການເຊີນບັນດາປະເທດອາຊຽນເຂົ້າມາຮ່ວມວາງສະແດງ ແລະ ຂາຍອາຫານ, ເຊິ່ງໄດ້ຖືກຕອບຮັບຈາກສາມປະເທດຄື: ກຳປູເຈຍ, ຟິລິບປິນ ແລະ ໄທ.
ນອກຈາກນັ້ນ, ໃນມື້ເປີດງານວັນທີ 24 ມັງກອນ, ກໍຈະການຈັດການແຂ່ງຂັນປຸງອາຫານທີ່ສູນລານິກ, ວິທະຍາໄລປາກປ່າສັກ ເຊິ່ງຫົວຂໍ້ໃນການແຂ່ງຂັນແມ່ນ ”ໝົກໄກ່ລາດ“. ຜູ້ຊະນະອັນດັບໜຶ່ງຈະໄດ້ຮັບລາງວັນເງິນສົດມູນຄ່າ 5 ລ້ານກີບ ແລະ ລຳດັບທີສອງແລະສາມຈະໄດ້ຮັບເງິນລາງວັນ 3 ລ້ານກີບ ແລະ 2 ລ້ານກີບຕາມລໍາດັບ.
ຜູ້ສະໜັບສະໜູນຫຼັກຂອງເທສະການຄັ້ງນີ້ໄດ້ແກ່: ບໍລິສັດ ເບຍລາວ, ກຸ່ມດາວເຮືອງ, ພະແນກສົ່ງເສີມທຸລະກິດຂະໜາດນ້ອຍ-ກາງ ແລະ ບໍລິສັດເຄພີ.
