ໃນວັນທີ 12 ມັງກອນ 2018 ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ I ໄດ້ສະເໜີພິຈາລະນາຍົກຍ້າຍ ແລະ ແຕ່ງຕັ້ງບຸກຄະລາກອນ ໃນກົງຈັກການປົກຄອງ ນະຄອນຫຼວງວຽງຈັນ ທັງນີ້, ກໍ່ເພື່ອເຮັດໃຫ້ການເຄື່ອນໄຫວວຽກງານຂອງອົງການປົກຄອງນະຄອນຫຼວງວຽງຈັນ ມີຄວາມສອດຄ່ອງ ແລະ ແທດເໝາະກັບຄວາມຕ້ອງການຂອງບຸກຄະລາກອນ ເພື່ອຮັບໃຊ້ໃຫ້ແກ່ພັດທະນານະຄອນຫຼວງວຽງຈັນໄລຍະໃໝ່.

ໃນນີ້, ໄດ້ມີການສະເໜີຍົກຍ້າຍ ແລະ ແຕ່ງຕັ້ງຫົວໜ້າພະແນກຈຳນວນໜຶ່ງ ເພື່ອໃຫ້ກອງປະຊຸມ ສະພາປະຊາຊົນ ນະຄອນຫຼວງວຽງຈັນ ໄດ້ພິຈາລະນາ ແລະ ຮັບຮອງເອົາ ເຊັ່ນ:

1. ແຕ່ງຕັ້ງ ທ່ານ ບຸນທາມ ພຸດທະວົງສາ ເຈົ້າເມືອງໆຫາດຊາຍຟອງ ເປັນຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ;

2. ແຕ່ງຕັ້ງ ທ່ານ ທະວີໄຊ ເໝົາຊົມພູ ຮອງເຈົ້າເມືອງໆໄຊເສດຖາ ເປັນຫົວໜ້າພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວງຈັນ.

ສຳລັບການແຕ່ງຕັ້ງປ່ຽນແທນເຈົ້າເມືອງຜູ້ທີ່ໄດ້ຮັບການຍົກຍ້າຍນັ້ນ ຄະນະປະຈຳສະພາປະຊາຊົນ ນະຄອນຫຼວງວຽງຈັນ ໄດ້ມີມະຕິຕົກລົງ ສະບັບເລກທີ 001/ຈ.ສພ.ນວ, ລົງວັນທີ 11 ມັງກອນ 2018 ຮັບຮອງແລ້ວ ເຊັ່ນ:

1. ຮັບຮອງເອົາ ທ່ານ ດາວເພັດ ດາລຸນ ເປັນເຈົ້າເມືອງໆສັງທອງ;

2. ຮັບຮອງເອົາ ທ່ານ ແກ່ນ ວໍລະສານ ເປັນວ່າການແທນເຈົ້າເມືອງໆຫາດຊາຍຟອງ.

ໃນທີ່ປະຊຸມໄດ້ເຫັນດີຮັບຮອງເອົາຕາມການສະເໜີຂອງອົງການປົກຄອງນະຄອນຫຼວງວຽງຈັນ ດ້ວຍຄະແນນສຽງສ່ວນຫຼາຍ.

ແຫລ່ງຂ່າວ: ຫນັງສືພິມ ເສດຖະກິດ ການຄ້າ.