ຫຼວງພະບາງຕິດໜຶ່ງໃນ 52 ສະຖານທີ່ທ່ອງທ່ຽວທີ່ໜ້າໄປທີ່ສຸດໃນໂລກ (52 Places to Go in 2018) ຂອງໜັງສືພິມນິວຢອກທາມ, ເຊິ່ງເປັນໜັງສືພິມທີ່ດັງທີ່ສຸດຂອງສະຫະລັດອາເມລິກາ. ຫຼວງພະບາງຕິດເປັນອັນດັບທີ 52, ຮອງຈາກເມືອງບຣິສໂທນ, ປະເທດອັງກິດ.

ຫຼວງພະບາງຖືວ່າແມ່ນເມືອງແຫ່ງຄວາມພາກພູມໃຈຂອງຄົນລາວ, ເຊິ່ງຖືກຍົກໃຫ້ເປັນເມືອງມໍລະດົກໂລກໂດຍອົງການຍູເນສໂກໃນປີ 1995. ອົງການຍູເນສໂກໄດ້ໃຫ້ຄໍານິຍາມຫຼວງພະບາງວ່າເປັນ ຕົວຢ່າງທີ່ໂດດເດັນໃນການປະສົມປະສານລະຫວ່າງສະຖາປັດຕະຍະກຳພື້ນເມືອງຂອງລາວ ກັບ ໂຄງສ້າງເມືອງຍຸກໃໝ່ ດ້ວຍຕືກອາຄານແບບຝຣັ່ງທີ່ສ້າງຕັ້ງໃນສະຕະວັດທີ 19 ແລະ 20. ຄວາມເປັນເອກະລັກຂອງເມືອງນີ້ໄດ້ສະແດງໃຫ້ເຫັນເຖິງການລວມກັນຢ່າງລົງຕົວລະຫວ່າງສອງວັດທະນະທຳທີ່ແຕກຕ່າງກັນ.

“ການທີ່ຫຼວງພະບາງຖືກຈັດເປັນສະຖານທີ່ທີ່ໜ້າໄປທີ່ສຸດໂດຍນິວຢອກທາມ ສະແດງໃຫ້ເຫັນເຖິງສັກກະຍະພາບທາງດ້ານການທ່ອງທ່ຽວໃນບ້ານເຮົາ. ຕອນນີ້,​ ເຮົາສາມາດເວົ້າໄດ້ວ່າຫຼວງພະບາງເປັນທີ່ຮູ້ຈັກໃນນາມຂອງຈຸດໝາຍປາຍທາງຂອງນັກທ່ອງທ່ຽວໃນໂລກ” ກ່າວໂດຍ ທ່ານ ເຈສັນ ໂຣແລນ, ຜູ້ຈັດການທົ່ວໄປຂອງບໍລິສັດທ່ອງທ່ຽວເອັກໂຊ (EXO Travel Laos), ໜຶ່ງໃນບໍລິສັດນໍາທ່ຽວທີ່ໃຫຍ່ທີ່ສຸດໃນລາວ.

ໜັງສືພິມນິວຢອກທາມໄດ້ຈັດອັນດັບສະຖານທີ່ທ່ອງທ່ຽວທີ່ໜ້າຈະໄປທຸກໆປີ, ການຕິດອັນດັບຄັ້ນີ້ແມ່ນການຕິດອັນດັບໃນຮອບຫຼາຍສິບປີຂອງລາວ. ຂ່າວທີ່ລາວເຮົາຕິດອັນດັບການທ່ອງທ່ຽວຈັດໂດຍນິວຢອກທາມແມ່ນຖືກຕີພິມຫຼັງຈາກທີ່ລາວເຮົາຕິດອັນດັບສະຖານທີ່ທ່ອງທ່ຽວທີ່ມາແຮງທີ່ສຸດໃນທະວີບອາຊີ (Where to go in 2018 – the hotlist) ເຊິ່ງຈັດອັນດັບໂດຍໜັງສືພິມເດິກາດຽນ (The Guardian) ພຽງແຕ່ບໍ່ເທົ່າໃດມື້.

ການທີ່ລາວເຮົາຕິດອັນດັບແຫຼ່ງທ່ອງທ່ຽວໃນໜັງສືພິມລະດັບໂລກສອງສະບັບນີ້ ແມ່ນເປັນໂອກາດອັນດີ, ຍິ່ງເມື່ອລາວເຮົາເປີດປີ 2018 ເປັນປີທ່ອງທ່ຽວລາວ ຈະຍິ່ງສາມາດດຶງດູດນັກທ່ອງທ່ຽວເຂົ້າມາຢ້ຽມຢາມເມືອງລາວເຮົາຫຼາຍຂື້ນ. ການເປີດປີທ່ອງທ່ຽວລາວ ແມ່ນເລີ່ມກຽນການຕັ້ງແຕ່ເດືອນຕຸລາ ປີ 2017 ທີ່ຜ່ານ, ເຊິ່ງບັນດານັກທ່ອງທ່ຽວຈະສາມາດມາທ່ຽວຊົມສະຖານທີ່ທ່ອງທ່ຽວທີ່ຫຼາກຫຼາຍບໍ່ວ່າຈະເປັນສະຖານທີ່ທ່ອງທ່ຽວທາງທຳມະຊາດ ແລະ ວັດທະນະທຳ, ແລະ ນັກທ່ອງທ່ຽວກໍສາມາດເຂົ້າຮ່ວມບຸນປະເພນີຕ່າງໆທີ່ຈັດຂຶ້ນໂດຍບັນດາຊົນເຜົ່າຕ່າງໆໃນແຕ່ລະແຂວງອີກດ້ວຍ.