ລົດເມຮັບສົ່ງຢູ່ສະໜາມບິນສາກົນວັດໄຕຈະເລີ່ມໃຫ້ບໍລິການ ຕັ້ງແຕ່ອາທິດໜ້າເປັນຕົ້ນໄປ, ສາຍສະໜາມບິນ-ຄິວລົດເມຕະຫຼາດເຊົ້າ. ລົດເມຈະອອກຈາກສະຖານີລົດເມຢູ່ຕະຫຼາດເຊົ້າທຸກໆ 40 ນາທີ ເລີ່ມບໍລິການຕັ້ງແຕ່ 9 ໂມງເຊົ້າຈົນເຖິງ 10 ໂມງແລງ, ປີ້ລົດເມຖ້ຽວດຽວລາຄາ 15,000 ກີບ.
“ປະຈຸບັນນີ້, ລົດຮັບສົ່ງສາທາລະນະທີ່ໃຫ້ບໍລິການຢູ່ສະໜາມບິນວັດໄຕມີພຽງລົດຕັກຊີເທົ່ານັ້ນ ເຊິ່ງຄິດຄ່າບໍລິການປະມານ 58,000 ກີບ ຈາກສະໜາມບິນຫາຕົວເມືອງ” ກ່າວໂດຍ ທ່ານ ສິດທິພົນ ຈັນທະວົງ, ຮອງຜູ້ອຳນວຍການ Vientiane City 2 Bus Service.
“ລົດເມສາຍນີ້ຈະຢຸດຮັບຜູ້ໂດຍສານຢູ່ 16 ຈຸດ, ຜ່ານທາງຫໍຄໍາ ແລະ ຕາມເສັ້ນທາງສຸພານຸວົງ” ກ່າວຕື່ມໂດຍທ່ານ ສິດທິພົນ.
ນອກຈາກນັ້ນ, ຜູ້ໂດຍສານຍັງສາມາດກວດສອບຕາຕະລາງເວລາການແລ່ນລົດເມ, ເສັ້ນທາງລົດເມ ແລະ ຍັງສາມາດເອີ້ນລົດຕັກຊີໄດ້ ຜ່ານທາງແອັບພລິເຄຊັນໃນມືຖືລະບົບແອນດຣອຍ ຂອງຜູ້ໂດຍສານເອງ.
ລົດເມ Vientiane City 2 Bus Service ເລີ່ມໃຫ້ບໍລິການຄັ້ງທຳອິດໃນເດືອນພະຈິກ 2017, ສາຍສູນການຄ້າໄອເຕັກ-ຕະຫຼາດເຊົ້າ. ລົດເມທັງໝົດ 34 ຄັນແມ່ນໄດ້ຮັບເປັນຂອງຂວັນຈາກສຳນັກງານປົກຄອງນະຄອນກຽວໂຕ ໂດຍຫວັງວ່າຈະຊ່ວຍໃຫ້ບັນຫາລົດຕິດໃນວຽງຈັນຫຼຸດໜ້ອຍລົງ.
ປ້າຍລົດເມ Vientiane City 2 Bus ແມ່ນໄດ້ຕັ້ງຢູ່ຕາມຈຸດຕ່າງໆໃນຕົວເມືອງ ເພື່ອປ້ອງກັນ ແລະ ຫຼີກລ່ຽງ ການເອີ້ນລົດເມບໍ່ກົງຕາມປ້າຍ ຈະຊ່ວຍໃຫ້ການສັນຈອນໃນທ້ອງຖະໜົນເປັນລະບຽບຫຼາຍຂື້ນ.
ຮູບພາຍຈາກ: Vientiane City 2 Bus Service