ເຈົ້າໜ້າທີ່ຈະລາຈອນ ນະຄອນຫຼວງວຽງຈັນ ໄດ້ຈັດກອງປະຊຸມແຜນວຽກສະກັດກັ້ນອຸບັດຕິເຫດໃນໄລຍະສົ່ງທ້າຍປີເກົ່າ 2017 ແລະ ຕ້ອນຮັບປີໃໝ່ສາກົນ 2018 ເຊິ່ງຈະໄດ້ລົງກວດທາດເຫຼົ້າຈັບຄວາມໄວ ແລະ ກວດກາຍານພາຫະນະຜູ້ຂັບຂີ່ຕາມຖະໜົນກວ່າ 12 ຈຸດ ໂດຍຈະເລີ່ມລົງມືປະຕິບັດໃນວັນທີ 25 ທັນວາ 2017 ຫາ 1 ມັງກອນ 2018 ທັງນີ້ ເພື່ອຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍ ພ້ອມທັງຫຼຸດຜ່ອນອຸບັດຕິເຫດທາງຖະໜົນ.
ທ່ານ ພັນໂທ ຢຸດຕະພົງ ສຸວັນນະສິງ ຫົວໜ້າພະແນກຈະລາຈອນນະຄອນ ຫຼວງວຽງຈັນ ໃຫ້ຮູ້ວ່າ: ເພື່ອເຮັດໃຫ້ງານສະເຫຼີມສະຫຼອງປີໃໝ່ສາກົນ ແລະ ທັງເປັນການຕ້ອນຮັບປີທ່ອງທ່ຽວລາວ 2018 ໄດ້ດຳເນີນໄປດ້ວຍບັນຍາກາດແຫ່ງຄວາມສະຫງົບ ແລະ ຄວາມປອດໄພ ຈຶ່ງໄດ້ສຸມໃສ່ວຽກງານໂຄສະນາເຜີຍແຜ່ ພ້ອມທັງແນະນຳໃຫ້ເຈົ້າໜ້າທີ່ເອົາໃຈໃສ່ປະຕິບັດໜ້າທີ່ຂອງຕົນຢ່າງເຂັ້ມງວດ ເຊິ່ງກຳລັງຈະລາຈອນຈະໄດ້ປ້ອງກັນຕາມຈຸດ-ຕາມປ້ອມ ເພື່ອຮັບປະກັນບໍ່ໃຫ້ມີການສັນຈອນແອອັດຢູ່ຕາມເສັ້ນທາງຕົວເມືອງ ໂດຍນຳໃຊ້ມາດຕະການບັງ ຄັບໃຊ້ກົດໝາຍ ເຊັ່ນ: ການຄວບຄຸມຄວາມໄວ ກວດທາດເຫຼົ້າ ແລະ ຕັ້ງຈຸດກວດກາ ເພື່ອກ່າວເຕືອນຜູ້ລະເມີດກົດຈະລາຈອນ.
ສະເພາະປີ 2017 ມາຮອດປັດຈຸບັນ ຢູ່ນະຄອນຫຼວງວຽງຈັນ ມີອຸບັດຕິເຫດເກີດຂຶ້ນຫຼາຍກວ່າ 1.500 ກໍລະນີ ມີຄົນເສຍຊີວິດ 251 ຄົນ ທຽບໃສ່ປີຜ່ານມາ ຈຳນວນອຸບັດຕິເຫດເພີ່ມຂຶ້ນ 37 ກໍລະນີ ສະເພາະມື້ສົ່ງທ້າຍປີເກົ່າ 2016 ແລະ ຕ້ອນຮັບປີໃໝ່ 2017 ຢູ່ນະຄອນຫຼວງວຽງຈັນ ມີອຸບັດຕິເຫດເກີດຂຶ້ນ 31 ກໍລະນີ ມີຜູ້ເສຍຊີວິດ 4 ຄົນ.
ສະນັ້ນ, ເພື່ອຮັບປະກັນໃຫ້ອຸບັດຕິເຫດຫຼຸດລົງໃນໄລຍະສົ່ງທ້າຍປີເກົ່າ 2017 ແລະ ຕ້ອນຮັບປີໃໝ່ສາກົນ 2018 ພະແນກຈະລາຈອນ ນະຄອນຫຼວງວຽງຈັນ ຈຶ່ງໄດ້ແຈກຢາຍອຸປະກອນກວດທາດເຫຼົ້າ 30 ເຄື່ອງ ເພື່ອໃຫ້ເຈົ້າໜ້າ ທີ່ແຕ່ລະເມືອງນຳໃຊ້ເຂົ້າໃນວຽກງານປ້ອງກັນອຸບັດຕິເຫດຢ່າງມີປະສິດທິຜົນ.
ແຫລ່ງຂ່າວ: ນສພ ວຽງຈັນໃໝ່.