ເວົ້າເລື່ອງຊີວິດຄູ່ ລະດູນີ້ ເປັນລະດູການທີ່ພວກຄົນໂສດ(ມາດົນ) ຮູ້ສຶກອຸກອັ່ງທັ່ງທວງຢ່າງແຮງ ເນື່ອງຈາກເປັນລະດູການທີ່ຕ້ອງການຄວາມອົບອຸ່ນທາງດ້ານຮ່າງກາຍ, ໃນຂະນະທີ່ສຽງເພງອວຍພອນຄູ່ບ່າວສາວດັງເຂົ້າຫູເກືອບທຸກມື້ ແຕ່ຮູ້ຫຼືບໍ່ວ່າຄູ່ຮັກຄູ່ຄອງທັງຫຼາຍເຫຼົ່ານັ້ນ ຕ້ອງມີປັດໄຈຫຍັງແດ່ ທີ່ຈະເຮັດໃຫ້ເຂົາເຈົ້າຄອງຄູ່ກັນໄປຈົນຮອດຍາມແກ່ເຖົ້າ. ດັ່ງນັ້ນ, ມື້ນີ້ ລິດຈະນາ ຈຶ່ງຂໍນຳສະເໜີີປັດໄຈທີ່ຈະເຮັດໃຫ້ຊີວິດຮັກມີຄວາມຍືນຍົງມາຝາກ.
1. ມັກ: ກ່ອນຄູ່ບ່າວສາວຈະຕັດສິນໃຈຄົບກັນ ສິ່ງທີ່ຕ້ອງມີແລະຂາດບໍ່ໄດ້ອັນທຳອິດຄື ຕ້ອງມັກກັນກ່ອນ. ມັກໃນທີ່ນີ້ໝາຍເຖິງ ມັກໃນຮູບຮ່າງໜ້າຕາ, ມັກໃນກິລິຍາ, ມັກການປະພຶດ, ມັກໃນວາດເວົ້າ, ວາດຍິ້ມ, ມັກໃນຄວາມອົບອຸ່ນຂອງຄອບຄົວຝ່າຍກົງກັນຂ້າມ ແລະອື່ນໆ
2. ຮັກ: ຂໍ້ນີ້ຈະເປັນຂໍ້ຕິດຕາມມາ ຖ້າມັກແລ້ວຈະມີການພົວພັນ ຈາກນັ້ນຈະເກີດຄວາມຮັກຂຶ້ນ ແລະເດັ່ນຂຶ້ນເລື້ອຍໆ ເໜືອຄວາມມັກ(ຂໍ້ 1), ຄວາມຮັກ ເຮັດໃຫ້ຢາກຖະໜຸຖະໜອມ, ເປັນຫ່ວງເປັນໃຍ, ຢາກຊ່ວຍເຫຼືອແບ່ງເບົາ, ຢາກໃຫ້ຄົນທີ່ຕົນເອງຮັກມີຄວາມສຸກ, ຢາກໃຫ້ຢູ່ໃນຄວາມດູແລເບິ່ງແຍງຂອງຕົນ ແຕ່ຕ້ອງລະວັງວ່າຄວາມຫຶງຫວງກໍເລິ່ມເກີດຂຶ້ນເຊັ່ນກັນ.
3. ອາຊີບ: ການຄອງຄູ່ຊີວິດຮັກ ຕ້ອງມີປັດໄຈສີ່ ຄື ອາຫານ, ເຄື່ອງນຸ່ງ, ທີ່ຢູ່ອາໄສ ແລະການປິ່ນປົວເວລາເຈັບເປັນ ເຊິ່ງປັດໄຈສີ່ນີ້ເປັນບັນຫາພື້ນຖານທີ່ຊີວິດຄົນຂາດບໍ່ໄດ້ໂດຍເດັດຂາດ. ນອກຈາກນີ້ແລ້ວ, ຍັງຕ້ອງມີສິ່ງອຳນວຍຄວາມສະດວກອື່ນໆ ເຊັ່ນ ເຄື່ອງໃຊ້ໃນເຮືອນ, ເຄື່ອງໃຊ້ປະຈຳຕົວ, ພາຫະນະ, ການທ່ອງທ່ຽວ… ແລະວຽກງານສັງຄົມອື່ນໆ ບັດເຊີນ, ແພ່ປັດໄຈ, ຊ່ວຍເຫຼືອສັງຄົມ ແລະອື່ນໆ. ດັ່ງນັ້ນ, ການມີອາຊີບທີ່ມີລາຍໄດ້ຢ່າງເປັນປະຈຳຈຶ່ງມີຄວາມສຳຄັນ ຖ້າບໍ່ມີອາຊີບຫາລາຍໄດ້ແລ້ວກໍຈະສາມາດເຮັດໃຫ້ຄອບຄົວບໍ່ອົບອຸ່ນ, ຜິດຖຽງກັນ, ມີຄວາມຂາດເຂີນ… ແລະສຸດທ້າຍຊີວິດຮັກຂາດສະບັ້ນລົງໄດ້. ການທີ່ຕ່າງຝ່າຍມີອາຊີບທີ່ດີຈຶ່ງເປັນສິ່ງສຳຄັນອັນໜຶ່ງ.
4. ເລື່ອງເທິງຕຽງ: ເລື່ອງນີ້ຕໍ່ໜ້າມວນຊົນສ່ວນຫຼາຍຈະເວົ້າວ່າບໍ່ສຳຄັນ ແຕ່ວ່າໃນຄວາມເປັນຈິງແລ້ວ ຖ້າຂາດເລື່ອງນີ້ໄປແລ້ວ ການຕັດສິນໃຈແຕ່ງງານນຳກັນກໍຄົງເປັນໄປໄດ້ຍາກ ຫຼືແຕ່ງໄປແລ້ວ ແຕ່ບໍ່ມີການຮ່ວມກິດຈະກຳທາງເພດນຳກັນແລ້ວ ຊີວິດຮັກກໍຄົງດຳເນີນໄປໄດ້ຍາກ. ແມ່ນແຕ່ຍາມຄົບຫາເບິ່ງໃຈກັນນັ້ນ ເມື່ອເຖິງເວລາອັນສົມຄວນເລື່ອງນີ້ກໍຄວນຈະເກີດຂຶ້ນຕາມທຳມະຊາດ. ຍຸກນີ້ແລ້ວ ຄົງບໍ່ມີສາວຄົນໃດຕັດສິນໃຈແຕ່ງງານກັບຜູ້ຊາຍທີ່ບໍ່ມີຄວາມຮູ້ສຶກທາງເພດໂດຍເດັດຂາດ.
5. ເຂົ້າໃຈແລະໃຫ້ອະໄພກັນ: ບັນຫາສຸດທ້າຍອັນນີ້ກໍສຳຄັນ ຖ້າມີຄົບທຸກຢ່າງແລ້ວ ແຕ່ຂາດເລື່ອງຄວາມເຂົ້າອົກເຂົ້າໃຈກັນ, ຂາດຄວາມເຊື່ອໝັ້ນກັນ ແຕ່ລະມື້ກໍຄົງມີແຕ່ການຜິດຖຽງກັນ. ການຢູ່ຮ່ວມກັນຕະຫຼອດຊີວິດ ເປັນໄປບໍ່ໄດ້ທີ່ຈະບໍ່ເກີດຄວາມຜິດພາດຂຶ້ນ ຄວາມເຂົ້າໃຈແລະໃຫ້ອະໄພກັນ ຈຶ່ງເປັນເລື່ອງທີ່ສຳຄັນແລະຂາດບໍ່ໄດ້.
ຜູ້ຂຽນກ້າກາລັນຕີໄດ້ເລີຍວ່າ ຖ້າຂາດສິ່ງໃດສິ່ງຫນຶ່ງດັ່ງກ່າວຂ້າງເທິງໄປກໍເຮັດໃຫ້ຊີວິດຮັກບໍ່ສົມບູນແບບແລະອາດຈະເຖິງຂັ້ນຊີວິດຮັກຂາດສະບັ້ນໄດ້. ຈົ່ງຮູ້ເອົາໄວ້ວ່າທຸກຢ່າງມັນສຳຄັນແລະຂາດບໍ່ໄດ້.
ລິດຈະນາ ງາມວິໄລ