ໃນວັນທີ 20 ພະຈິກ 2017 ເຈົ້າໜ້າທີ່ຕໍາຫຼວດພະເເນກສະກັດກັ້ນ ແລະ ຕ້ານຢາເສບຕິດ ປກສ ແຂວງຊຽງຂວາງ ແລະ ພາກສ່ວນທີ່ກ່ຽວຂ້ອງ ໄດ້ພົບເຫັນເປົ້າຫມາຍການຄ້າຂາຍຢາເສບຕິດ ຢູ່ເຂດບ້ານສີໂພນໄຊ, ເມືອງແປກ ເປັນສອງຜົວ-ເມຍ ຊື່ທ້າວ ເລົ່າວ່າ ອາຍຸ 29 ປີ ແລະ ນາງ ເຊ້ລໍ່ ອາຍຸ 35 ປີ ອາໄສຢູ່ບ້ານເເລ້ງ, ເມືອງແປກ, ແຂວງຊຽງຂວາງ ພ້ອມຂອງກາງຢາບ້າຈຳນວນ 3 ຖົງ ເທົ່າກັບ 600 ເມັດ. ຈື່ງໄດ້ນຳຕົວທັງສອງມາສອບສວນຂະຫຍາຍຜົນ ແລະ ກວດຄົ້ນພົບເຫັນຢາບ້າທີ່ຊຸກເຊື່ອງຢູ່ໃນເຮືອນຕື່ມອີກ 15 ຖົງ ແລະ 6 ເມັດ.
ຜ່ານການສືບສວນສອບສວນ ທັງສອງຜົວ-ເມຍ ໃຫ້ການສາລະພາບວ່າ: ຢາບ້າຈໍານວນ 3 ຖົງ ທີ່ເຈົ້າໜ້າທີ່ກວດພົບເຫັນນັ້ນເປັນຂອງພວກຕົນແທ້ ໄດ້ສັ່ງຊື້ນໍາບຸກຄົນທີ່ບໍ່ອອກນາມ ນັດສົ່ງຢູ່ສວນພູຄໍາ, ເມືອງແປກ, ແຂວງຊຽງຂວາງ. ພາຍຫຼັງການຊື້-ຂາຍໄດ້ສໍາເລັດພວກກ່ຽວພວມຈະກັບບ້ານ ກໍຖືກເຈົ້າໜ້າທີ່ປະສານງານເຂົ້າກັກຕົວພ້ອມຂອງກາງເປັນຢາບ້າ ຈໍານວນ 3 ຖົງ. ຫລັງຈາກນັ້ນ, ເຈົ້າໜ້າທີ່ໄດ້ຄຸມຕົວທັງສອງໄປກວດຄົ້ນເຮືອນ ພົບຂອງກາງຢາບ້າຕື່ມອີກ ຈຳນວນ 15 ຖົງ ກັບ 6 ເມັດ ລວມຢາບ້າທີ່ກວດພົບເຫັນທັງໝົດເປັນ ຈໍານວນ 18 ຖົງ ກັບ 6 ເມັດ ເຊີ່ງເທົ່າກັບຈຳນວນ 3.606 ເມັດ.
ຄະດີດັ່ງກ່າວແມ່ນຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່ ປກສ ແຂວງຊຽງຂວາງ ເພື່ອຂະຫຍາຍຜົນຫາກຸ່ມຄ້າຂາຍຢາເສບຕິດທີ່ເປັນບັນຫາສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ, ໃຫ້ຢາເສບຄິດຫຼຸດພົ້ນຈາກສັງຄົມ.
ແຫລ່ງຂ່າວ: ຫນັງສືພິມຄວາມສະຫງົບ