ນັກວິໄຈທີ່ສະຖາບັນວິທະຍາສາດ ແລະ ເທັກໂນໂລຢີແຫ່ງຊາດຂອງຍີ່ປຸ່ນ (AIST) ປະສົບຄວາມສຳເລັດໃນການເຮັດໃຫ້ໄກ່ອອກໄຂ່ທີ່ປະກອບດ້ວຍສານ “ອິນເຕີເຟີຣອນເບຕ້າ” ທີ່ສາມາດຮັກສາໂຣກມະເຮັງຜິວໜັງ ແລະ ໂຣກຕັບອັກເສບ

ອິນເຕີເຟີຣອນເບຕ້າ ເປັນໂປຣຕິນຊະນິດໜຶ່ງທີ່ຮ່າງກາຍສ້າງຂຶ້ນມາເພື່ອກຳຈັດເຊື້ອໂຣກໂດຍສະເພາະຢ່າງຍິ່ງເຊື້ອໄວຣັສປັດຈຸບັນມີການນຳເອົາອິນເຕີເຟີຣອນເບຕ້າມາໃຊ້ເປັນຢາເພື່ອຮັກສາໂຣກໄວຣັສຕັບອັກເສບບີ ແລະ ໂຣກໄວຣັສອັກເສບຕັບຊີຊະນິດຊ້ຳເຮື້ອ ເຊິ່ງຢາອິນເຕີເຟີຣອນມີຜົນທັງຂ້າໄວຣັສ ແລະ ຄວບຄຸມລະດັບພູມຄຸ້ມກັນຕ້ານທານໂຣກຂອງຜູ້ປ່ວຍ ແຕ່ເປັນຢາທີ່ມີລາຄາແພງ

ນັກວິໄຈໄດ້ເຮັດການດັດແປງພັນທຸກຳເຊລເລີ່ມຕັ້ງແຕ່ໃນສະເປີມຂອງໄກ່ໃຫ້ຜະລິດສານອິນເຕີເຟີຣອນເບຕ້າ ຈາກນັ້ນນຳເຊລທີ່ຜ່ານການດັດແປງພັນທຸກຳໃນໄຂ່ທີ່ເປັນລູກໄກໂຕຜູ້ ຫຼັງຈາກໄກ່ໂຕຜູ້ທີ່ໄດ້ດັດແປງພັນທຸກຳໄປປະສົມພັນກັບໄກ່ໂຕແມ່ ຜ່ານໄປ 2-3 ຮຸ່ນ ນັກວິໄຈພົບວ່າໃນໄຂ່ຂາວຂອງລູກໄກ່ມີສານອິນເຕີເຟີຣອນເບຕ້າຢູ່ນຳ ປັດຈຸບັນມີໄກ່ໂຕແມ່ 3 ໂຕ ທີ່ອອກໄຂ່ພິເສດນີ້ທຸກ 1-2 ວັນ

ໃນອານາຄົດທີມວິໄຈມີແຜນທີ່ຈະຜະລິດສານອິນເຕີເຟີຣອນເບຕ້າຈຳນວນລາຍສິບເຖິງໜຶ່ງຮ້ອຍມິລິກຣາມ ເຊິ່ງເຮັດໃຫ້ຕົ້ນທຶນການຜະລິດສານອິນເຕີເຟີຣອນເບຕ້າຫຼຸດລົງຢ່າງມະຫາສານ ແລະ ນັ້ນຄືຈຸດປະສົງຫຼັກຂອງໂຄງການວິໄຈນີ້.