ແຂວງສະຫວັນນະເຂດ ກວດພົບເຫັນພະນັກງານໃນຂະແໜງການເງິນ ເກັບລາຍຮັບບໍ່ມອບເຂົ້າງົບປະມານ ໂດຍເອົາເງິນໄປໃຊ້ສ່ວນຕົວໃນໄລຍະຜ່ານມາຈຳນວນ 5.8 ຕື້ກວ່າກີບ, ມີຜູ້ຮັບຜິດຊອບ 20 ຄົນ, ເກັບກູ້ຄືນໄດ້ 5.3 ຕື້ກວ່າກີບ, ຍັງຄ້າງ 50 ລ້ານກີບ ແລະ ຍັງບໍ່ມີຜູ້ຮັບຜິດຊອບ 410 ລ້ານກີບ ໂດຍຊັດທອດເຖິງພະນັກງານ 3 ຄົນ ແຕ່ພວກກ່ຽວປະຕິເສດ, ປະຈຸບັນພະແນກກວດກາລັດຍັງສືບຕໍ່ດຳ ເນີນການສືບສວນ-ສອບສວນ ຕາມຂັ້ນຕອນຂອງກົດໝາຍ.

    ທ່ານນາງ ບຸນເຍື້ອນ ທິດພຸດທະວົງ ປະທານກວດກາພັກ-ລັດ ແຂວງສະຫວັນນະເຂດ ກ່າວໃນກອງປະຊຸມເຊື່ອມຊຶມມະຕິເລກທີ 22/ຄບສພ ແລະ ສະຫຼຸບວຽກງານກວດກາທົ່ວແຂວງສະຫວັນນະເຂດປີ 2016 ໃນລະຫວ່າງວັນທີ 28-29 ມີນານີ້ ວ່າ: ໃນສົກປີຜ່ານມາ, ຄະນະກວດກາ ພັກ-ລັດແຂວງໄດ້ກວດກາເກັບກຳບັນຊີພາຫະນະນຳເຂົ້າບໍ່ຖືກຕ້ອງ ແລະ ການແຈ້ງເສຍພາສີ ປ່ຽນກຳມະສິດພາຫະນະທີ່ນຳເຂົ້າໃນລະບອບຍົກເວັ້ນ ແລະ ງົດເກັບພາສີທົ່ວແຂວງສະຫວັນນະເຂດປະເພດກະບະ, ເກັງ, ຈິບ ມີ ທັງໝົດ 1.296 ຄັນ, ມາຮອດວັນທີ 16 ມີນາ 2017 ແກ້ໄຂແລ້ວ 508 ຄັນ, ກວມ 39,20%, ເປັນເງິນ 17 ຕື້ກວ່າກີບ ແລະຍັງສືບຕໍ່ອີກຈຳນວນ 788 ຄັນ.

     ນອກນັ້ນ, ການກວດກາຈັດຕັ້ງປະຕິບັດຄຳສັ່ງ 15/ນຍ, ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມ ຄອງ ແລະ ກວດກາການຂຸດຄົ້ນໄມ້ ແລະ ທຸລະກິດໄມ້, ວຽກງານດັດສົມໂຮງງານປຸງແຕ່ງໄມ້ ແລະ ກວດກາບັນຊີໄມ້ສະໜາມ II, III ແມ່ນໄດ້ສຳເລັດ ລວມມີໄມ້ຄ້າງສະໜາມກວ່າ 58 ພັນແມັດກ້ອນ, ໄດ້ດຳເນີນການກວດກາ ຕາມຜົນການກວດສອບໃນການຊຳລະໜີ້ສິນດ້ວຍຮູບແບບມີສ່ວນຫຼຸດ 20%, 30% ແລະ ພັນທະບັດໃນໄລຍະຜ່ານມາທົ່ວແຂວງລວມ ມີ 5 ບໍລິສັດ, 9 ໂຄງການ, ມູນຄ່າຊຳລະຊ້ຳຊ້ອນ 2 ຕື້ກວ່າກີບ; ໃນນັ້ນ ກູ້ຄືນໄດ້ 4 ບໍລິສັດ, ເປັນເງິນ 4 ຕື້ກວ່າກີບ ແລະ ຍັງຄ້າງ 1 ບໍລິສັດ, ເປັນເງິນ 350 ລ້ານກີບ.

ທ່ານກ່າວຕື່ມວ່າ: ສະເພາະໃນຂະແໜງການເງິນ ໄດ້ກວດກາພົບເຫັນການເກັບລາຍຮັບບໍ່ມອບເຂົ້າງົບປະມານເອົາເງິນໄປໃຊ້ສ່ວນຕົວໃນໄລຍະຜ່ານມາຈຳນວນ 5.8 ຕື້ກວ່າກີບ, ມີຜູ້ຮັບຜິດຊອບ 20 ຄົນ, ເກັບກູ້ຄືນໄດ້ 5.3 ຕື້ກວ່າກີບ, ຍັງຄ້າງ 50 ລ້ານກີບ ແລະ ຍັງບໍ່ທັງມີຜູ້ຮັບຜິດຊອບ 410 ລ້ານກີບ ໂດຍຊັດທອດເຖິງພະນັກງານ 3 ຄົນ ແຕ່ພວກກ່ຽວປະຕິເສດ, ປະຈຸບັນພະແນກກວດກາລັດຍັງສືບຕໍ່ດຳເນີນການສືບສວນ-ສອບສວນຕາມຂັ້ນຕອນຂອງກົດໝາຍ. ນອກນີ້ ທາງດ້ານວຽກງານອື່ນໆກໍໄດ້ມີການຈັດຕັ້ງເຄື່ອນໄຫວ ແລະມີຜົນສຳເລັດໄດ້ຕາມລຳດັບ.