ໂຄງການປະກວດ Miss Universe Laos 2017 ເຊິ່ງເປັນຄັ້ງທຳອິດຂອງລາວ ນັບຕັ້ງແຕ່ເກີດມີຊາດລາວເປັນຕົ້ນມາ ໄດ້ດຳເນີນມາເຖິງມື້ປະກວດສຸດທ້າຍ ຄື ມື້ຄືນວັນທີ 26 ສິງຫາ 2017 ທີ່ຜ່ານມາ ທີ່ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ສະຫວັນຄອນ ຣາຊມົນຕຣີ ຮອງລັດຖະມົນຕີ ກະຊວງຖະແຫຼງຂ່າວແລະວັດທະນະທຳແລະທ່ອງທ່ຽວ, ທ່ານ ດຣ ຫົງຄຳ ສຸວັນນະວົງ ປະທານໂຄງການປະກວດ.
ຜົນການປະກວດອອກມາ ຖືກໃຈແຟນໆ ທີ່ກຳລັງຕິດຕາມແລະໃຫ້ກຳລັງໃຈມາຕະຫຼອດ ຄື: ຜູ້ຊະນະເລີດອັນດັບ 1 ໄດ້ເປັນ Miss Universe Laos 2017 ກໍຄືໄດ້ເປັນຄົນທຳອິດຂອງລາວທີ່ໄດ້ສວມມຸງກຸດນີ້ ໄດ້ແກ່ນາງ ນຸ້ຍ ສຸພາພອນ ສົມວິຈິດ
ແລະນອກຈາກນັ້ນ ຜູ້ທີ່ໄດ້ຮັບຕຳແໜ່ງຮອງລົງມາມີຄື:
ຮອງຊະນະເລີດອັນດັບ 1 ໄດ້ແກ່ ນາງ ອອນອະນົງ ຫອມສົມບັດ
ຮອງຊະນະເລີດອັນດັບ 2 ໄດ້ແກ່ ນາງ ວາລິດສະລາ ຕັ້ງສຸວັນ
ຮອງຊະນະເລີດອັນດັບ 3 ໄດ້ແກ່ ນາງ ສຸກສະຫວັນ ຫຼວງລາດ
ຮອງຊະນະເລີດອັນດັບ 4 ໄດ້ແກ່ ນາງ ເມລິສາ ສີດາຈັນ
ໂຄງການປະກວດດັ່ງກ່າວນີ້ຖືວ່າໄດ້ຮັບຄວາມນິຍົມແລະໃຫ້ຄວາມສົນໃຈຈາກມວນຊົນຢ່າງຫຼວງຫຼາຍ ແລະກໍຍັງເປັນເຫດການທີ່ສຳຄັນທາງດ້ານສິລະປະວັດທະນະທຳລາວ ເນື່ອງຈາກວ່າ ໃນໄລຍະຫຼາຍປີທີ່ຜ່ານມາ ປະເທດລາວບໍ່ໄດ້ມີໂຄງການປະກວດດັ່ງກ່າວນີ້ ດ້ວຍເຫດຜົນຫຼາຍປະການ ໂດຍສະເພາະແມ່ນຮູບແບບການແຕ່ງໂຕຂອງນ້ອງນາງສາວເທິງເວທີປະກວດ ແມ່ນມີຫຼາຍຮູບແບບ ທັງແບບສຸພາບ ແລະນຸ່ງໜ້ອຍຫົ່ມໜ້ອຍ ເຊິ່ງການແຕ່ງໂຕທີ່ນຸ່ງໜ້ອຍຫົ່ມນ້ອຍນີ້ເອງ ເປັນເລື່ອງທີ່ຂ້ອນຂ້າງອ່ອນໄຫວສຳລັບສັງຄົມລາວແລະວັດທະນະທຳລາວ.
ການຕັດສິນໃຈດຳເນີນໂຄງການດັ່ງກ່າວ ໃນປີ 2017 ນີ້ເປັນປີທຳອິດ ເປັນສິ່ງທີ່ສະທ້ອນໃຫ້ເຫັນວ່າ ສັງຄົມລາວແລະວັດທະນະທຳລາວ ພວມເປີດກວ້າງອອກສູ່ສາກົນຫຼາຍຂຶ້ນ ແລະຫວັງວ່ານາງສາວຈາກປະເທດລາວ ຈະສາມາດໄປສ້າງຊື່ສຽງໃຫ້ແກ່ປະເທດໃນລະດັບສາກົນໄດ້.
