ຂປລ. ໃນວັນທີ 4 ສິງຫາ ທີ່ຫ້ອງປະຊຸມໃຫຍ່ ອົງການກວດສອບແຫ່ງລັດ ໄດ້ຈັດຕັ້ງພິທີສະເຫລີມສະຫລອງ ອົງການກວດສອບແຫ່ງລັດ ຄົບຮອບ19 ປີ (ວັນທີ 5 ສິງຫາ 1998-5 ສິງຫາ 2017), ໂດຍເປັນກຽດເຂົ້າຮ່ວມຂອງ ທ່ານ ພົນໂທ ແສງນວນ ໄຊຍະລາດ ຄະນະເລຂາທິການ ສູນກາງພັກ, ຮອງປະທານສະພາແຫ່ງຊາດ, ເຂົ້າຮ່ວມເປັນຄະນະປະທານໃນຄັ້ງນີ້ ມີ ທ່ານ ນາງ ວຽງທອງ ສີພັນດອນ ກຳມະການສູນກາງພັກ ເລຂາຄະນະພັກ, ປະທານອົງການກວດສອບແຫ່ງລັດ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ພິທີດັ່ງກ່າວ, ໄດ້ຮັບຟັງການຫວນຄືນປະຫວັດການກຳເນີດ ແລະ ຄວາມເຕີບໃຫຍ່ຂະຫຍາຍຕົວ ຂອງອົງການກວດສອບແຫ່ງລັດ ຄົບຮອບ 19ປີ, ຊຶ່ງອົງການກວດສອບແຫ່ງລັດ ປະຕິບັດໜ້າທີ່ ກວດສອບງົບປະມານແຫ່ງລັດ ຂອງບັນດາກະຊວງ, ອົງການ, ແຂວງ, ນະຄອນຫລວງ, ຫົວໜ່ວຍທຸລະກິດລັດ, ທະນາຄານແຫ່ງລັດ, ທະນາຄານທຸລະກິດລັດ, ຫົວໜ່ວຍທີ່ບໍ່ ສະແຫວງຫາຜົນກຳໄລ, ໂຄງການເງິນກູ້ຢືມ ແລະ ຊ່ວຍເຫລືອຈາກຕ່າງປະເທດ. ວຽກງານກວດສອບແຫ່ງລັດ ໄດ້ມີການຂະຫຍາຍຕົວ ທາງດ້ານປະລິມານ ແລະ ຄຸນນະພາບ, ໄດ້ຂະຫຍາຍກວ້າງ ແລະ ເພີ່ມຈຳນວນເປົ້າໝາຍ ກວດສອບຂຶ້ນໃນທຸກໆປີ, ເນື້ອໃນການກວດສອບໄດ້ມີການພັດທະນາຮູບແບບ, ວິທີການ, ບໍລິມາດໜ້າວຽກ ແລະ ການລົງເລິກການກວດສອບ, ຊຶ່ງສາມາດສັງລວມ ການດຳເນີນການເຄື່ອນໄຫວ ການກວດສອບໄດ້ທັງໝົດ 612 ເທື່ອ, ໃນນັ້ນກວດສອບບົດສະຫລຸບ ຂາດຕົວການຈັດຕັ້ງປະຕິບັດ ແຜນງົບປະມານແຫ່ງລັດ ຢູ່ບັນດາກະຊວງ, ອົງການ, ບັນດາແຂວງ ແລະ ນະຄອນຫລວງຈຳ ນວນ 383 ເທື່ອ, ກວດສອບທະນາຄານຈຳນວນ 25 ເທື່ອ, ກວດສອບວິສາຫະກິດຈຳນວນ 72 ເທື່ອ, ກວດສອບໂຄງການ ເງິນກູ້ຢືມ ແລະ ຊ່ວຍເຫລືອ ຈາກຕ່າງປະເທດໄດ້ຈຳນວນ 113 ເທື່ອ, ກວດສອບສ້າງຄວາມເຂັ້ມແຂງ ລວມມີກວດສອບກອງທຶນສາກົນ ເພື່ອການພັດທະນາ 6 ເປົ້າໝາຍ, ເຂົ້າຮ່ວມ ໃນຄະນະກຳມະການກວດສອບງົບປະມານ ກອງເລຂາອາຊຽນ ຈຳນວນ 6 ເປົ້າໝາຍເຂົ້າຮ່ວມກວດສອບແລກປ່ຽນບົດຮຽນ ຢູ່ອົງການກວດສອບແຫ່ງລັດ ສສ ຫວຽດນາມ ຈຳນວນ 7 ເປົ້າໝາຍ. ໃນການພົວພັນ ແລະ ຮ່ວມມືກັບສາກົນ ອົງການກວດສອບແຫ່ງລັດ ເປັນສະມາຊິກຂອງສະຖາບັນກວດສອບສູງສຸດ ສາກົນ (INTOSAI), ສະຖາບັນກວດສອບສູງສຸດອາຊີ ASSOSAI, ເປັນ ສະມາຊິກຂອງສະຖາບັນກວດສອບສູງສຸດ ອາຊີຕາເວັນອອກສຽງໃຕ້ ASEANSAI ຊຶ່ງໃນເດືອນພະຈິກ 2017 ຈະມາເຖິງນີ້ ອົງການກວດສອບແຫ່ງລັດ ຈະເປັນເຈົ້າພາບ (ASEANSAI) ຈັດກອງປະຊຸມວຽກງານກວດສອບອາຊຽນ.
ໃນກອງປະຊຸມທີ່ມີຄວາມໝາຍຄວາມສຳຄັນນີ້, ທ່ານ ພົນໂທ ແສງນວນ ໄຊຍະລາດ ໄດ້ໃຫ້ທິດຊີ້ນຳແຕ່ລະດ້ານ ເປັນຕົ້ນເອົາໃຈໃສ່ວຽກງານ ສຶກສາອົບຮົມແນວຄິດການເມືອງ ໃຫ້ພະນັກງານສ້າງ ຄວາມໜັກແໜ້ນ, ມີຄວາມເປັນເອກະພາບ, ສາມັກຄີຮັກແພງຊ່ວຍເຫລືອ ແລະ ເຊື່ອໝັ້ນ ຊຶ່ງກັນ ແລະ ກັນ ຕັ້ງໜ້າສືບຕໍ່ປັບປຸງອົງຄະນະພັກ ອົງການກວດສອບແຫ່ງລັດ ໃຫ້ມີຄວາມປອດໃສ, ໜັກແໜ້ນເຂັ້ມແຂງ ແລະ ປັບປຸງກົງຈັກການຈັດຕັ້ງ, ສ້າງ ແລະ ປັບປຸງ ນິຕິກຳລຸ່ມກົດໝາຍ, ປະຕິບັດ ວຽກງານວິຊາສະເພາະ ກວດສອບຕາມກົດໝາຍ ແລະ ລະບຽບການ ທີ່ກ່ຽວຂ້ອງ, ສ້າງທັດສະນະຂອງພະນັກງານ-ນັກກວດສອບ ໃຫ້ມີຈັນຍາບັນທີ່ຖືກຕ້ອງ ແລະ ປະຕິບັດຫລັກການເຄື່ອນໄຫວ ຕາມມາດຕະຖານການກວດສອບແຫ່ງລັດ, ຖືສຳຄັນວຽກງານ ການປະ ສານສົມທົບ ກັບສະພາແຫ່ງຊາດ, ກົງຈັກທີ່ຄຸ້ມຄອງງົບປະມານແຫ່ງລັດ ແລະ ຄົ້ນຄວ້າກົນໄກ ການແກ້ໄຂການລະເມີດວິໄນ ແຜນການ-ການເງິນ ໃຫ້ມີຄວາມສັກສິດກວ່າເກົ່າ.
ແຫລ່ງຂ່າວ: ຂປລ