ສຳນັກຂ່າວຕ່າງປະເທດ ລາຍງານໃນວັນທີ 14 ກໍລະກົດນີ້ວ່າ ທາງການຈີນໄດ້ສົ່ງມອບການຊ່ວຍເຫລືອລົດເມໂດຍສານ ຈຳນວນ 100 ຄັນ ໃຫ້ແກ່ກຳປູເຈຍ ເພື່ອນຳໄປໃຊ້ເຂົ້າໃນການຂະຫຍາຍ ລະບົບຂົນສົ່ງໂດຍສານມວນຊົນ ພາຍໃນນະຄອນຫລວງພະນົມເປັນ ຊຶ່ງມີປະຊາກອນປະມານ 2.5 ລ້ານຄົນ, ແຕ່ຍັງມີສະພາບການສັນຈອນແອອັດ ອີງຕາມສະຖິຕິປັດຈຸບັນ ທົ່ວນະຄອນຫລວງຂອງກຳປູເຈຍ ມີລົດຈັກປະມານ 1.5 ລ້ານຄັນ ແລະ ລົດໃຫຍ່ອີກປະມານ 30,000 ຄັນ.
ເຈົ້າຄອງນະຄອນຫລວງພະນົມເປັນ ໄດ້ກ່າວໃນພິທີມອບຮັບລົດດັ່ງກ່າວວ່າ ການບໍລິຈາກຂອງຈີນໃນຄັ້ງນີ້ ສະທ້ອນໃຫ້ເຫັນເຖິງຄວາມສຳພັນໃກ້ຊິດລະຫວ່າງສອງປະເທດ ແລະ ຈະຊ່ວຍແກ້ໄຂບັນຫາການສັນຈອນແອອັດ ຕະຫລອດຮອດມົນລະພິດທາງອາກາດ ພ້ອມທັງຊ່ວຍຫລຸດຜ່ອນຄ່າໃຊ້ຈ່າຍໃນການເດີນທາງ ຂອງປະຊາຊົນຜູ້ມີລາຍໄດ້ຕ່ຳອີກດ້ວຍ.
