ຂປລ. ໃນໂອກາດເຂົ້າຢ້ຽມຄຳນັບ ທ່ານ ສົມກົດ ມັງໜໍ່ເມກ ເຈົ້າແຂວງໆຊຽງຂວາງ ພ້ອມດ້ວຍຄະນະ ໃນວັນທີ 11 ກໍລະກົດ 2017 ນີ້, ທ່ານ ຣອດຄໍເບັດ(Ross Corbett) ຊ່ຽວຊານ ໂຄງການທ່ອງທ່ຽວນີວຊີແລນ–ລາວ ໄດ້ເຫັນດີທີ່ຈະສືບຕໍ່ຊ່ວຍເຫລືອດ້ານການທ່ອງທ່ຽວ ແລະ ຫໍພິພິທະພັນ ຢູ່ແຂວງຊຽງຂວາງ ຈົນເຖິງເດືອນພຶດສະພາ ປີ 2020. ພ້ອມທັງຈະຄົ້ນຄວ້າ ຊ່ວຍເຫລືອດ້ານບຸກຄະລາກອນ ໂດຍການຈັດຝຶກອົບຮົມ ເພື່ອເຮັດໃຫ້ຫໍພິພິດຕະພັນ ແລະ ການທ່ອງທ່ຽວ ສາມາດກຸ້ມຕົນເອງແບບຍືນຍົງ.
ໂອກາດນີ້, ທ່ານເຈົ້າແຂວງຊຽງຂວາງ ໄດ້ໃຫ້ຮູ້ວ່າ: ໃນໄລຍະຜ່ານມາ ນີວຊີແລ ໄດ້ໃຫ້ການຊ່ວຍເຫລືອ ໃນຂົງເຂດວຽກງານເກັບກູ້ ແລະ ທຳລາຍລະເບີດທີ່ຕົກຄ້າງຢູ່ແຂວງຊຽງຂວາງ, ດ້ານສັດຕະວະແພດ, ການທ່ອງທ່ຽວ ແລະ ຫໍພິພິດຕະພັນ ລວມເປັນເງິນ 11 ລ້ານໂດລາສະຫະລັດ.
ແຫລ່ງຂ່າວ: ຂປລ