ໃນວັນທີ 10 ມັງກອນ 2017 ຜ່ານມານີ້ ທີ່ພະແນກອຸດສະຫະກໍາ ແລະ ການຄ້ານະຄອນຫລວງວຽງຈັນ ເຈົ້າໜ້າທີ່ ໄດ້ນໍາເອົາສິນຄ້າປະເພດເຄື່ອງໃນສັດ ປະກອບມີ: ຕັບ, ປອດ ແລະ ໄສ້ງົວ, ຄວາຍ ແລະ ໝູ ລວມມີນໍ້າໜັກຫລາຍກວ່າ 1.230 ກິໂລ, ເປັນມູນຄ່າປະມານ 36 ລ້ານກີບ ທີ່ນຳເຂົ້າບໍ່ຖືກຕ້ອງຈາກປະເທດໃກ້ຄຽງ ໄປທໍາລາຍຖິ້ມຢູ່ສະໜາມຂີ້ເຫຍື້ອຫລັກ 32 ເມືອງໄຊທານີ, ນະຄອນຫລວງວຽງຈັນ, ເຊິ່ງເຄື່ອງໃນສັດດັ່ງກ່າວ ແມ່ນເຈົ້າໜ້າທີ່ພົບເຫັນ ໃນລະຫວ່າງການລົງຕິດຕາມກວດກາສິນຄ້າ ທີ່ມີການລັກລອບນໍ້າເຂົ້າບໍ່ຖືກຕ້ອງຕາມລະບຽບຫລັກການ ຢູ່ຕາມທ້ອງຕະຫລາດຫລາຍແຫ່ງ ໃນນະຄອນຫລວງວຽງຈັນ ເມື່ອຕົ້ນເດືອນມັງກອນມານີ້.

ສຳລັບຊາວຄ້າຂາຍຜູ້ກະທຳຜິດ ແມ່ນເຈົ້າໜ້າທີ່ໄດ້ທໍາການສຶກສາອົບຮົມ ກ່າວເຕືອນພ້ອມທັງເຮັດບົດບັນທຶກ ແລະ ປັບໄໝຕາມລະບຽບການ ເພື່ອບໍ່ໃຫ້ກະທຳຜິດອີກ, ພ້ອມຮຽກຮ້ອງມາຍັງຜູ້ເປັນເຈົ້າຂອງຕະຫຼາດ, ກໍຄືຄະນະຈັດສັນຕະຫຼາດ ຈົ່ງເພີ່ມທະວີຄວາມເອົາໃຈໃສ່ໃນການຕິດຕາມກວດກາສິນຄ້າທຸກປະເພດທີ່ນຳເຂົ້າມາຈໍາໜ່າຍ ຢູ່ໃນຕະຫຼາດຂອງຕົນ ໃຫ້ຖືກຕ້ອງຕາມລະບຽບຫລັກການ ເພື່ອຮັບປະກັນຄວາມສະອາດ ແລະ ປອດໄພຂອງຜູ້ບໍລິໂພກ.

ຂ່າວ: ໜັງສືພິມ ລາວພັດທະນາ