ສຳນັກຂ່າວຕ່າງປະເທດລາຍງານເມື່ອວັນທີ 9 ມັງກອນ 2017 ນີ້ວ່າ ຊາຍໜຸ່ມຄົນບັງກາລາເທດ ທີ່ໄດ້ຮັບສາຍາວ່າ “ມະນຸດຕົ້ນໄມ້” ຫຼ້າສຸດໝໍຊ່ວຍຜ່າຕັດເອົາສິ່ງແປກປະຫຼາດ ທີ່ມີນໍ້າໜັກເຖິງ 5 ກິໂລກຣາມ ອອກຈາກມືຂອງລາວໄດ້ສຳເລັດ ເຊິ່ງຕ້ອງໃຊ້ທີມແພດຜູ້ຊ່ຽວຊານ ແລະການຜ່າຕັດຫຼາຍຄັ້ງ
ອັບດຸລ ບາຈັນດາ ຄົນບັງກາລາເທດ ທີ່ຖືກຂະໜານນາມວ່າ “ມະນຸດຕົ້ນໄມ້” ຫຼັງຈາກທີ່ສ້າງຄວາມຮືຮາໄປທົ່ວໂລກ ເພາະໃນບໍລິເວນມື ແລະຕີນຂອງລາວ ມີສິ່ງແປກປະຫຼາດອອກມາ ຄືກັບຮາກໄມ້ທີ່ມີນໍ້າໜັກປະມານ 5 ກິໂລກຣາມ ເຮັດໃຫ້ລາວບໍ່ສາມາດໃຊ້ມື ແລະຕີນໃນຊີວິດປະຈຳວັນໄດ້, ລາວຈຶ່ງກາຍເປັນຕົວປະຫຼາດໃນສາຍຕາຄົນອື່ນ
ຫຼັງຈາກທີ່ທີມແພດໄດ້ກວດສອບ ແລະຄົ້ນຫາທາງຊ່ວຍເຫຼືອຊາຍຄົນດັ່ງກ່າວ ຜົນການວິນິດໄສພະຍາດພົບວ່າ ຊາຍຄົນນີ້ເປັນພະຍາດຕິດເຊື້ອເອຊພີວີ ທີ່ຢູ່ໃນກຸ່ມການຕິດເຊື້ອພະຍາດ Epidermodysplasia verruciformis ຫຼື EV ເປັນພະຍາດຜິວໜັງຜິດປົກກະຕິທາງກໍາມະພັນ ທີ່ພົບໄດ້ໜ້ອຍທີ່ສຸດ ຫາກປະໄວ້ອາດລາມໄປເປັນພະຍາດມະເຮັງຜິວໜັງໄດ້
ທີມແພດໝໍ ຂອງໂຮງໝໍມະຫາວິທະຍາໄລການແພດນະຄອນຫຼວງທາກາ ໄດ້ຮັບລາວເຂົ້າປິ່ນປົວປີກ່ອນ ເຊິ່ງຕ້ອງໄດ້ທຳການຜ່າຕັດ 16 ຄັ້ງ ເພື່ອເອົາສິ່ງແປກປະຫຼາດອອກຈາກມື, ເຊິ່ງປັດຈຸບັນມືຊ້າຍ ແລະຕີນຊ້າຍຂອງລາວ ກັບມາເປັນປົກກະຕິເກືອບສົມບູນແລ້ວ, ແຕ່ມືຂວາ ແລະຕີນຂວາ ຍັງຕ້ອງປິ່ນປົວຕໍ່ໄປອີກໄລຍະໜຶ່ງ ເຊິ່ງແພດກຳລັງຈະອະນຸຍາດໃຫ້ລາວກັບບ້ານ ໃນອີກ 30 ວັນຫຼັງຈາກນີ້
ອັບດຸລ ເວົ້າວ່າ ລາວບໍ່ຄິດວ່າຊາດນີ້ຈະໄດ້ກອດລູກດ້ວຍມືຂອງຕົວເອງ, ຕອນນີ້ຮູ້ສຶກດີໃຈຫຼາຍ ເພາະສາມາດຢອກຫຼິ້ນກັບລູກໄດ້ແລ້ວ ແລະກຳລັງຈະໄດ້ກັບບ້ານອີກຄັ້ງ ເພາະອາການໃກ້ຈະດີ ແລະພ້ອມກັບໄປໃຊ້ຊີວິດປົກກະຕິຄືກັບຄົນອື່ນໆໄດ້
ແຫຼ່ງຂ່າວ: http://news.sanook.com/2149366/