ສຳນັກຂ່າວຕ່າງປະເທດລາຍງານເມື່ອວັນທີ 30 ທັນວາ 2016 ວ່າ ທ່ານ Fortunato Foti ຜູ້ຄວບຄຸມການສະແດງພຸ ແລະບັ້ງໄຟດອກ ບໍລິເວນ ຂົວຮາເບີ ຊິດນີ ອອສເຕຣເລຍ ໃຊ້ເວລາດົນນັບປີໃນການວາງແຜນ ແລະກຽມການສະແດງບັ້ງໄຟດອກ ໃນຄໍ່າຄືນວັນສົ່ງທ້າຍປີເກົ່າ-ຕ້ອນຮັບປີໃໝ່ 2017 ເນື່ອງຈາກວ່າ ປະຊາຊົນ ຈາກທົ່ວທຸກມຸມໂລກຈັບຕາເບິ່ງ ແລະຖືເປັນໜຶ່ງໃນປະເທດທຳອິດຂອງໂລກ ທີ່ຈະເຂົ້າປີໃໝ່ກ່ອນປະເທດອື່ນ
ການຈັດສະແດງບັ້ງໄຟດອກໃນຄັ້ງນີ້ ຕ້ອງໃຊ້ພຸ ແລະບັ້ງໄຟດອກ ນໍ້າໜັກລວມກວ່າ 7 ໂຕນ ໃຊ້ຕູ້ຄອນເທນເນີ ຂົນອຸປະກອນການສະແດງທັງໝົດລວມ 18 ຕູ້ ເຊິ່ງມີນໍ້າໜັກຂອງອຸປະກອນຕ່າງໆ ລວມກວ່າ 120 ໂຕນ ແລະຄາດວ່າຈະມີຜູ້ຊົມເຝົ້າຕິດຕາມພິທີສະເຫຼີມສະຫຼອງ ທີ່ຍິ່ງໃຫຍ່ນີ້ຫຼາຍລ້ານຄົນທົ່ວໂລກ