ເກີດເຫດໂຈນໃຊ້ອາວຸດບຸກປຸ້ນເຮືອນຫຼັງໜຶ່ງໃນນະຄອນຈາກາຣ໌ຕາຂອງອິນໂດເນເຊຍ ພ້ອມທັງຈັບຄົນທີ່ຢູ່ໃນເຮືອນຂັງໄວ້ໃນຫ້ອງນໍ້າຂະໜາດນ້ອຍ ຊຶ່ງຈາກເຫດການດັ່ງກ່າວສົ່ງຜົນໃຫ້ມີຜູ້ເສຍຊີວິດ 6 ຄົນ ລວມທັງເດັກນ້ອຍອາຍຸ 9 ປີ.
ອີງຕາມສໍານັກຂ່າວຕ່າງປະເທດລາຍງານວັນທີ 28 ທັນວາ ນີ້ວ່າ: ຜູ້ບັນຊາການຕໍາຫຼວດນະຄອນຈາກາຣ໌ຕາ ຂອງອິນໂດເນເຊຍ ເປີດເຜີຍວ່າ ເກີດເຫດໂຈນຫຼາຍກວ່າ 4 ຄົນໃຊ້ອາວຸດບຸກປຸ້ນເຮືອນຫຼັງໜຶ່ງໃນນະຄອນຈາກາຣ໌ຕາຂອງອິນໂດເນເຊຍ ພ້ອມທັງຈັບຄົນທີ່ຢູ່ໃນເຮືອນທັງ 11 ຄົນ ຂັງໄວ້ໃນຫ້ອງນໍ້າທີ່ມີຂະໜາດພຽງແຕ່ 1-1.5 ແມັດເທົ່ານັ້ນ.
ທັງນີ້ ຈາກເຫດການດັງກ່າວສົ່ງຜົນໃຫ້ມີຜູ້ເສຍຊີວິດຈາກການຂາດອາກາດຫາຍໃຈ 6 ຄົນ ຊຶ່ງໃນນັ້ນມີເດັກນ້ອຍອາຍຸ 9 ປີຢູ່ນໍາ ແລະບາດເຈັບສາຫັດ 5 ຄົນ ຊຶ່ງລ່າສຸດຖືກນໍາສົ່ງໂຮງໝໍ.
ສໍາຫຼັບການກໍ່ຄວາມຜິດຖານລະຫຸໂທດ ຫຼືເປັນການກໍ່ຄວາມຜິດເລັກໆນ້ອຍໆ ຄືເປັນເລື່ອງປົກກະຕິທີ່ເກີດຂຶ້ນໃນນະຄອນຈາກາຣ໌ຕາ ແຕ່ວ່າການບຸກປຸ້ນໂດຍໃຊ້ອາວຸດຖືເປັນເລື່ອງທີ່ບໍ່ຄ່ອຍເກີດຂຶ້ນ ຊຶ່ງຈາກເຫດການຄັ້ງນີ້ສ້າງຄວາມໜ້າຕົກໃຈຫຼາຍກັບກໍ່ອາຊະຍາກໍາໃນເມືອງທີ່ມີປະຊາກອນ 10 ລ້ານຄົນ.