ສຳນັກຂ່າວຣອຍເຕີລາຍງານເມື່ອວັນທີ 14 ທັນວາ 2016 ວ່າ ປະທານາທິບໍດີ ວະລາດີເມຍ ປູຕິນ ແຫ່ງປະເທດລັດເຊຍ ເປີດທຳນຽບຕ້ອນຮັບຕົວແທນສື່ມວນຊົນ ຈາກສຳນັກຂ່າວໂຢມິອູຮິ ແລະສະຖານີໂທລະພາບພິບປອນ ຈາກປະເທດຍີ່ປຸ່ນ ເຊິ່ງໄດ້ມີ “ຢູເມະ” ໝາສຸດຮັກ ຮ່ວມຮຽງຂ້າງທ່ານຜູ້ນໍາອອກມາຮັບແຂກໃນຄັ້ງນີ້ນຳ
ຢູເມະ ເປັນໝາໂຕແມ່ ສາຍພັນອາຄິຕະ ຊື່ ຢູເມະ ມີຄວາມໝາຍໃນພາສາຍີ່ປຸ່ນວ່າ “ຄວາມຝັນ” ມັນເປັນຂອງຂວັນທີ່ທາງການຍີ່ປຸ່ນມອບໃຫ້ປະທານາທິບໍດີ ປູຕິນ ເພື່ອເປັນການຂອບໃຈທີ່ລັດເຊຍ ໃຫ້ການຊ່ວຍເຫຼືອຍີ່ປຸ່ນພາຍຫຼັງເກີດເຫດແຜ່ນດິນໄຫວ ແລະສຶນາມິຄັ້ງໃຫຍ່ໃນປີ 2012 ເຊິ່ງໃນຕອນນັ້ນ ມັນມີອາຍຸພຽງ 3 ເດືອນ ແຕ່ຕອນນີ້ໃຫຍ່ອາຍຸ 4 ປີແລ້ວ
ຢູເມະ ຍ່າງຄຽງຂ້າງທ່ານຜູ້ນຳມາໃນຫ້ອງຮັບຮອງ ແລະເມື່ອມັນເຫັນຕົວແທນສື່ຈາກຍີ່ປຸ່ນທີ່ຢືນຖ້າຢູ່ ດ້ວຍທ່າທີຍິ້ມແຍ້ມ ມັນກໍສົ່ງສຽງເຫົ່າຫຼາຍເທື່ອເປັນການຕ້ອນຮັບ, ໜຶ່ງໃນຕົວແທນສື່ເວົ້າວ່າ: ການຕ້ອນຮັບໃນຄັ້ງນີ້ ຊ່າງປະຫຼາດໃຈ ແລະເປັນຕາຢ້ານໜ້ອຍໜຶ່ງ ແຕ່ກໍຮູ້ສຶກຍິນດີຫຼາຍ ທີ່ເຫັນຢູເມະ ມີຄວາມສຸກ ແລະມ່ວນຊື່ນແບບນີ້, ທ່ານປູຕິນບອກວ່າ ຢູເມະເປັນໝາທີ່ຮູ້ຄວາມ, ມັນສະຫຼາດ ແລະມັນຄືອົງຄະລັກທີ່ຄອຍຮັກສາຄວາມປອດໄພໃຫ້ຕົນເອງ