ສຳນັກຂ່າວຈີນລາຍງານເມື່ອວັນທີ 16 ທັນວາ 2016 ຜ່ານມາວ່າ ຢູ່ໃນເມືອງຈີ໋ມູ່ຊ່າເອີ ແຂວງປົກຄອງຕົນເອງຊົນຊາດ ຫຸຍຊາງຈີ້ ເຂດປົກຄອງຕົນເອງຊິນກຽງອຸຍກຣູ ມີພູເຂົາໜຶ່ງຖືກຂະໜານນາມວ່າ “ພູເຂົາໝາປ່າ” ເພາະມັກມີສຽງໝາປ່າເຫົ່າຫອນຢູ່ຕະຫຼອດ ແລະ ພໍ່ເຖົ້າ ຫຍາງ ສາງເຊິງ ອາຍຸ 71 ປີ ອາໄສຢູ່ນີ້ກໍໄດ້ລ້ຽງໝາປ່າໄວ້ຫຼາຍຮອດ 150 ໂຕ
ໝາປ່າທີ່ລາວລ້ຽງໄວ້ ມີຫຼາຍຂະໜາດ ຫຼາຍສີສັນ ມີທັງໝາປ່າໂກບີ, ໝາປ່າທົ່ງຫຍ້າ, ໝາປ່າທະເລຊາຍ, ໝາປ່າມົງໂກເລຍໃນ, ໝາປ່າມົງໂກເລຍ ແລະໝາປ່າໄຊບີຮຽນ ລວມແລ້ວຫຼາຍກວ່າ 8 ສາຍພັນ ເຊິ່ງສ່ວນຫຼາຍມາຈາກພື້ນທີ່ຕ່າງໆ ທັງໃນຈີນ ແລະຕ່າງປະເທດ ແຕ່ກໍມີສ່ວນໜຶ່ງທີ່ໄດ້ຈາກການເຮັດການສືບພັນເອງ
ນອກຈາກນີ້ ຍັງໄດ້ຈ່າຍຄ່າອາຫານຂອງໝາປ່າ ປີລະເກືອບ 1 ລ້ານຢວນ ແລະເຖິງແມ່ນວ່າລາວຈະເຖົ້າແກ່ແລ້ວ ແຕ່ສຸຂະພາບຮ່າງກາຍຍັງແຂງແຮງດີ ເຊິ່ງຖ້າບໍ່ຖາມອາຍຸກໍຈະເບິ່ງບໍ່ອອກວ່າອາຍຸຫຼາຍຮອດ 71 ປີແລ້ວ