ອີງຕາມສໍານັກຂ່າວຕ່າງປະເທດລາຍງານໃນວັນທີ 18 ທັນວາທີ່ຜ່ານມາວ່າ:  ທາງການນະຄອນປັກກິ່ງໄດ້ປະກາດຄວບຄຸມມົນລະພິດໃນພີ້ນທີ່ເມືອງຫຼວງ ຫຼັງຕ້ອງພະເຊີນກັບພາວະອາກາດທີ່ບໍ່ຄ່ອຍດີ ເຕັມໄປດ້ວຍຄວັນພິດທີ່ເປັນອັນຕະລາຍ ຕ້ອງປະກາດເພີ່ມລະດັບເຕືອນໄພເປັນສີແດງ ຊຶ່ງເປັນການເຕືອນລະດັບສູງສຸດ.

ຕາມການລາຍງານລະບຸວ່າ: ທາງການນະຄອນປັກກິ່ງໄດ້ສັ່ງປິດການຮຽນການສອນຂອງໂຮງຮຽນຫຼາຍແຫ່ງ ພ້ອມກັບແຈ້ງເຕືອນໃຫ້ປະຊາຊົນງົດກິດຈະກໍາ ແລະໃຊ້ຊີວິດຕົກກາງແຈ້ງໃນໄລຍະນີ້ ເນື່ອງຈາກສະພາບອາກາດບໍ່ເອື້ອຍອໍານວຍ ແລະເປັນອັນຕະລາຍຕໍ່ສຸຂະພາບເປັນຢ່າງຫຼາຍ.

ສູນເຝົ້າລະວັງສິ່ງແວດລ້ອມໃນນະຄອນປັກກິ່ງ ເປີດເຜີຍຕົວເລກການວັດຄ່າມົນລະພິດລ່າສຸດສູງເຖິງ 297 ທີ່ສູງກວ່າມາດຕະຖານທີ່ລະດັບ 200 ແລະອາດຈະພຸ່ງສູງທະລຸ 300 ໃນບາງຊ່ວງ ຂະນະທີ່ຄ່າຝຸ່ນລະອອງຂະໜາດນ້ອຍ ກໍສາມາດວັດໄດ້ສູງກວ່າລະດັບມາດຕະຖານເກືອບ 10 ເທົ່າ ມີການຄາດການວ່າສະຖານະການແບບນີ້ຈະຍັງຄົງເກີດຂຶ້ນຕໍ່ເນື່ອງອີກ 3-4 ວັນຕໍ່ຈາກນີ້.

ຂະນະທີ່ພາບຖ່າຍຈາກມຸມສູງທີ່ເຫັນຮອບທິດທາງຂອງນະຄອນປັກກິ່ງ ເຜີຍໃຫ້ເຫັນຄວັນພິດປົກຄຸມໄປທົ່ວເມືອງ ລອຍຕົວຕໍ່າກວ່າຕຶກສູງ ເຮັດໃຫ້ເກີດເປັນພາບທີ່ງົດງາມ ແຕ່ແຝງໄປດ້ວຍມົນລະພິດອັນຕະລາຍທີ່ກໍາລັງເຂົ້າສູ່ຂັ້ນວິກິດ.