ສຳນັກຂ່າວຈີນລາຍງານເມື່ອວັນທີ 15 ທັນວາ 2016 ຜ່ານມາວ່າ ຢູ່ເຂດອີ໋ຫຼິງ ເມືອງອີ໋ຊາງ ມົນທົນຫູເປ່ຍ ມີຊາຍໜຸ່ມຄົນໜຶ່ງ ອາຍຸ 27 ປີ ຕິດການພະນັນ ຈົນຊີວິດຄອບຄົວຕ້ອງພັງທະລາຍ ພັນລະຍາຄົນທຳອິທົນບໍ່ໄຫວກໍຢ່າຮ້າງ ແລະເອົາຄົນທີສອງ ກໍທົນນິໄສຫຼິ້ນການພະນັນບໍ່ໄຫວ ຈຶ່ງຢ່າຮ້າງເຊັ່ນກັນ, ລູກຊາຍສອງຄົນ ອາຍຸ 3 ປີ ແລະ ປີເຄິ່ງ ຕ້ອງໃຫ້ພໍ່ແມ່ທີ່ເຖົ້າແກ່ຊະລາເບິ່ງແຍງ ແລະເມື່ອບໍ່ດົນມານີ້ ລາວກໍໄດ້ຂາຍລູກຊາຍຄົນທີສອງທີ່ອາຍຸ ປີເຄິ່ງ ໃນລາຄາ 35,000ຢວນ ເພື່ອເອົາເງິນໄປຫຼິ້ນການພະນັນ ເຊິ່ງໂຊກດີທີ່ທາງເຈົ້າໜ້າທີ່ຕຳຫຼວດສືບສວນ ເຂົ້າຊ່ວຍເຫຼືອເດັກນ້ອຍໄດ້ສຳເລັດ
ຕາມການລາຍງານບອກວ່າ ຖານະທາງຄອບຄົວຂອງຊາຍໜຸ່ມຄົນດັ່ງກ່າວຖືວ່າດີ ເຊິ່ງໃນຊ່ວງທີ່ແຕ່ງງານກັບພັນລະຍາຄົນທຳອິດ ພໍ່ແມ່ກໍໄດ້ຊື້່ລົດໃນລາຄາກວ່າ 2 ແສນຢວນ ໃຫ້ເປັນຂອງຂວັນ ແຕ່ມາບໍ່ດົນລາວກໍຂາຍລົດຄັນດັ່ງກ່າວ ແລ້ວເອົາເງິນໄປຫຼິ້ນການພະນັນ ຈົນພັນລະຍາທັນບໍ່ໄດ້ຕ້ອງຢ່າຮ້າງຈາກລາວໄປ
ຕໍ່ມາກໍແຕ່ງງານອີກ ແຕ່ກໍຍັງບໍ່ປ່ຽນນິໄສຂອງຕົນ ເຖິງແມ່ນພັນລະຍາຄົນນີ້ ຈະເຂັ້ມງວດກັບລາວ ເພາະຕ້ອງການໃຫ້ລາວປ່ຽນນິໄສໃຫ້ດີຂຶ້ນ ແຕ່ກໍທົນບໍ່ໄຫວຕ້ອງຢ່າຮ້າງກັນອີກ
ລາວຕິດການພະນັນຫຼາຍ ແຕ່ບໍ່ມີເງິນ ຈຶ່ງຄິດທີ່ຈະຂາຍລູກຊາຍ ຈຶ່ງຄົ້ນຫາຂໍ້ມູນກ່ຽວກັບການຮັບລ້ຽງລູກໃນອິນເຕີເນັດ ແລະສະເໜີຂາຍໃຫ້ຄອບຄົວໜຶ່ງໃນເມືອງຊຽງຢາງ ເຊິ່ງລາວສະເໜີຂາຍລູກຕົນເອງໃນລາຄາ 5 ແສນຢວນ ແຕ່ການເຈລະຈາຕໍ່ລອງລາຄາສຸດທ້າຍ ລາວກໍຕ້ອງຂາຍລູກໃນລາຄາ 35,000 ຢວນ, ນອກນັ້ນ ຍັງຕຽມຂາຍລູກຊາຍກົກນຳອີກ ແຕ່ທາງຕຳຫຼວດໄດ້ຮູ້ເຫດການກ່ອນ ແລະໄດ້ຊອກຫາລູກຊາຍທີ່ຖືກຂາຍ ແລະເຂົ້າຊ່ວຍເຫຼືອຈົນສຳເລັດ