ອີງຕາມສໍານັກຂ່າວຕ່າງປະເທດລາຍງານວັນທີ 15 ທັນວານີ້ວ່າ: ເມື່ອບໍ່ດົນມານີ້ ເຈິ້ງ ຊຸ່ນເຫວິນ ລູກສາວຂອງ ເຈິງ ເຢວໄສ ປະທານກໍາມະການກຸ່ມບໍລິສັດ ຢຣື່ຮຸຍ ຊຶ່ງເປັນນັກທຸລະກິດມະຫາເສດຖີຊື່ສຽງຂອງໃຕ້ຫວັນ ໄດ້ເຂົ້າພິທີແຕ່ງງານກັບ ຫວັງ ກວນຈື້ ເຈົ້າຂອງກຸ່ມບໍລິສັດຢ່າງເລ່ຕົວ ໂດຍຜ້າຄຸມຜົມເຈົ້າສາວທີ່ປະດັບເທິງຫົວມີຄວາມຍາວເຖິງ 6 ກິໂລແມັດ ໃຫ້ຄົນຊ່ວຍຈັບກວ່າ 560 ຄົນ.
ດ້ວຍຜູ້ເປັນພໍ່ຢາກຈັດງານໃຫ້ເປັນທີ່ໜ້າຈົດຈໍາ ໂຣແມນຕິກ ແລະມີຄວາມພິເສດ ຈຶ່ງໄດ້ຕັດສິນໃຈສັ່ງເຮັດຊຸດເຈົ້າສາວນີ້ໃຫ້ກັບລູກສາວສຸດຮັກ ຊຶ່ງອອກແບບໂດຍໃຊ້ນັກອອກແບບທີ່ມີຊື່ສຽງໂດ່ງດັງກວ່າ 6 ຄົນ ໃຊ້ເວລາຕັດຍິບ 3 ເດືອນ ດ້ວຍເງິນຫຼາຍເຖິງ 1 ລ້ານຢວນ ອີກທັງຍັງຕ້ອງໃຫ້ຄົນເຖິງ 560 ຄົນຊ່ວຍຈັບຊຸດລະຫວ່າງເຈົ້າສາວຍ່າງໂຊວຕາມສະຖານທີ່ທ່ອງທ່ຽວສໍາຄັນຫຼາຍແຫ່ງທົ່ວເມືອງ.
ຊຶ່ງໃນວັນສໍາຄັນດັງກ່າວ ເຈົ້າສາວກໍໄດ້ເດີນທາງໄປຮ່ວມງານເພື່ອບັນທຶກສະຖິຕິໂລກ “ຊຸດເຈົ້າສາວທີ່ຍາວທີ່ສຸດໃນໂລກ” ອີກດ້ວຍ.