ອີງຕາມການລາຍງານຂອງສຳນັກຂ່າວຕ່າງປະເທດລາຍງານວເມື່ອວັນທີ 14 ທັນວາ 2016 ວ່າ ທີມນັກວິໄຈປະຫວັດສາດ ຈາກມະຫາວິທະຍາໄລ Gothenburg ໄດ້ປະກາດການຄົ້ນພົບເມືອງບູຮານແຫ່ງໜຶ່ງ ທີ່ຕັ້ງຢູ່ບໍລິເວນພູເຂົາ ໃກ້ກັບນະຄອນເອເທນ ໃນກຣີສ ເຊິ່ງພວກເຂົາເຊື່ອວ່າ ເມືອງນີ້ມີອາຍຸເກົ່າແກ່ເຖິງ 2,500 ປີ

Robin Rönnlund ນັກສຶກສາປະລິນຍາເອກ ສາຂາບູຮານຄະດີ ແລະປະຫວັດສາດບູຮານ ປະຫຼາດໃຈ ທີ່ເມືອງອັນເລິກລັບນີ້ ບໍ່ເຄີຍຖືກຄົ້ນພົບມາກ່ອນ ໂດຍລາວເອງເປັນຫົວໜ້າທີມວິໄຈບອກວ່າ: ຊາກຫັກພັງ ທີ່ເຄີຍເຊື່ອກັນວ່າເປັນຮ່ອງຮອຍຂອງການຕັ້ງຖິ່ນຖານ ເຊິ່ງຄວາມຈິງແລ້ວມັນຄືເມືອງບູຮານເມືອງໜຶ່ງ

Rönnlund ແລະທີມງານໄດ້ເດີນທາງມາຍັງບໍລິເວນດັ່ງກ່າວເພື່ອສຶກສາວິໄຈໂປຣເຈັກອື່ນ ເມື່ອປີກາຍ ຈຶ່ງໄດ້ຄົ້ນພົບເມືອງໃໝ່ນີ້ແບບບັງເອີນ ຮ່ອງຮອຍທີ່ເຫັນນັ້ນ ມີຊາກຫັກພັງຂອງຫໍຄອຍ ແລະກຳແພງເມືອງ, ມີຈະຕຸລັດກາງເມືອງ ແລະຖະໜົນ ເຊິ່ງເຮັດໃຫ້ເຊື່ອວ່າ ເມືອງນີ້ເປັນເມືອງໃຫຍ່ສົມຄວນ

ທາງທີມງານຕັດສິນໃຈ ທີ່ຈະຫຼີກລຽງການກວດສອບດ້ວຍການຂຸດຄົ້ນ ແລະໃຊ້ເທັກໂນໂລຊີການສະແກນແທນ ເພື່ອຊອກຫາວ່າ ເມືອງນີ້ເຊື່ອງຄວາມລັບຫຍັງເອົາໄວ້

ນອກຈາກນັ້ນ ຍັງມີການຄົ້ນພົບເຄື່ອງປັ້ນດິນເຜົາບູຮານ ແລະຫຼຽນໃນບໍລິເວນເມືອງ ເຊິ່ງຊ່ວຍໃຫ້ທາງທີມງານສາມາດຄຳນວນອາຍຸຂອງເມືອງໄດ້ງ່າຍຂຶ້ນ ເຊິ່ງວັດຖຸບູຮານບາງຢ່າງ ທີ່ພົບນັ້ນມີອາຍຸເກົ່າແກ່ເຖິງ 500 ປີກ່ອນ ຄ.ສ ເຊິ່ງເມືອງນີ້ ໜ້າຈະຮຸ່ງເຮືອງໃນຊ່ວງ 400-300 ປີ ກ່ອນ ຄ.ສ ກ່ອນທີ່ເມືອງຈະຖືກຖິ້ມຮ້າງດ້ວຍເຫດຜົນບາງຢ່າງ ເຊິ່ງອາດເປັນໄປໄດ້ວ່າເປັນຜົນກະທົບ ຈາກໄພພິບັດທີ່ເກີດຂຶ້ນໃນໂຣມັນໃນຕອນນັ້ນເຊັ່ນກັນ