ວັນທີ 2 ທັນວາ ປີ 1994 ຫຼືມື້ນີ້ເມື່ອ 22 ປີທີ່ແລ້ວ ເປັນມື້ວາງຈຳໜ່າຍຂອງເກມ Breath of Fire II ເທິງເຄື່ອງ Super Famicom ທີ່ປະເທດຍີ່ປຸ່ນ. ໂດຍເກມນີ້ເປັນອີກ 1 ໃນຊີຣີເກມ RPG ທີ່ພັດທະນາໂດຍ Capcom ເຊິ່ງໃນປັດຈຸບັນຍັງຄົງມີການເຮັດຕໍ່ອອກມາຢູ່ ແຕ່ວ່າໄດ້ຍ້າຍໄປເຮັດລົງສະມາດໂຟນແທນນັ້ນກໍຄືພາກ 6 ນັ້ນເອງ ຫຼັງຈາກທີ່ໂຕເກມເລີ່ມເສື່ອມຄວາມນິຍົມຢ່າງໜັກຕັ້ງແຕ່ພາກ 5 ເປັນຕົ້ນມາ.
ພລ໋ອດເລື່ອງຂອງເກມນີ້ຈະເປັນເຫດການ 500 ປີຕໍ່ມາຈາກເລື່ອງພາກທຳອິດ ໂດຍຈະເປີດເນື້ອຫາມາທີ່ ຣິວ ເດັກນ້ອຍອາຍຸ 6 ປີທີ່ອາໄສຢູ່ກັບພໍ່ແລະເອື້ອຍ, ເຊິ່ງເມື່ອ 1 ປີກ່ອນໜ້ານັ້ນແມ່ຂອງຣິວໄດ້ເສຍຊີວິດດ້ວຍຝີມືຂອງຜີສາດທີ່ບຸກຖະຫຼົ່ມໝູ່ຍ້ານ ແລະສຸດທ້າຍກໍມີມັງກອນໂຕໜຶ່ງຍອມເສຍສະຫຼະໂຕເອງເພື່ອຂວາງປາກທາງເທິງພູເຂົາບໍ່ໃຫ້ຜີສາດລອດຜ່ານມາຮຸກຮານໝູ່ບ້ານໄດ້ອີກ ແລະໝູ່ບ້ານຈຶ່ງພົບຄວາມສະຫງົບສຸກນັບແຕ່ນັ້ນມາ. ແຕ່ມາມື້ໜຶ່ງຫຼັງຈາກທີ່ຣິວໄດ້ໄປຢ້ຽມມັງກອນໂຕດັ່ງກ່າວ ພໍກັບມາທີ່ໝູ່ບ້ານກໍພົບວ່າຄອບຄົວຂອງຕົນຫາຍສາບສູນໄປໝົດ ແລະຄົນໃນໝູ່ບ້ານພັດຈື່ບໍ່ໄດ້ວ່າຣິວແມ່ນໃຜ, ຣິວເລີຍໜີອອກມາພ້ອມກັບໂບວເດັກກຳພ້າອີກຄົນໜຶ່ງທີ່ພະຍາຍາມຊັກຊວນໃຫ້ໜີໄປຢູ່ເມືອງໃຫຍ່ນຳກັນ ແຕ່ວ່າລະຫວ່າງທີ່ໜີອອກຈາກໝູ່ບ້ານ ຣິວກັບໂບວກໍພົບກັບຜີສາດນາມວ່າ: ບາຣູບາຣີ້ (Barubary) ທີ່ບອກກັບຣິວວ່າຣິວນັ້ນແມ່ນ “ເດັກຜູ້ຖືກລິຂິດຊະຕາໄວ້ແລ້ວ” ຈາກນັ້ນການປະຈົນໄພເພື່ອຄົ້ນຫາຊາດກຳເນີດທີ່ແທ້ຈິງຂອງຣິວກໍເລີ່ມຕົ້ນຂຶ້ນ.
ລັກສະນະການປະຈົນໄພຂອງເກມ Breath of Fire II ຈະອີງຮູບແບບຂອງເກມ RPG ໃນຍຸກສະໄໝນັ້ນ ຄື: ເປັນກຣາບຟິກແບບ 2D ຜ່ານມຸມກ້ອງແບບ Bird-eye View. ສ່ວນລະບົບການຕໍ່ສູ້ຈະເປັນສະຕາຍແບບເທິຣ໌ນເບສທີ່ຜູ້ຫຼິ້ນຕ້ອງຄອຍປ້ອນຄຳສັ່ງເພື່ອໃຫ້ໂຕລະຄອນອອກແອັກຊັ່ນຕ່າງໆ ເຊິ່ງຄວາມໄວໃນການມາຂອງຊຸດຄຳສັ່ງຈະຂຶ້ນຢູ່ກັບຄ່າຄວາມໄວຂອງໂຕລະຄອນນັ້ນໆ ພ້ອມກັນນີ້ຍັງສາມາດເຊັດຮູບແບບການຢືນຂອງໂຕລະຄອນແຕ່ລະໂຕເພື່ອໃຫ້ເໝາະສົມກັບຕລະຄອນທີ່ມີຢູ່ໃນປາຣ໌ຕີ້ ເຊັ່ນ: ສາຍໂຈມຕີປົກກະຕິຢືນແຖວໜ້າ, ສາຍເວດທີ່ມີພະລັງປ້ອງກັນຕ່ຳໃຫ້ຢືນຢູ່ຫຼັງເປັນຕົ້ນ. ຍິ່ງໄປກວ່ານັ້ນ ລະຫວ່າງທີ່ປະຈົນໄພຫຼືເດີນທາງໄປຈຸດສຳຄັນຕ່າງໆກໍຈະມີມິນິເກມໃຫ້ຜູ້ຫຼິ້ນໄດ້ເພີດເພີນແລະຍັງມີຄວາມລັບຫຼາກຫຼາຍເຊື່ອງຢູ່ທີ່ຖ້າໃຫ້ຜູ້ຫຼິ້ນໄປຟາຣ໌ມໄດ້ເລື້ອຍໆນຳ.
Fact ເລັກນ້ອຍກ່ຽວກັບເກມ Breath of Fire II
- ຫາກຜູ້ຫຼິ້ນເດີນທາງໄປທີ່ເກາະ Giant ໃຫ້ລອງໄປທີ່ທິດເໜືອຂອງເກາະ (ເໜືອຈາກປະຕູເມືອງໄປອີກ) ຈະພົບກັບ Bo ແລະ Karn ສອງໂຕລະຄອນຈາກພາກທຳອິດຢູ່ຫັ້ນ ເຊິ່ງຜູ້ຫຼິ້ນສາມາດເຂົ້າໄປລົມກັບທັງຄູ່ໄດ້ດ້ວຍການໃຊ້ປາວາບຫຼືນົກໃນການເຂົ້າໄປຫາ.
- ສຳລັບເວີຊັ່ນ Super Famicom ຂອງເກມນີິໄດ້ຮັບຄະແນນວິຈານຢູ່ໃນເກນທີ່ດີ (ຄ່າສະເລ່ຍປະມານ 80-85%) ແລະຍັງເປັນພາກທີ່ຂາຍດີທີ່ສຸດຂອງຊີຣີອີກນຳ ໂດຍເມື່ອນັບຮອດທ້າຍປີ 1995 ແລ້ວ ເກມນີ້ສາມາດຂາຍໄດ້ 350,000 ຊຸດໃນຍີ່ປຸ່ນ, ກ່ອນທີ່ທາງ Capcom ຈະມີການຣີເມກລົງເຄື່ອງ Game Boy Advance ແລ້ວວາງຈຳໜ່າຍໃນປີ 2001 ແຕ່ຍອດຂາຍຂອງເວີຊັ່ນ Game Boy Advance ພັດບໍ່ຄ່ອຍດີ ເຊິ່ງມີການຄາດການວ່າອາດເປັນເພາະໃນຊ່ວງທີ່ເກມອອກ ແລະຊ່ວງທີ່ເກມເວີຊັ່ນດັ້ງເດີມ (Super Famicom) ວາງຂາຍນັ້ນຫ່າງກັນເກີນໄປ ດັ່ງນັ້ນຜູ້ຫຼິ້ນໃນຍຸກ Game Boy Advance ຈຶ່ງຮູ້ຈັກເກມນີ້ກັນໜ້ອຍກວ່າທີ່ຄວນ.
- ເຖິງວ່າຍອດຂາຍຈະສູ້ຊີຣີ RPG ລະດັບເຈົ້າພໍ່ຂອງຍຸກນັ້ນແບບ Final Fantasy VI ຈາກ Squaresoft ຫຼື Dragon Quest V ຈາກ Enix ບໍ່ໄດ້ ແຕ່ບັນດາຜູ້ຫຼິ້ນທີ່ເຄີຍໄດ້ສຳຜັດເກມ Breath of Fire II ຕ່າງກໍຍົກໃຫ້ເກມນີ້ເປັນ 1 ໃນເກມ RPG ທີ່ດີທີ່ສຸດຂອງເຄື່ອງ Super Famicom ຈາກຮູບແບບການຫຼິ້ນແລະດີຊາຍຂອງໂຕລະຄອນທີ່ເປັນເອກະລັກ ລວມໄປເຖິງມີເນື້ອເລື່ອງທີ່ຕື່ນເຕັ້ນຕະຫຼອດເກມ.
ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!
ທີ່ມາ: online station