ລຸຟຮັນຊາ ສາຍການບິນແຫ່ງຊາດເຢຍລະມັນຍົກເລີກຖ້ຽວບິນ 890 ຖ້ຽວ ຊຶ່ງເປັນຜົນມາຈາກການປະທ້ວງຄັ້ງໃໝ່ຂອງນັກບິນທີ່ສ້າງຄວາມເສຍຫາຍໃຫ້ກັບບໍລິສັດສູງສຸດມື້ລະ 15 ລ້ານເອີໂຣ.
ອີງຕາມສໍານັກຂ່າວຕ່າງປະເທດລາຍງານວ່າ: ໂຄສົກຂອງລຸຟຮັນຊາຖະແຫຼງເລື່ອງການຍົກເລີກຖ້ຽວບິນ 890 ຖ້ຽວບິນຕະຫຼອດໝົດມື້ສ່ວນໃຫຍ່ເປັນຖ້ຽວບິນໄລຍະສັ້ນ ແລະ ໄລຍະຍາວ ເນື່ອງຈາກສະຫະພາບແຮງງານນັກບິນ(ວີຊີ)ເລີ່ມປະທ້ວງຊຶ່ງຖືເປັນຄັ້ງທີ 15 ນັບຕັ້ງແຕ່ເດືອນເມສາປີ 2014 ຫຼັງເຈລະຈາຄັ້ງຫຼ້າສຸດເລື່ອງການປັບເພີ່ມຂຶ້ນຄ່າຕອບແທນ ແລະ ສະຫວັດດີການອື່ນທີ່ມີຂຶ້ນໃນອາທິກ່ອນບໍ່ໄດ້ຂໍ້ສະຫຼຸບຊຶ່ງການປະທ້ວງໃນຄັ້ງນີ້ສ້າງຄວາມເສຍຫາຍໃຫ້ກັບບໍລິສັດປະມານມື້ລະ 10-15 ລ້ານເອີໂຣ.
ຢ່າງໃດກໍຕາມ ຜູ້ບໍລິຫານຂອງລຸຟຮັນຊາກຳລັງພິຈາລະນາຂໍ້ສະເໜີຫຼ້າສຸດຂອງວີຊີວ່າອາດກັບມາເຈລະຈາອີກເທື່ອໜຶ່ງ ຫາກເປັນການຫາລືພາຍໃຕ້ເງື່ອນໄຂຂອງການປັບເພີ່ມຄ່າຕອບແທນ 5% ໂດຍກ່ອນໜ້ານີ້ຜູ້ບໍລິຫານສະເໜີປັບເພີ່ມຄ່າຕອບແທນໄດ້ສູງສຸດ 2,4% ໃນປີນີ້ ແລະ 4,4% ໃນປີໜ້າອີກທັງຄ່າຕອບແທນປະຈຸບັນຢູ່ທີ່ເດືອນລະ 22 ພັນເອີໂຣກ່ອນຫັກຄ່າພາສີຂະນະທີ່ຂໍ້ຮຽກຮ້ອງຕະຫຼອດໄລຍະເວລາທີ່ຜ່ານມາຂອງວີຊາຄືການປັບຄ່າຕອບແທນສຳລັບນັກບິນທັງ 5.400 ຄົນ ເພີ່ມຂຶ້ນອີກ 3,7% ໃຫ້ມີຜົນຢ້ອນຫຼັງ 5 ປີ ຄວບຄຸມຈົນເຖິງປີ 2017.
ເສດຖະກິດ-ສັງຄົມ