ເທັບບັນທຶກສຽງຂອງເຄື່ອງບິນທີ່ປະສົບອຸບັດຕິເຫດໃນໂກລົມບີຊີ້ວ່າ ເຄື່ອງບິນນໍ້າມັນໝົດກ່ອນທີ່ຈະຕົກ.
ອີງຕາມສໍານັກຂ່າວຕ່າງປະເທດລາຍງາຍວັນທີ 1 ທັນວາວ່າ: ຈາກຫຼັກຖານເທັບບັນທຶກສຽງໃນເຄື່ອງບິນທີ່ໄດ້ຈາກຫໍບັງຄັບການບິນຊີ້ວ່າ ເຄື່ອງບິນໂດຍສານທີ່ປະສົບອຸບັດຕິເຫດຕົກໃນປະເທດໂກລົມບີນັ້ນມີສາເຫດມາຈາກເຄື່ອງບິນນໍ້າມັນໝົດ ໂດຍໃນຫຼັກຖານເທັບບັນທຶກສຽງດັ່ງກ່າວ ໄດ້ຍິນສຽງຂອງນັກບິນກ່າວຢໍ້າຂໍອະນຸຍາດລົງຈອດ ເນື່ອງຈາກການເກີດປັນຫາຂັດຂ້ອງກ່ຽວກັບລະບົບໄຟຟ້າ ແລະນໍ້າມັນໝົດ ຊຶ່ງກ່ອນທີ່ເທັບບັນທຶກສຽງຈະສິ້ນສຸດລົງ ນັກບິນຍັງກ່າວອີກວ່າ ເຄື່ອງບິນກໍາລັງບິນຢູ່ທີ່ຄວາມສູງ 2,743 ແມັດ.
ໃນເຄື່ອງບິນຄັນດັ່ງກ່າວມີຜູ້ໂດຍສານທັງໝົດ 77 ຄົນ, ມີຜູ້ລອດຊີວິດ 6 ຄົນ ແນວໃດກໍຕາມມີອີກ 4 ຄົນທີ່ມີຊື່ຢູ່ໃນລາຍຊື່ຜູ້ໂດຍສານ ແຕາບໍ່ໄດ້ເດີນທາງໄປຂຶ້ນເຄື່ອງ.
ຫຼັກຖານເທັບບັນທຶກສຽງທີ່ສື່ໂກລົມບີຫຼາຍແຫ່ງນໍາມາເປີດເຜີຍນີ້ ເປັນການລາຍງານກ່ອນໜ້ານີ້ທີ່ສັນນິຖານກັນວ່າ ການທີ່ເຄື່ອງບິິນຕົກ ອາດມີສາເຫດມາຈາກນໍ້າມັນໝົດ ເພາະຈາກການກວດສອບຊາກເຄື່ອງບິນບໍ່ພົບຮ່ອງຮອຍຂອງການລະເບີດທີ່ສ່ວນໃດເລີຍ ແຕ່ຕອນນີ້ກໍຍັງບໍ່ຮູ້ສາເຫດແທ້ຈິງວ່າເປັນຫຍັງນໍ້າມັນຈຶ່ງໝົດ ບໍ່ວ່າຈະເປັນເພາະນໍ້າມັນຮົ່ວ ຫຼືເຕີມນໍ້າມັນມາບໍ່ພໍ ຂະນະທີ່ຄະນະສືບສວຍຍັງບໍ່ປະກາດສະຫຼຸດສາເຫດຢ່າງເປັນທາງການຂອງການຕົກ ແລະການວິເຄາະຫໍຢ່າງເຕັມຮູບແບບເຖິງເຫດການໃນຄັ້ງນີ້ຄາດວ່າຕ້ອງໃຊ້ເວລາຫຼາຍເດືອນ.
ສ່ວນກ່ອງດໍາທັງສອງກ່ອງຂອງເຄື່ອງບິນໄດ້ຮັບການເກັບກູ້ອອກຈາກຊາກເຄື່ອງບິນແລ້ວ ໂດຍຕອນນີ້ຜູ້ຊ່ຽວຊານກໍາລັງກວດສອບກ່ອງດໍາຢູ່ ແລະທີມສືບສວນຈາກອັງກິດຈະໃຫ້ຄວາມຊ່ວຍເຫຼືອໃນການສືບສວບເຫດການຄັ້ງນີ້ດ້ວຍ ເພາະເຄື່ອງບິນລໍາດັ່ງກ່າວຖືກປະກອບຂຶ້ນໃນປະເທດອັງກິດ.