ເລື່ອງລາວສຸດສະຢອງຂວັນຂອງຜີບໍ່ມີໜ້າທີ່ມີແຂນຂາຍາວສູງ ແຖມຍັງໃສ່ສູດສີດຳ ທີ່ຖືກເອີ້ນວ່າ: The Slender Man ເຊິ່ງເປັນເລື່ອງສັ່ນຂວັນໄປທົ່ວອາເມຣິກາມາແລ້ວໃນຄະດີ ເດັກຍິງ 12 ປີ 2 ຄົນພະຍາຍາມຮ່ວມມືກັນຂ້າໝູ່ດ້ວຍການແທງລວມແລ້ວ 19 ຈຸດ ແຕ່ວ່າໜ້າເຫຼືອເຊື່ອເມື່ອເຫຍື່ອຄົນນັ້ນຍັງບໍ່ຕາຍນາງຍັງລອດມາໄດ້.
ກ່ອນອື່ນໝົດຄົງຕ້ອງເວົ້າເຖິງເຫດການອັນໜ້າສະຢົດສະຢອງທີ່ເກີດຂຶ້ນເມື່ອວັນທີ 31 ພຶດສະພາ 2014 ທີ່ເມືອງ Waukesha ລັດ Wisconsin, ເມື່ອເດັກສາວ 12 ປີ 2 ຄົນຄື: Morgan Geyser ແລະ Anissa Weier ໄດ້ຕົວະ Payton Leutner ເຊິ່ງເປັນໝູ່ຮ່ວມຊັ້ນຮຽນອອກໄປຂ້າໃນປ່າ ແລະໃຊ້ອາວຸດແທງໄປເຖິງ 19 ຈຸດ, ແຕ່ວ່າບຸນຂອງ Payton Leutner ຍັງມີຢູ່ເພາະນາງຍັງມີລົມຫາຍໃຈ ແລະໄດ້ພະຍາຍາມຄານອອກມາຂ້າງທາງ ຈົນໄດ້ຮັບການຊ່ອຍເຫຼືອຈາກຄົນຂີ່ລົດຖີບທີ່ບັງເອີນຜ່ານມາພໍດີ.
Payton Leutner ສາມາດລອດຕາຍຈາກຝັນຮ້າຍທີ່ບໍ່ໜ້າເກີດຂຶ້ນກັບນາງໄດ້ ເຊິ່ງນາງແລະຄອບຄົວຕ່າງກໍສົງໄສວ່າເປັນຫຍັງໝູ່ຮ່ວມຊັ້ນຂອງນາງຈຶ່ງເຮັດແບບນັ້ນ ແລະຈາກປາກຄຳຂອງຜູ້ຮ້າຍທັງ 2 ຄົນກໍເຮັດໃຫ້ໃຜໆກໍຕ້ອງຊ໋ອກເພາະວ່າເດັກສາວທັງ 2 ໄດ້ກ່າວເປັນສຽງດຽວກັນວ່າ: ທີ່ພວກນາງເຮັດໄປນັ້ນກໍເພາະວ່າຖືກ Slenderman ບັງຄັບ ເພາະຖ້າບໍ່ເຮັດ Slenderman ນັ້ນຈະມາຂ້ານາງແລະຄອບຄົວແທນ.
ຂໍ້ມູນເພີ່ມຕື່ມກ່ຽວກັບ Slenderman
Slenderman ບໍ່ແມ່ນມະນຸດເພາະວ່າທີ່ມາຈາກຫຼາຍໆແຫຼ່ງຕ່າງກໍໃຫ້ຂໍ້ມູນເປັນສຽງດຽວກັນວ່າໃບໜ້າຂອງຜີໂຕນີ້ຈະບໍ່ມີໜ້າ ແລະມີແຂນຂາຍາວສູງ ແລະຈະປະກົດໃຫ້ເຫັນໃນລັກສະນະຂອງຊາຍຄົນໜຶ່ງໃສ່ຊຸດສູດສີດຳ ແລະມັກຈະພົບເຫັນໄດ້ທີ່ສະໜາມຫຼິ້ນເດັກນ້ອຍທີ່ມີປ່າ ແລະມີນິໄສມັກລັກພາໂຕເດັກນ້ອຍຫຼືວ່າຂ້າເດັກນ້ອຍນັ້ນເອງ. ແນ່ນອນວ່າຫຼາຍໆຄົນທີ່ໄດ້ຟັງເລື່ອງນີ້ຕ່າງກໍເວົ້າວ່າສິ່ງນີ້ເປັນພຽງເລື່ອງຕົວະເດັກນ້ອຍເທົ່ານັ້ນ ແຕ່ວ່າພັດມີຮູບຖ່າຍຫຼືຄລິບວີດີໂອທີ່ນຳມາເຜີຍແພ່ຢືນຢັນວ່າ Slenderman ໂຕນີ້ມີໂຕຕົນແທ້ໆເທິງໂລກໃບນີ້.
ເຫັນຜູ້ຊາຍທີ່ຢືນດ້ານຫຼັງກັບເດັກນ້ອຍຫຼືບໍ່? …
ຮູບຖ່າຍຈາກໃນປ່າທີ່ຢືນຢັນວ່າມັນມີແທ້
ກ່ອນໜ້ານີ້ Slenderman ບໍ່ເປັນທີ່ຮູ້ຈັກກັນຫຼາຍ ແຕ່ຈາກຮູບຖ່າຍຂອງຊ່າງພາບຄົນໜຶ່ງທີ່ເສຍຊີວິດເມື່ອປີ 1983 ທີ່ບັງເອີນຖ່າຍຮູບຜູ້ຊາຍທີ່ມີແຂນຂາຍາວໄດ້ ເຄີຍເວົ້າໄວ້ວ່າ: ມັນເຄີຍບອກກັບຂ້ອຍວ່າ “ບໍ່ຕ້ອງຢ້ານ… ຂ້ອຍບໍ່ໄດ້ມາເພື່ອຂ້າເຈົ້າດອກ”. ແຕ່ຫຼັງຈາກນັ້ນກໍມີລາຍງານວ່າມີເດັກນ້ອຍຖືກລັກພາໂຕໄປແລ້ວຖືກຂ້າແບບໂຫດສຸດໆ, ເຊິ່ງຮູບທີ່ໄດ້ຈາກການແປງຫ້ອງສະໝຸດເທສະບານສເຕີຣ໌ລິງ ຫຼັງຈາກຖືກໄຟໄໝ້ກໍພົບວ່າມີຮູບຂອງ Slenderman ທີ່ຢືນຢູ່ກັບເດັກນ້ອຍ ເຊິ່ງເປັນຮູບທີ່ມີຊື່ສຽງ ແລະຢືນຢັນໂຕຕົນຂອງ Slenderman ໄດ້ເປັນຢ່າງດີ.
ຍິ່ງໄປກວ່ານັ້ນ Slenderman ແມ່ນມີໂຕຕົນຢູ່ຄູ່ກັບມະນຸດມາຫຼາຍກວ່າ 9000 ປີເພາະປະກົດຮູບແຕ້ມບູຮານເທິງຝາຖ້ຳໃນປະເທດບຣາຊິວ ພົບວ່າມີຮູບຂອງ Slenderman ຢູ່ໃນນັ້ນນຳ. ນອກຈາກນີ້ຍັງມີຄຳຢືນຢັນຈາກ Hans Freckenberg ຊ່າງພາບຊາວເຢຍຣະມັນໃນຍຸກສະຕະວັດທີ 16 ໄດ້ຢືນຢັນວ່າໄດ້ພົບບຸກຄົນທີ່ມີແຂນຂາຍາວລີບແທ້ໆອີກນຳ.
ຄວາມເປັນຈິງທີ່ໜ້າເຊື່ອຖືທີ່ສຸດ
ຂໍ້ມູນຄວາມເປັນມາແບບບໍ່ອີງອາຖັນຂອງການກຳເນີດ Slenderman ນັ້ນ, ວ່າກັນວ່າເກີດຈາກການປະກວດຕັດຕໍ່ຮູບຖ່າຍສິ່ງເລິກລັບ, ໂດຍທາງເວັບຈັດກິດຈະກຳແຕ່ງຮູບຖ່າຍທຳມະດາໃຫ້ເປັນຂາວດຳແລະໃຫ້ມີສິ່ງເລິກລັບເໜືອທຳມະຊາດພາຍໃນຮູບພ້ອມກັບໃຫ້ສ້າງຕຳນານເລິກລັບປະກອບໄປນຳ, ເຊິ່ງຮູບຖ່າຍ Slenderman ກໍມີກຳເນີດມາຈາກກິດຈະກຳນີ້ ໂດຍຮູບດັ່ງກ່າວຫຼືຮູບດ້ານລຸ່ມນີ້ເອງ, ເຊິ່ງຜູ້ທີ່ໂພສຫຼືຜູ້ໃຫ້ກຳເນີດ Slenderman ແມ່ນຜູ້ໃຊ້ນາມແຝງວ່າ: Victor Surge (ຊື່ແທ້ແມ່ນ Eric Knudsen) ເຊິ່ງສາມາດເຂົ້າໄປເບິ່ງຂໍ້ມູນເພີ່ມຕື່ມໄດ້ທີ່:
http://www.imdb.com/name/nm7311783/
ຫຼືສາມາດຫາຂໍ້ມູນເພີ່ມຕື່ມໄດ້ທີ່ອິນເຕີເນັດທົ່ວໄປ
ເຖິງວ່າເລື່ອງລາວຂອງ Slenderman ຈະເປັນພຽງເລື່ອງແຕ່ງ ແຕ່ມັນກໍກາຍເປັນຄຳຄົ້ນຫາທີ່ຫຼາຍທີ່ສຸດໃນຊ່ວງເວລານັ້ນທັນທີ ແລະກາຍເປັນຄຳຖາມທີ່ຖືກຖາມເຂົ້າມາໃນລາຍການວິທະຍຸຫຼາຍທີ່ສຸດໃນສະໄໝນັ້ນ ແລະຖືກເຮັດເປັນເກມສະຢອງຂວັນໃຫ້ຫຼິ້ນຫຼາກຫຼາຍອີກນຳ.
ນອກຈາກນີ້ກໍຍັງມີຮູບເງົາສະຢອງຂວັນຂອງອາເມຣິກາທີ່ຊື່ວ່າ: The Blair Witch Project ທີ່ມີເລື່ອງລາວກ່ຽວກັບ Slenderman ແລະກໍມີໄວລຸ້ນໃນອາເມຣິກາຫຼາຍຄົນພະຍາຍາມທີ່ຈະພິສູດເລື່ອງນີ້ ພ້ອມທັງອັບຄລິບຂຶ້ນເທິງເວັບໄຊວີດີໂອຊື່ດັງແບບ Youtube ອີກນຳ.
ມາຈົນຮອດມື້ນີ້ Slenderman ກໍກາຍເປັນຊື່ທີ່ຄຸ້ນຫູຜ່ານທາງໂລກອິນເຕີເນັດແລະເຫດການເດັກຍິງອາຍຸ 12 ປີພະຍາຍາມຂ້າໝູ່ຮ່ວມຊັ້ນ ເມື່ອປີ 2014 ກໍເປັນສິ່ງທີ່ເຮັດໃຫ້ຄົນກັບມາສົນໃຈ Slenderman ນີ້ອີກຄັ້ງ, ຫຼັງຈາກທີ່ງຽບຫາຍໄປດົນ ເຊິ່ງໃນວັນທີ 23 ມັງກອນ ປີ 2017 ຫຼືປີໜ້ານີ້ທາງ HBO ຈະເຮັດສາລະຄະດີກ່ຽວກັບເລື່ອງນີ້ຂຶ້ນມາໃໝ່ໃຫ້ຄົນທີ່ຕິດຕາມເລື່ອງນີ້ໄດ້ຊົມກັນອີກຄັ້ງ ໃຜທີ່ເປັນຄົນມັກອ່ານ ຫຼືເບິ່ງຮູບເງົາແນວເລິກລັບບໍ່ຄວນພາດເດີ້.
ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!
ທີ່ມາ: online station