ອີງຕາມການລາຍງານຂອງສຳນັກຂ່າວຈີນ ເມື່ອວັນທີ 16 ພະຈິກຜ່ານມາວ່າ ຫ້ອງນອນຫຼັງໜຶ່ງໃນເມືອງຊີອານ ມົນທົນສ່ານຊີ ເປີດໄຟສະຫວ່າງໄວ້ຕະຫຼອດ 10 ປີ ເພາະຜູ້ຊາຍຄົນໜຶ່ງຮັກດ້ວຍຄວາມໝັ້ນຄົງ ຊື່ວ່າ ເກີ໋ຈ້ຽນຫົວ ລາວເປີດປະໄວ້ໃຫ້ພັນລະຍາ ທີ່ເປັນອຳມະພາດ ເຊິ່ງເຂົາເຝົ້າເບິ່ງ ແລະທະໜຸຖະໜອມມາຕະຫຼອດໄລຍະຫຼາຍປີແລ້ວ ເພາະເຂົາເອງກໍບໍ່ສາມາດຢູ່ ແລະເວົ້ານຳໄດ້ຕະຫຼອດເວລາ ຈຶ່ງໄດ້ແຕ່ເປີດໄຟ, ເປີດໂທລະພາບ ໄວ້ເພື່ອກະຕຸ້ນສຳຜັດຂອງລາວ
ຕາມການລາຍງານບອກວ່າ ເມື່ອເດືອນທັນວາ ປີ 2016 ພັນລະຍາ ອາຍຸ 34 ປີ ໄດ້ປະສົບອຸປະຕິເຫດ ຕົກລົງມາຈາກລະບຽງຊັ້ນສູງ ເຮັດໃຫ້ຫົວກະແທກພື້ນ ອາການໜັກສົມຄວນ, ເມື່ອມາເຫັນສະພາບພັນລະຍາ ທີ່ນອນຢູ່ກັບພື້ນ ກໍກັ້ນນໍ້າຕາບໍ່ຢູ່ ລາວຮ້ອງໄຫ້ຢ່າງໜັກ
ຈາກນັ້ນ ລາວໄດ້ສົ່ງພັນລະຍາເຂົ້າຮັກສາຢູ່ຫ້ອງໄອຊີຢູ ຮອດ 7 ເດືອນ, ແຕ່ແພດໄດ້ບອກວ່າ ບໍ່ມີຫວັງ ທີ່ຈະຍ່າງໄດ້ອີກຕໍ່ໄປ ເຊິ່ງລາວໄດ້ເປັນອຳມະພາດ ໃນອະນາຄົດຈະມີພະຍາດແຊກຊ້ອນຫຼາຍຢ່າງ, ເຊິ່ງຫຼັງຈາກຢູ່ໂຮງໝໍໄດ້ 1 ປີລາວໄດ້ຕັດສິນໃຈ ພາພັນລະຍາກັບມາຢູ່ບ້ານ, ລາວໄດ້ດູແລເປັນຢ່າງດີນັບຈາກນັ້ນມາ
ລາວເອງກໍເປັນນັກທຸລະກິດຄົນໜຶ່ງ ທີ່ປະສົບຄວາມສຳເລັດ ທີ່ມີສ່ວນຮ່ວມໃນໂຄງການດ້ານອະສັງຫາລິມະຊັບ ຫຼາຍໂຄງການ, ຊີວິດມີພ້ອມ ທັງເຮືອນ, ລົດຫຼາຍຄັນ, ວັດຖຸມີຄ່າຫຼາຍຢ່າງ ແຕ່ລາວກໍຕັດສິນໃຈ ຂາຍຊັບສິນເກືອບທຸກຢ່າງ ພ້ອມເອົາເງິນທີ່ເກັບໄວ້ນັ້ນ ຈຳນວນ 1 ລ້ານຢວນ ເພື່ອເອົາໄປຮັກສາພັນລະຍາ