ພິທີເປີດນຳໃຊ້ເວັບໄຊ ສູນກາງແນວລາວສ້າງຊາດ (ສນຊ) ຢ່າງເປັນທາງການ ໄດ້ມີຂຶ້ນເມື່ອວັນທີ 10 ພະຈິກນີ້ ທີ່ສຳນັກງານສູນກາງແນວລາວສ້າງຊາດ, ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ມີບັນດາຮອງປະທານ ສນຊ, ແຂກຖືກເຊີນ, ພະນັກງານທີ່ກ່ຽວຂ້ອງເຂົ້າຮ່ວມ.
ທ່ານ ຈັນທະວົງ ແສນອາມາດມຸນຕີ ຮອງປະທານ ສນຊ ທັງເປັນຜູ້ຮັບຜິດຊອບວຽກງານໄອທີ ໄດ້ກ່າວລາຍງານວ່າ: ຈຸດປະສົງຂອງ ການເປີດນຳໃຊ້ເວັບໄຊດັ່ງກ່າວ ເພື່ອເປັນການເປີດປະຕູ ແຫ່ງການຕິດຕໍ່ພົວພັນ ແລະ ເຊື່ອມໂຍງດ້ານຂໍ້ມູນຂ່າວສານ ລະຫວ່າງສູນກາງແນວລາວສ້າງຊາດ ກັບແນວລາວສ້າງຊາດແຕ່ລະຂັ້ນ, ກັບປະຊາຊົນລາວບັນດາເຜົ່າ, ຊັ້ນຄົນ, ສາສະໜາ, ເພດ-ໄວ, ຄົນລາວທີ່ດຳລົງຊີວິດຢູ່ຕ່າງປະເທດ ກໍຄືພາກສ່ວນກ່ຽວຂ້ອງເພື່ອນມິດໃນພາກພື້ນ ແລະ ສາກົນ.
ເວັບໄຊຂອງສູນກາງແນວລາວສ້າງຊາດ ມີຊື່ວ່າ: WWW.lfnc.gov.la ເປັນເວັບໄຊທີ່ມີສອງພາສາ, ທັງພາສາລາວ ແລະ ພາສາອັງ ກິດ, ປະກອບມີໜ້າສຳຄັນຕົ້ນຕໍຈຳນວນໜຶ່ງຄື: ໜ້າທຳອິດ, ໜ້າຂ່າວສານ, ໜ້າກອງປະຊຸມຕ່າງໆ, ໜ້າຕິດຕໍ່ພົວພັນ ແລະ ໜ້າກວດອີເມວ; ໃນໜ້າທຳອິດແມ່ນໄດ້ນຳສະເໜີກ່ຽວກັບປະຫວັດ ແລະ ມູນເຊື້ອຂອງອົງການແນວລາວສ້າງຊາດ, ທີ່ຕັ້ງ, ພາລະບົດບາດ, ສິດ, ໜ້າທີ່, ໂຄງຮ່າງການຈັດຕັ້ງ, ວິໄສທັດ, ແຜນງານຍຸດທະສາດ, ນິຕິກຳ ແລະ ອື່ນໆ ທີ່ຕິດພັນກັບວຽກງານແນວ ໂຮມທັງຢູ່ສູນກາງ ແລະ ທ້ອງຖິ່ນ. ສ່ວນໜ້າຂ່າວສານ ແມ່ນຈະໄດ້ນຳສະເໜີຂ່າວການເຄື່ອນໄຫວຕ່າງໆ ນັບທັງຂ່າວທົ່ວໄປ ແລະ ຂ່າວສະເພາະຂອງວຽກງານແນວໂຮມ ເປັນຕົ້ນແມ່ນ: ຂ່າວການເຄື່ອນໄຫວຂອງປະທານ, ຮອງປະທານ, ຄະນະປະຈຳ, ບັນດາກົມກອງວິຊາການອ້ອມຂ້າງສູນກາງແນວລາວສ້າງຊາດ ແລະ ແນວລາວສ້າງຊາດຂັ້ນທ້ອງຖິ່ນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!