ໃນວັນທີ 9 ພະຈິກນີ້ ທີ່ນະຄອນຫລວງວຽງຈັນ, ພາຍໃຕ້ການເປັນປະທານຂອງ ສປປ ລາວ ໄດ້ຈັດກອງປະຊຸມ ຫົວໜ້າອົງການໄອຍະການ ອາຊຽນ-ຈີນ ຄັ້ງທີ 10 ຂຶ້ນ ພາຍໃຕ້ຫົວຂໍ້ “ເພີ່ມທະວີການຮ່ວມມື ໃນການຕ້ານອາຊະຍາກຳຂ້າມຊາດ ຢ່າງມີປະສິດທິຜົນ” ໂດຍລົງເລິກບັນຫາຢາເສບຕິດ ແລະ ການຄ້າມະນຸດ ໂດຍການເປັນປະທານຂອງ ທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ, ມີທ່ານ ຊາວ ຈ້ຽນມິງ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປ ຈີນ ແລະ ຫົວໜ້າໄອຍະການສູງສຸດ ຈາກບັນດາປະເທດອາຊຽນ ພ້ອມດ້ວຍຄະນະຜູ້ແທນອາຊຽນເຂົ້າຮ່ວມ.
ທ່ານ ຄຳສານ ສຸວົງ ກ່າວວ່າ: ປັດຈຸບັນ ອາຊະຍາກຳຂ້າມຊາດ ໂດຍສະເພາະ ບັນຫາຢາເສບຕິດ ແລະ ການຄ້າມະນຸດ ໄດ້ກາຍເປັນ ບັນຫາລວມຂອງໂລກ ອັນເປັນໄພຂົ່ມຂູ່ຕໍ່ຄວາມໝັ້ນຄົງຂອງບັນດາປະເທດ ໃນພາກພື້ນ ແລະ ໃນໂລກ. ໃນແຕ່ລະປີ ບັນຫາອາຊະຍາກຳຂ້າມຊາດ ບໍ່ພຽງແຕ່ສ້າງຄວາມເສຍຫາຍແກ່ຊີວິດ ແລະ ຊັບສິນຂອງປະຊາຊົນ ຢ່າງມະຫາສານ ແຕ່ຍັງເປັນອຸປະສັກຕໍ່ການພັດທະນາ ເສດຖະກິດ-ສັງຄົມ ຂອງບັນດາປະຊາຊາດ ແລະ ການຮ່ວມມື ໃນພາກພື້ນ. ດັ່ງນັ້ນ, ອົງການໄອຍະການສູງສຸດ ຂອງບັນດາປະເທດສະມາຊິກອາຊຽນ ເຫັນໄດ້ຄວາມສຳຄັນ ໃນການຮ່ວມມືກັບອົງການໄອຍະການປະຊາຊົນສູງສຸດຂອງ ສປ ຈີນ ເພື່ອຕໍ່ສູ້ຕ້ານອາຊະຍາກຳຂ້າມຊາດ ໃນພາກພື້ນ ອັນເປັນການປະກອບສ່ວນ ເຂົ້າໃນພາລະກິດປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງ ໃນພາກພື້ນກໍຄືໃນໂລກ.
ພ້ອມດຽວກັນ ທ່ານ ຄຳສານ ສຸວົງ ໄດ້ກ່າວຕື່ມວ່າ: ຍ້ອນເຫັນໄດ້ ຄວາມອັນຕະລາຍ ແລະ ຄວາມເສຍຫາຍ ອັນໃຫຍ່ຫລວງ ສປປ ລາວ ຈະເພີ່ມທະວີ ການຈັດຕັ້ງປະຕິບັດຍຸດທະສາດ ແລະ ນິຕິກຳຕ່າງໆຢ່າງມີປະສິດທິຜົນ ເພື່ອແນ່ໃສ່ສະກັດກັ້ນ, ຕ້ານອາຊະຍາກຳ ຢາເສບຕິດ ແລະ ການຄ້າມະນຸດ ໂດຍມິທິດທາງຄື: ເພີ່ມທະວີການຮ່ວມມືຢ່າງມີປະສິດທິຜົນ ກັບບັນດາປະເທດເພື່ອນມິດ ແລະ ອາຊຽນ ຕ້ານອາຊະຍາກຳຂ້າມຊາດ ໂດຍສະເພາະອາຊະຍາກຳຢາເສບຕິດ ແລະ ການຄ້າມະນຸດ ເພື່ອນຳເອົາຕົວຜູ້ກະທຳຜິດມາລົງໂທດຕາມກົດໝາຍຢ່າງສັກສິດ ດ້ວຍການໃຫ້ການຮ່ວມມືເຊິ່ງກັນ ແລະ ກັນ, ການຮ່ວມມືທາງອາຍາ ແລະ ການສົ່ງຜູ້ຮ້າຍຂ້າມແດນ ໂດຍຜ່ານກົນໄກທີ່ເໝາະສົມຕາມສົນທິສັນຍາທີ່ໄດ້ເຊັນກັນ; ເອົາໃຈໃສ່ໃນການ ຈັດຕັ້ງປະຕິບັດຖະແຫລງການຮ່ວມ ລະຫວ່າງຫົວໜ້າອົງການ ໄອຍະການສູງສຸດ ອາຊຽນ-ຈີນ ໃຫ້ເປັນຮູບປະທຳ ໂດຍມີກົນໄກປະສານງານທີ່ຄ່ອງແຄ້ວ, ແລກປ່ຽນຂໍ້ມູນຂ່າວສານ ກັບບັນດາປະເທດເພື່ອນມິດ ແລະ ອາຊຽນ ໃຫ້ຊັດເຈນທັນກັບສະພາບການ; ຜັນຂະຫຍາຍບັນດາຂໍ້ກຳນົດ, ກົດໝາຍ ແລະ ສົນທິສັນຍາທີ່ກ່ຽວຂ້ອງກັບ ຄະດີຢາເສບຕິດ ແລະ ການຄ້າມະນຸດ ເຂົ້າສູ່ວຽກງານຕົວຈິງຢ່າງມີປະສິດທິຜົນ; ພ້ອມທັງປັບປຸງ ປະສິດທິພາບ ແລະ ຂີດຄວາມສາມາດ ໃນການປະຕິບັດພາລະບົດບາດ, ໜ້າທີ່ຂອງອົງການໄອຍະການ ໃຫ້ທຽບເທົ່າກັບບັນດາປະເທດສະມາຊິກອາຊຽນ ເທື່ອລະກ້າວ.
ກອງປະຊຸມດັ່ງກ່າວ ຍັງເປັນການຢືນຢັນຄືນຄວາມໝາຍໝັ້ນ ທີ່ຈະສືບຕໍ່ຮ່ວມມືກັນອັນສອດຄ່ອງກັບ ແຜນປະຕິບັດງານອາຊຽນ-ຈີນ 2016-2020 ແລະ ເຈດຕະນາລົມທາງການເມືອງຂອງຜູ້ນຳ ອາຊຽນ-ຈີນ ທີ່ຈະເສີມຂະຫຍາຍການເປັນຄູ່ຮ່ວມຍຸດທະສາດ ແລະ ກອງປະຊຸມໃນຄັ້ງນີ້ ຈະປອບສ່ວນສຳຄັນ ເຂົ້າໃນການເພີ່ມທະວີການຮ່ວມມືວຽກງານ ໄອຍະການຢ່າງມີປະສິດທິຜົນກວ່າເກົ່າ ໂດຍຜ່ານບັນດາສົນທິສັນຍາ ແລະ ຖະແຫລງການທີ່ໄດ້ເຊັນຮ່ວມກັນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!