ຕາມຂ່າວຕ່າງປະເທດ09 ພະຈິກ 2016
ເກີດເຫດຝົນຕົກໜັກດິນເຈື່ອນທາງພາກຕາເວັນຕົກສຽງເໜືອຂອງໂຄໂລມບີໃນວັນທີ 8 ພະຈິກທີ່ຜ່ານມາ ເປັນເຫດເຮັດໃຫ້ມີຜູ້ເສຍຊີວິດຢ່າງໜ້ອຍ 9 ຄົນ.
ຕາມຂ່າວຕ່າງປະເທດລາຍງານວ່າ: ສຳນັກງານຈັດການຄວາມສ່ຽງ ແລະ ໄພພິບັດສຸກເສີນແຫ່ງຊາດໂຄໂລມບີລະບຸວ່າ ຝົນທີ່ຕົກລົງມາຢ່າງໜັກເຮັດໃຫ້ເກີດດິນເຈື່ອນຢູ່ໃນເມືອງເອລຕຳໂບ ທີ່ຫ່າງໄກທາງພາກຕາເວັນຕົກສຽງໃຕ້ຂອງປະເທດ ຊຶ່ງໃນເບື້ອງຕົ້ນພົບຜູ້ເສຍຊີວິດແລ້ວຢ່າງໜ້ອຍ 9 ຄົນ ແລະ ມີຜູ້ໄດ້ຮັບບາດເຈັບຢ່າງໜ້ອຍ 3 ຄົນ,ຊຶ່ງທາງການທ້ອງຖິ່ນລະບຸວ່າ ຝົນທີ່ຕົກລົງມາຢ່າງໜັກ ແລະ ຕໍ່ເນື່ອງຫຼາຍມື້ ໃນເຂດພູຢູ່ໃກ້ຄຽງກັບທາງຫຼວງຄືຕົ້ນຕໍທີ່ນຳໄປສູ່ການເກີດເຫດດິນເຈື່ອນໃນເທື່ອນີ້.
ຜູ້ອໍານວຍການສຳນັກງານຈັດການໄພພິບັດປະຈຳແຂວງອັນຕິໂອກິອາເປີດເຜີຍວ່າ ປະລິມານດິນເຈື່ອນລົງມາຈາກພູໃນຄັ້ງນີ້ຢູ່ທີ່ປະມານ 50 ພັນແມັດກ້ອນ ແລະ ຍັງບໍ່ສາມາດສະຫຼຸບໄດ້ແນ່ນອນວ່າ ເຈົ້າໜ້າທີ່ທີ່ກ່ຽວຂ້ອງຈະຕ້ອງໃຊ້ເວລາດົນເທົ່າໃດໃນການແປງເສັ້ນທາງໃຫ້ສາມາດກັບມາໃຊ້ງານໄດ້ຕາມປົກກະຕິ.