ອີງຕາມຂໍ້ມູນຈາກ ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ 9 ກ່ຽວກັບການ
ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ເງິນຕາແຫ່ງລັດ ປະຈຳສົກ
ປີ 2013-2014 ແລະ ທິດທາງແຜນການສົກປີ 2014-2015 ຊຶ່ງຕາມແຜນຈະເຮັດໃຫ້ເສດຖະກິດຂອງ
ລາວຂະຫຍາຍຕົວຢ່າງຕໍ່ເນື່ອງ ລວມຍອດຜະລິດຕະພັນພາຍໃນໃຫ້ບັນລຸ 103 ພັນກວ່າຕື້ກີບ.
ຕະຫຼອດໄລຍະປີຜ່ານມານີ້ ເຖິງວ່າສະພາບເສດຖະກິດມະຫາພາກໂດຍລວມຈະມີຄວາມຫຍຸ້ງຍາກ,ແຕ່
ຂະບວນການການສ້າງສາພັດທະນາໃນທຸກໆຂົງເຂດວຽກງານ ແມ່ນສືບຕໍ່ດຳເນີນໄປຢ່າງເປັນປົກກະຕິ,
ອັນໄດ້ເຮັດໃຫ້ພື້ນຖານເສດຖະກິດແຫ່ງຊາດຍັງສຶບຕໍ່ຂະຫຍາຍຕົວຢ່າງຕໍ່ເນື່ອງ, ຈັງຫວະການເພີ່ມຂຶ້ນ
ຂອງລວມຍອດຜະລິດຕະພັນພາຍໃນ(GDP) ເຖິງວ່າບໍ່ບັນລຸຕາມຄາດໝາຍແຕ່ກໍຍັງເພີ່ມຂຶ້ນໃນລະດັບ
7,57,8% ແລະ ສ້າງມູນຄ່າເພີ່ມໄດ້ 91.587 ຕື້ກີບ, ສະເລ່ຍໃສ່ຫົວຄົນບັນລຸໄດ້ 13,5 ລ້ານກີບ ຫຼື ເທົ່າກັບ
1.690 ໂດລາ, ຜະລິດ ເຂົ້າໄດ້ 3,85 ລ້ານໂຕນ, ສ່ວນອັດຕາເງິນເຟີ້ ສະເລ່ຍປະ ມານ 6,27%, ຄັງສຳຮອງ
ເງິນຕາຕ່າງປະເທດສາມາດກຸ້ມການນຳເຂົ້າ 7 ເດືອນ, ສະເລ່ຍອັດຕາຄວາມທຸກຍາກຍັງເຫຼືອ 20,5%
ຂອງພົນລະເມືອງທັງໝົດ, ຈຳນວນຄອບຄົວທຸກຍາກຍັງເຫຼືອ 10,6%.
ນອກຈາກນັ້ນການປະຕິບັດວຽກງານໃນຂົງເຂດສັງຄົມວັດທະນະທຳ, ກໍໄດ້ດຳເນີນໄປດ້ວຍຜົນສຳເລັດ
ແລະ ມີບັນຍາກາດດີເປັນຕົ້ນແມ່ນການຈັດຕັ້ງປະຕິບັດ ຄາດໝາຍສະຫັດສະຫວັດດ້ານການພັດທະນາ
ກໍເຫັນວ່າຫຼາຍຄາດໝາຍມີຄວາມຄືບໜ້າດີພໍສົມຄວນ ແລະ ມີຫຼາຍໜໍ່ແໜງທີ່ເປັນປັດໄຈໃໝ່ ເຊຶ່ງຢັ້ງ
ຢືນເຖິງຄວາມຖືກຕ້ອງຂອງແນວທາງ ກໍຄືຄວາມເປັນເຈົ້າການບຸກ ບືນສູ້ຊົນຂອງຄະນະພັກ ແລະ ອຳ
ນາດການປົກຄອງແຕ່ລະຂັ້ນ ໃນການຈັດຕັ້ງຜັນຂະຫຍາຍມະຕິຂອງພັກ.
ເພື່ອເຮັດໃຫ້ຄາດໝາຍສະເພາະໜ້າໄດ້ຮັບການແກ້ໄຂໄປໃນທາງທີ່ດີຂຶ້ນ ຕາມຂໍ້ມູນໃຫ້ຮູ້ອີກວ່າ: ສຳລັບ
ແຜນພັດທະນາເສດຖະກິດສັງຄົມສົກປີ 2014-2015 ໃນຕໍ່ໜ້ານີ້ ແມ່ນມີລັກສະນະບຸກບືນ, ສູ້ຊົນສູງສົມ
ຄວນ ແລະ ເປັນແຜນສືບຕໍ່ບຸກທະລຸ ທີ່ຮັບປະກັນການເຕີບໂຕຕາມທິດຍືນຍົງ ເປັນຕົ້ນຈັງຫວະການເຕີບ
ໂຕຂອງລວມຍອດຜະລິດຕະພັນພາຍໃນ ໃຫ້ບັນລຸບໍ່ຫຼຸດ 7,58%, ລວມຍອດມູນຄ່າໃຫ້ໄດ້ 103.300 ຕື້ກີບ,
ລາຍໄດ້ສະເລ່ຍໃສ່ຫົວຄົນໃຫ້ບັນລຸປະມານ 15 ລ້ານກີບ ຫຼື ປະມານ 1.900 ໂດລາ, ສຳລັບການເກັບລາຍ
ຮັບເຂົ້າງົບປະມານໃຫ້ໄດ້ 25.815 ຕື້ກີບ, ຄາດຄະເນລາຍຈ່າຍບໍ່ເກີນ 30.500 ຕື້ກີບ, ສ່ວນມູນຄ່າການລົງ
ທຶນແມ່ນໃຫ້ໄດ້ 33 ພັນຕື້ກີບ ແລະ ອັດຕາຄວາມທຸກຍາກຫຼຸດລົງໃຫ້ເຫຼືອ 9,40%.
ແຫຼ່ງຂ່າວ: ໜັງສືພິມເສດຖະກິດ – ສັງຄົມ