ອີງຕາມແຫຼ່ງຂ່າວຈາກພາກເໜືອລາຍງານວ່າ ມີປະຊາຊົນໃນເມືອງຮຸນ ແຂວງອຸດົມໄຊ ທີ່ຮັບຈ້າງເປັນແຮງງານໃນສວນປູກກ້ວຍ ທີ່ລົງທຶນໂດຍນັກລົງທຶນຈີນ ຈຳນວນຫຼາຍເລິ່ມລົ້ມປ່ວຍ ດ້ວຍອາການສະໝອງອັກເສບ ເຊິ່ງຄາດການເບື້ອງຕົ້ນວ່າເປັນເຫດຈາກການໄດ້ຮັບສານເຄມີທີ່ໃຊ້ເຂົ້າໃນການ ຂ້າຫຍ້າ ແລະຂ້າແມງໄມ້ ໃນສວນກ້ວຍ ລວມທັງຂະບວນການຊະລ້າງໝາກກ້ວຍ ໂດຍບໍ່ມີການປ້ອງກັນຖືກຕ້ອງຕາມຫລັກວິຊາການຢ່າງເຄັ່ງຄັດ.
ໃນຂະນະທີ່ຢູ່ກອງປະຊຸມສະໄຫມສາມັນຄັ້ງທີ 2 ຂອງສະພາແຫ່ງຊາດ ສະມາຊິກສະພາຫລາຍທ່ານໄດ້ກ່າວເຖິງບັນຫາດັ່ງກ່າວ ແລະໃນໂອກາດດຽວກັນນັ້ນລັດຖະບານໄດ້ຢືນຢັນວ່າໄດ້ສັ່ງຢຸດຕິການອະນຸຍາດລົງທຶນປູກກ້ວຍຢູ່ພາກເໜືອຂອງນັກລົງທຶນຈີນໄວ້ແລ້ວ ແຕ່ສະມາຊິກສະພາບາງທ່ານຍັງກ່າວຕໍ່ກອງປະຊຸມວ່າ ຫລາຍບ່ອນຢຸດຕິການປູກປູກກ້ວຍແລ້ວ ແຕ່ກໍຍັງມີບາງບ່ອນບໍ່ທັນຢຸດ ພ້ອມທັງຍັງກ້າເບ້ຍກ້ວຍຈຳໜ່າຍຢູ່.
