ກຸ່ມແມ່ຍິງສາກົນ ທີ່ດຳລົງຊີວິດຢູ່ໃນ ສປປ.ລາວ ໂດຍສະເພາະທີ່ຢູ່ໃນນະຄອນຫຼວງວຽງຈັນ ກຽມຈະຈັດງານຕະຫຼາດນັດ WIG BAZAAR ປະຈຳປີ 2016 ເປັນປີທີ 26 ຕິດຕໍ່ກັນມາ ເຊິ່ງຈະຈັດຂຶ້ນໃນວັນທີ 19 ພະຈິກ 2016 ທີ່ຄະນະວິສະວະກຳສາດ (ໂສກປ່າຫຼວງ) ມະຫາວິທະຍາໄລແຫ່ງຊາດ (ມຊ) ເມືອງສີສັດຕະນາກ ນະຄອນຫຼວງວຽງຈັນ ເລີ່ມແຕ່ເວລາ 10:00-18:00 ໂມງ.
ທ່ານນາງ Ausow STEVENOON ຮອງປະທານກຸ່ມແມ່ຍິງສາກົນ ປະຈໍາລາວ ໄດ້ຖະແຫຼງຕໍ່ຜູ້ສື່ຂ່າວໃນຕອນບ່າຍວັນ 25 ຕຸລາ 2016 ທີ່ສະມາຄົມນັກຂ່າວ ແຫ່ງ ສປປ.ລາວ ນະຄອນຫຼວງວຽງຈັນ ໂດຍມີສະມາຊິກກຸ່ມແມ່ຍິງສາກົນ ແລະ ບັນດາສື່ມວນຊົນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ ໂດຍຮອງປະທານກຸ່ມແມ່ຍິງສາກົນປະຈໍາລາວໄດ້ຖະແຫຼງວ່າ ການຈັດງານໃນຄັ້ງນີ້ ແມ່ນຈະມີການວາງສະແດງ ແລະ ຂາຍສິນຄ້າ ປະເພດຜະລິດຕະພັນທີ່ເປັນເຄື່ອງນຸ່ງຫົ່ມໃໝ່ ແລະ ເຄື່ອງນຸ່ງມືສອງ ເຄື່ອງຫັດຖະກຳ ເຄື່ອງປະດັບ ອັນຍະມະນີ ອາຫານ ເຄື່ອງດື່ມ ໂຮມທັງຈະມີການສະແດງເທິງເວທີ ການຈັດກິດຈະກຳຮ່ວມກັນແບບຄອບຄົວ ການບໍລິຈາກວັດຖຸສິ່ງຂອງ ແລະ ການຊື້ສະຫຼາກຊີງໂຊກທີ່ມີລາງວັນທີ່ຫຼາກຫຼາຍ ເຊິ່ງຄາດວ່າຈະມີຫຼາຍກວ່າ 160 ຮ້ານເຂົ້າຮ່ວມ ໂດຍທີ່ທຸກກິດຈະກຳແມ່ນເນັ້ນເພື່ອການລະດົມທຶນຊ່ອຍເຫຼືອໂຄງການດ້ານສັງຄົມສົງເຄາະ ແລະ ການສຶກສາ ການກໍ່ສ້າງໂຮງຮຽນໃຫ້ນັກຮຽນ ຄູ ອາຈານ ທີ່ທຸກຍາກຂາດເຂີນອຸປະກອນການຮຽນ-ການສອນ ແລະ ດ້ອຍໂອກາດຢູ່ເຂດຫ່າງໄກສອກຫຼີກ ນອກນີ້ກໍຍັງຈະຊ່ອຍເປັນທຶນຄ່າອາຫານ ຄ່າເດີນທາງສຳລັບຜູ້ເຈັບປ່ວຍທີ່ມາຈາກເຂດຫ່າງໄກ ແລະ ຊ່ອຍເຫຼືອດ້ານທີມທ່ານໝໍຊ່ອຍຜ່າຕັດ ແກ້ໄຂຜູ້ປ່ວຍປາກແຫວ່ງ ເພດານໂຫວ້ ໄຟໃໝ້ ນໍ້າຮ້ອນລວກ ແລະ ອື່ນໆ.
ຂະນະທີ່ທ່ານນາງ Nami Ishihara ຜູ້ຕາງໜ້າ WIG ກໍໄດ້ກ່າວວ່າ ອົງການ WIG ລາວ ແມ່ນກຸ່ມທີ່ບໍ່ຫວັງຜົນກຳໄລ ເຊິ່ງຄຸ້ມຄອງ ແລະ ດຳເນີນການໂດຍສະມາຊິກທີ່ມີຄວາມສະໝັກໃຈປະກອບສ່ວນເຂົ້າໃນໂຄງການຕ່າງໆຂອງ WIG ໂດຍສະມາຊິກຜູ້ເປັນອາສາສະໝັກທີ່ເສຍສະຫຼະເວລາ ແລະ ຄວາມພະຍາຍາມຂອງຕົນ ເພື່ອເຮັດໃຫ້ເງິນທັງໝົດທີ່ໄດ້ຮັບຈາກການປະກອບສ່ວນໂດຍຜ່ານການລະດົມທຶນໄປເຖິງໂດຍກົງໃນໂຄງການຕ່າງໆຢ່າງມີປະສິດທິຜົນ.
ຂ່າວ/ພາບ: ເທບພະວົງ