ຈຳນວນພົນລະເມືອງລາວ ມີທັງໝົດ 6.492.228 ຄົນ ໃນນັ້ນ ຍິງ 3.237.227 ຄົນ ແລະ ຊາຍ 3.254.770 ຄົນ ເຫັນວ່າມີຜູ້ຊາຍຫຼາຍກວ່າແມ່ຍິງ ສະແດງໃນອັດຕາສ່ວນເພດແມ່ນຜູ້ຊາຍ 101 ຄົນຕໍ່ແມ່ຍິງ 100 ຄົນ ອັດຕາເພີ່ມຂຶ້ນຂອງພົນລະເມືອງໃນໄລຍະ 10 ປີຜ່ານມາ ແຕ່ປີ 2005 ເຖິງປີ 2015 ແມ່ນ 1,45% ຕໍ່ປີ ຫຼຸດລົງເມື່ອທຽບໃສ່ປີ 2005 ແມ່ນ 2,08% ຕໍ່ປີ ເຫັນວ່າມີຈັງຫວະການເພີ່ມຊ້າກວ່າໃນຊຸມ 10 ປີກ່ອນໜ້າ

ການເພີ່ມຂຶ້ນຂອງພົນລະເມືອງແມ່ນບໍ່ປ່ຽນແປງຫຼາຍ ສ່ວນໃຫຍ່ອາໄສຢູ່ແຂວງສະຫວັນນະເຂດ ກວມເອົາ 15% ນະຄອນຫຼວງວຽງຈັນ 13% ແຂວງຈຳປາສັກ 11% ແລະ ແຂວງຫຼວງພະບາງ 7% ຂອງຈຳນວນພົນລະເມືອງທັງໝົດ ຄົນອາໄສໜ້ອຍທີ່ສຸດແມ່ນແຂວງໄຊສົມບູນ ອັດຕາສ່ວນຂອງພົນລະເມືອງທີ່ອາໄສໃນເຂດຕົວເມືອງ ເພີ່ມຈາກ 27% ໃນປີ 2005 ເປັນ 33% ໃນປີ 2015 ໂດຍລວມພົນລະເມືອງທີ່ອາໄສຢູ່ເຂດຊົນນະບົດແມ່ນຫຼຸດລົງ 73% ໃນປີ 2005 ເປັນ 67% ໃນປີ 2015 ຄວາມໜາແໜ້ນກໍ່ເພີ່ມຂຶ້ນຈາກ 23 ເປັນ 27 ຄົນຕໍ່ກິໂລຕາແມັດ ສຳລັບນະຄອນຫຼວງວຽງຈັນ ມີຄວາມໜາແໜ້ນສູງກວ່າໝູ່ 209 ຄົນຕໍ່ກິໂລຕາແມັດ ແລະ ໜ້ອຍກວ່າໝູ່ ແຂວງຜົ້ງສາລີ ມີພຽງ 11 ຄົນຕໍ່ກິໂລຕາແມັດ.

ຈຳນວນພົນລະເມືອງລາວທັງໝົດ ຊົນເຜົ່າລາວມີປະມານ 53% ຊົນເຜົ່າກືມມຸ 11% ເຜົ່າ ມົ້ງ 9% ຜູ້ໄທ 3% ເຜົ່າໄຕ 3% ຊົນມະກອງ 3% ເຜົ່າກະຕາງ ອາຄາ ແລະ ລື້ 2% ແລະ ເຜົ່າຕ່າງໆກວມ 12%

ນັບຖືສາສະໜາພຸດ 65% ຄິດຕຼຽນ 2% ສ່ວນພົນລະເມືອງທີ່ບໍ່ເຊື່ອຖືສາສະໜາ ຫຼື ບັນພະບູລຸດ 31% ແລະ

ອັດຕາການຕາຍຂອງເດັກອາຍຸຕໍ່າກວ່າ 1 ປີ ມີທ່າອ່ຽງຫຼຸດລົງຈາກ 70 ຄົນມາເປັນ 57 ຄົນຕໍ່ເດັກເກີດມີຊີວິດ 1.000 ຄົນ ໃນປີ 2015 ອາຍຸຍືນສະເລ່ຍຂອງແມ່ຍິງເພີ່ມຂຶ້ນຈາກ 63 ປີມາເປັນ 65 ປີ ເພດຊາຍເພີ່ມຂຶ້ນ 59 ປີ ມາເປັນ 62 ປີ ປະມານ 7% ຂອງພົນລະເມືອງອາຍຸ 10 ປີຂຶ້ນໄປຖືວ່າແມ່ນພົນລະເມືອງຍົກຍ້າຍ

ອັດຕາການຮຽນຮູ້ໜັງສືຂອງພົນລະເມືອງ 15 ປີຂຶ້ນໄປ ແມ່ນໄດ້ເພີ່ມຂຶ້ນຈາກ 73% ມາເປັນ 85% ປະມານ 2 ສ່ວນ 3 ຂອງພົນລະເມືອງແມ່ນຢູ່ໃນກຳລັງແຮງງານ ເຊິ່ງ 69% ຂອງຜູ້ຊາຍແມ່ນເຮັດວຽກເປັນປົກກະຕິ ແລະ 66% ຂອງແມ່ຍິງຂະໜາດສະເລ່ຍຂອງຄົວເຮືອນແມ່ນ 5,3 ຄົນ ໃນປີ 2015 ຫຼຸດ ລົງຈາກ 5,8 ຄົນ ໃນປີ 2005 ປະມານ 96% ຂອງຄົວເຮືອນແມ່ນອາໄສຢູ່ເຮືອນທີ່ເຂົາເຈົ້າເປັນເຈົ້າຂອງເອງ ແລະ ປະມານ 86% ຂອງຄົວເຮືອນມີໂທລະສັບມືຖື 80% ມີລົດຈັກ 75% ເປັນເຈົ້າຂອງດິນກະສິກຳ ປະມານ 84% ຂອງຄົວເຮືອນ ສາມາດເຂົ້າເຖິງໄຟຟ້າ 61% ເຂົ້າເຖິງແຫຼ່ງນ້ຳດື່ມທີ່ໄດ້ຮັບການປັບປຸງ ແລະ 73% ທີ່ນຳໃຊ້ວິດຖ່າຍຖືກຫຼັກອະນາໄມ.
ຕິດຕາມຂ່າວເສດຖະກິດລາວ ກົດໄລຄ໌ເລີຍ!