ອີງຕາມຂ່າວຕ່າງປະເທດລາຍງານວັນທີ 10 ຕຸລາວ່າ ມື້ທຳອິດຂອງການເຮັດວຽກຫຼັງຈາກພັກເທດສະການວັນຊາດຈີນ ຊ່ວງເວລາຫຼັງຈາກເລີກວຽກທີ່ສະຖານີລົດໄຟໃຕ້ດິນ ມີຄົນຫຼາຍຈົນແໜ້ນກັນ ໃນຂະບວນລົດໄຟໃຕ້ດິນເສີງຕູ ສາຍ 2 ມີຊາຍ 3-4 ຄົນ ທີ່ສະແດງເປັນຄົນຖືພາ ແລະຍ່າງດ້ວຍທ່າທາງແບບແປກໆ ຈົນຫຼາຍຄົນຫຼຽວເບິ່ງ
ພວກເຂົານຸ່ງເສື້ອຢືດສີຂາວ ພ້ອມຂຽນໃສ່ເສື້ອວ່າ “ຜູ້ຍິງຖືພາ ບໍ່ແມ່ນເລື່ອງງ່າຍ ຄວນໃຫ້ພື້ນທີ່ ໃຫ້ອິດສະລະ ແລະໃຫ້ອະໄພ” ເຮັດໃຫ້ຜູ້ໂດຍສານຈໍານວນຫຼາຍ ພາກັນວິພາກວິຈານ ພ້ອມດ້ວຍຈັບໂທລະສັບຂຶ້ນມາຖ່າຍຮູບ ແລະບາງຄົນກໍເສຍສະລະບ່ອນນັ່ງໃຫ້
ມີຜູ້ໂດຍສານທີ່ຢູ່ໃນລົດໄຟຖາມວ່າ “ເປັນຫຍັງຕ້ອງສະແດງເປັນຄົນຖືພາ” ເຊິ່ງໄດ້ຄຳຕອບວ່າ ເຮັດແບບນີ້ກໍເພາະວ່າ ພວກເຂົາກໍາລັງກຽມເປັນພໍ່ ເພື່ອຮຽກຮ້ອງ ແລະຫວັງວ່າທຸກຄົນຈະໃຫ້ພື້ນທີ່ກັບແມ່ຍິງຖືພາ, ໃຫ້ຄວາມສົນໃຈ, ເອົາໃຈໃສ່ ແລະຄຳນຶງຄວາມປອດໄພຫຼາຍຂຶ້ນ
ນອກຈາກຜູ້ຊາຍທີ່ກຽມເປັນພໍ່ແລ້ວ ຢູ່ປະຕູທາງອອກຈາກສະຖານີໜຶ່ງ ຂອງລົດໄຟໃຕ້ດິນສາຍດັ່ງກ່າວ ໄດ້ມີແມ່່ຍິງຖືພາຄົນໜຶ່ງ ໄດ້ຂາຍກະເປົາໜັງທີ່ມີຄຸນນະພາບດີຫຼາຍໃບ ພ້ອມກັບເວົ້າໃສ່ໂທລະໂຄ່ງເພື່ອດຶງດູດຄວາມສົນໃຈຈາກຜູ້ທີ່ຍ່າງກາຍມາ ຢູ່ຂ້າງຍັງມີປ້າຍໂຄສະນາຂຽນວ່າ ການເປັນແມ່ຍິງຖືພາບໍ່ແມ່ນເລື່ອງງ່າຍ ເພື່ອເຮັດໃຫ້ຕູ້ໃສ່ເຄື່ອງມີບ່ອນຫວ່າງ ສຳລັບໄວ້ເຄື່ອງລູກນ້ອຍ ມື້ນີ້ຈຶ່ງໄດ້ເອົາກະເປົາໜັງທີ່ໃຊ້ເງິນ ແລະເກັບມາເປັນເວລາດົນຫຼາຍປີ ອອກມາຂາຍໃນລາຄາຖືກ